Ciemnaskuryja hłuchija dzieci, jakija naviedvali siehrehavanuju škołu ZŠA ŭ 1950-ch hadach, narešcie atrymajuć svaje atestaty
Na pačatku 1950-ch hadoŭ u škole na terytoryi ŭniviersiteta Haładet u Vašynhtonie pracavaŭ śpiecyjalny kłas dla ciemnaskurych hłuchich vučniaŭ. Adnak pa skančeńni škoły atestataŭ ab siaredniaj adukacyi dzieci tak i nie atrymali. Usio źmianiłasia paśla taho, jak škoła niadaŭna pahadziłasia praz stolki času pravieści aficyjnuju ŭračystuju cyrymoniju ŭručeńnia dypłomaŭ, piša ahienctva CNN.
Škoła Kiendał u tyja časy była adzinaj u Vašynhtonie, jakaja mahła dać adukacyju hłuchim dzieciam, ale ciemnaskurym nie dazvalali vučycca razam ź biełymi dziećmi i tamu jany byli vymušanyja šukać sabie novaje miesca ŭ inšych haradach. U 1952 hodzie baćki niekalkich ciemnaskurych dziaciej padali kalektyŭny pazoŭ u sud suprać Rady pa adukacyi akruhi Kałumbija. Jany namahalisia dabicca adkryćcia śpiecyjalnaha kłasa dla hłuchich ciemnaskurych dziaciej.
Sprava była vyjhranaja, akruhovy sud ZŠA pa akruzie Kałumbija tady zajaviŭ, što «čornyja hłuchija studenty nie mohuć być adpraŭlenyja za miežy štata albo akruhi dla atrymańnia toj ža adukacyi, što i biełyja vučni».
U škole Kiendał adrazu ž źjaviŭsia kłas, dzie ciemnaskuryja hłuchija dzieci mahli vučycca, adnak ich adukacyja była bolš prafiesijnaj, a nie akademičnaj, što rabiła ich pastupleńnie ŭ kaledž składaniejšym. Ale niahledziačy na stvareńnie, a potym i abjadnańnia kłasaŭ dla ciemnaskurych, da hetych dziaciej usio adno stavilisia inakš, a ŭ kancy navučańnia prosta nie vydali im dypłomaŭ ab skančeńni škoły i atrymańni siaredniaj adukacyi.
Ciapier, praź siemdziesiat hadoŭ, tyja vučni ci ich naščadki narešcie atrymajuć atestaty. Cyrymoniju praviadzie kiraŭnictva škoły i ŭniviersiteta.
Mierapryjemstva źjaŭlajecca važnaj častkaj pryznańnia ŭstanovaj adukacyi adkaznaści za minułyja rasavyja i adukacyjnyja niespraviadlivaści, zajaviła Keralin Makaskił, prafiesarka Haładeckaha Univiersiteta i zasnavalnica školnaha Centra daśledavańniaŭ ciemnaskurych hłuchich ludziej.
Praŭda, tych ciemnaskurych hłuchich dziaciej, jakija tady byli vučniami toj škoły, zastałosia vielmi niašmat i im užo za 80 hadoŭ. Za tych, što pamierli i tak i nie dačakalisia dypłoma ab skančeńni siaredniaj škoły, dakumienty ab adukacyi atrymajuć svajaki.
Vopyt hetych 24 čarnaskurych hłuchich vučniaŭ, jakija naviedvali škołu Kiendał na pačatku 1950-ch hadoŭ, — heta tolki małaja častka historyi rasavaj siehrehacyi, padahulniaje CNN.
Jaŭhien Bury z ABBA raskazaŭ, kolki jaho biznes-asacyjacyja atrymała ad Jeŭrasajuza i na što patraciła11
Kamientary