Цемнаскурыя глухія дзеці, якія наведвалі сегрэгаваную школу ЗША ў 1950-х гадах, нарэшце атрымаюць свае атэстаты
На пачатку 1950-х гадоў у школе на тэрыторыі ўніверсітэта Галадэт у Вашынгтоне працаваў спецыяльны клас для цемнаскурых глухіх вучняў. Аднак па сканчэнні школы атэстатаў аб сярэдняй адукацыі дзеці так і не атрымалі. Усё змянілася пасля таго, як школа нядаўна пагадзілася праз столькі часу правесці афіцыйную ўрачыстую цырымонію ўручэння дыпломаў, піша агенцтва CNN.
Школа Кендал у тыя часы была адзінай у Вашынгтоне, якая магла даць адукацыю глухім дзецям, але цемнаскурым не дазвалялі вучыцца разам з белымі дзецьмі і таму яны былі вымушаныя шукаць сабе новае месца ў іншых гарадах. У 1952 годзе бацькі некалькіх цемнаскурых дзяцей падалі калектыўны пазоў у суд супраць Рады па адукацыі акругі Калумбія. Яны намагаліся дабіцца адкрыцця спецыяльнага класа для глухіх цемнаскурых дзяцей.
Справа была выйграная, акруговы суд ЗША па акрузе Калумбія тады заявіў, што «чорныя глухія студэнты не могуць быць адпраўленыя за межы штата альбо акругі для атрымання той жа адукацыі, што і белыя вучні».
У школе Кендал адразу ж з’явіўся клас, дзе цемнаскурыя глухія дзеці маглі вучыцца, аднак іх адукацыя была больш прафесійнай, а не акадэмічнай, што рабіла іх паступленне ў каледж складанейшым. Але нягледзячы на стварэнне, а потым і аб’яднання класаў для цемнаскурых, да гэтых дзяцей усё адно ставіліся інакш, а ў канцы навучання проста не выдалі ім дыпломаў аб сканчэнні школы і атрыманні сярэдняй адукацыі.
Цяпер, праз семдзесят гадоў, тыя вучні ці іх нашчадкі нарэшце атрымаюць атэстаты. Цырымонію правядзе кіраўніцтва школы і ўніверсітэта.
Мерапрыемства з'яўляецца важнай часткай прызнання ўстановай адукацыі адказнасці за мінулыя расавыя і адукацыйныя несправядлівасці, заявіла Кэралін Макаскіл, прафесарка Галадэцкага Універсітэта і заснавальніца школьнага Цэнтра даследаванняў цемнаскурых глухіх людзей.
Праўда, тых цемнаскурых глухіх дзяцей, якія тады былі вучнямі той школы, засталося вельмі няшмат і ім ужо за 80 гадоў. За тых, што памерлі і так і не дачакаліся дыплома аб сканчэнні сярэдняй школы, дакументы аб адукацыі атрымаюць сваякі.
Вопыт гэтых 24 чарнаскурых глухіх вучняў, якія наведвалі школу Кендал на пачатку 1950-х гадоў, — гэта толькі малая частка гісторыі расавай сегрэгацыі, падагульняе CNN.
Дзевяць чалавек памерлі ў Брэсце і Мінску — усім ім уводзілі адныя і тыя ж лекі. У прэпараце знайшлі бактэрыі5
Каментары