Napłyŭ turystaŭ — kvatery ŭ centry Hrodna zdajuć i pa 100 dalaraŭ za sutki. «Z takimi cenami kvateru možna adbić za niekalki hadoŭ»
Składanaści z atrymańniem vizy padšturchoŭvajuć biełarusaŭ i rasijan padarožničać pa Biełarusi. Adzin z samych papularnych kirunkaŭ — Hrodna, dzie vialiki popyt uźvinciŭ ceny na pasutačnuju arendu žytła. Turysty skardziacca na vysokija ceny, a miascovyja žychary bačać u hetym vyhadnuju nišu dla inviestycyj. Pacikavilisia, što z cenami i jak chutka možna adbić kvateru, kali zdavać jaje na sutki.
Napłyŭ turystaŭ upłyvaje na ceny
Pavieličeńnie turystyčnaha patoku ź inšych haradoŭ Biełarusi i Rasii za apošnija dva hady mocna paŭpłyvała na staŭki pasutačnaj arendy žytła ŭ Hrodnie, asabliva ŭ centry horada.
Kali nie brać pad uvahu kvatery, dzie apošni raz kapitalny ramont rabili jašče «pry tych savietach», to ceny za noč na vychadnych startujuć sa 120—140 rubloŭ za 1—2 asoby. Stolki prosiać za adnapakajoŭki ŭ spalnych rajonach horada.
U pracoŭnyja dni ceny značna nižejšyja. U «spalnikach» arandavać adnapakajoŭku z hodnym ramontam na sutki možna za 80—100 rubloŭ.
Jak patłumačyŭ uładalnik kvatery ŭ adnym z addalenych ad centra rajonaŭ horada, u budnyja dni čaściej za ŭsio zasialajucca kamandzirovačnyja, a ŭ vychadnyja — turysty.
«Ad taho, što ceny na arendu žytła ŭ centry vielmi vysokija, častka turystaŭ vymušanaja raźmiaščacca ŭ spalnych rajonach. Pryčym navat u samych addalenych, dzie da centra realna daloka. Ale roźnica ŭ 100—150 rubloŭ za sutki pražyvańnia dla mnohich istotnaja, tamu turysty i spyniajucca ŭ «spalnikach», — kaža surazmoŭca.
Achvotnym pasialicca na vychadnych u centry horada daviadziecca raźličvać na canu ad 160 rubloŭ za noč.
Mnohija haspadary zdajuć kvateru minimum na dźvie nočy. Adzin z samych tannych varyjantaŭ, jaki možna adšukać na «Kufry» (servis zamianiŭ biełarusam Booking), — 200 rubloŭ za dva vychadnyja dni. I heta jašče vielmi tanna za dźvie nočy.
Dalej ceny jašče vyšejšyja. Za adnapakajovuju kvateru pa vulicy Kirava daviadziecca zapłacić 320 rubloŭ za dźvie nočy. Na mienšy pieryjad kvatera nie zdajecca.
Dvuchpakajoŭka ŭ samym centry horada ź vidam na dramatyčny teatr i inšyja słavutaści prapanujecca za 140 rubloŭ z paniadziełka pa čaćvier i za 160 — u subotu i niadzielu. Ale źniać kvateru tolki na adzin vychadny dzień nielha. Daviadziecca arandavać minimum na dźvie nočy. A kali vy chočacie zajechać u piatnicu, to adrazu na try.
Haspadary, hatovyja zdavać kvatery tolki na adzin vychadny dzień, padymajuć canu da 175—200 rubloŭ za noč z suboty na niadzielu.
Chapaje i bolš darahich varyjantaŭ. Tak, adnapakajoŭka ŭ centry zdajecca za 140 rubloŭ u budnyja dni. Na vychadnyja ceny ŭzrastajuć udvaja. Za noč z suboty na niadzielu prosiać 300 rubloŭ. Na dva vychadnyja dni kvateru hatovyja zdać za 425 rubloŭ.
Kali nie pakłapacicca pra broń zahadzia, to znajści kvateru ŭ centry Hrodna na vychadnyja budzie składana. Užo ŭ čaćvier, 27 lipienia, amal usie kvatery, vystaŭlenyja na «Kufry», na vychadnyja zaniatyja. Svabodnyja tolki niekalki varyjantaŭ pa 250—300 rubloŭ za noč abo pa 340 rubloŭ za dźvie nočy.
Haradžanie zadavolenyja takimi cenami
Haradziency, jakija zajmajucca zdačaj kvater na sutki, zadavolenyja tym, što kvatery zdajucca pa vysokich staŭkach. Čałaviek, jaki pasutačna zdaje dźvie kvatery ŭ abłasnym centry, raskazaŭ «Našaj Nivie», što ŭ siarednim kožnaja ź ich zaniataja nie mienš jak 20 sutak na miesiac.
«Navat u samy kiepski miesiac sa zdačy dźviuch kvater čystymi vychodzić nie mienš za 1000 dalaraŭ», — pryznajecca surazmoŭca.
Adna z kvater haradžanina znachodzicca ŭ spalnym rajonie, a druhaja — kala histaryčnaha centra. U pieršaj, pa słovach surazmoŭcy, čaściej spyniajucca tyja, chto pryjechaŭ u kamandziroŭku.
«Byvaje, što zdymajuć adrazu na tydzień-dva. Naturalna, što davodzicca rabić źnižku, ale zatoje hałava spakojnaja. Taja, što pobač z centram, bolš cikavić turystaŭ, bo da staroha horada chvilin 10 pieššu. U ciopły siezon na vychadnyja kvatera zaŭždy zasielenaja turystami. Na piku za noč atrymlivajecca brać pa 200—250 rubloŭ».
Inšy surazmoŭca, jaki znachodzicca ŭ pošukach druhoj kvatery, pryznajecca, što bačyć dobruju pierśpiektyvu ŭ takim sposabie atrymańnia dadatkovaha zarobku.
«Ciapier u nas jość kvatera ŭ adnym sa spalnych rajonaŭ horada, jana davoli dobra zdajecca, u tym liku i turystam. Choć praz addalenaść da centra davodzicca brać nie bolš za 130—150 rubloŭ za sutki. U centry ceny zusim inšyja, tamu šukajem kvateru ŭ histaryčnaj častcy horada.
Pa maich padlikach, kvatera ŭ centry ź siońniašnimi cenami musić całkam akupicca za čatyry, maksimum piać hadoŭ. Heta vielmi dobraja inviestycyja, bo času adbiraje niašmat, a prybytak hodny», — adznačaje surazmoŭca.
Dla daviedki: adnapakajovyja kvatery ŭ centralnaj častcy horada prapanujucca pa cenach ad 30 da 45 tysiač dalaraŭ u zaležnaści ad raźmiaščeńnia i ramontu. Tamu prahnozy miascovych žycharoŭ, jakija zdajuć kvatery pasutačna, vyhladajuć całkam abhruntavanymi.
Čytajcie taksama:
U Jeŭropu bieź vizy i čerhaŭ na miažy. Što pahladzieć u Hrodnie i rajonie
Pałacava-parkavy kompleks «Vialiki Śviack Vałovičaŭ», što pa darozie z Hrodna na Aŭhustoŭski kanał, pačaŭ prymać haściej
Kamientary