Fihuranta «spravy Cichanoŭskaha» Uładzimira Knihu asudzili jašče da hoda kałonii
U sudzie Žodzina 25 lipienia palitźniavolenaha Uładzimira Knihu asudzili pavodle art. 411 KK (złosnaje niepadparadkavańnie zakonnym patrabavańniam administracyi turmy). Raniej palitviaźniu ŭzmacnili pakarańnie i pieraviali z barysaŭskaj kałonii na turemny režym u Žodzina, dzie minimum čatyry miesiacy ŭtrymlivali ŭ ŠIZA, paviedamlajuć pravaabaroncy.
Uładzimir Kniha — były siłavik, vałancior kamandy Śviatłany Cichanoŭskaj. Jon žanaty, maje dvaich niepaŭnaletnich dziaciej. Uładzimira zatrymali 4 červienia 2020 hoda paśla pikietu Śviatłany Cichanoŭskaj u Hrodnie. Raniej Kniha słužyŭ u milicyi, u patrulna-pastavoj słužbie śpiecyjalnaha pryznačeńnia, ale nie ŭ AMAPie. U 2012 hodzie jaho asudzili za pieravyšeńnie ŭłady. Praz dva hady jon vyzvaliŭsia. Apošnim časam pracavaŭ kiroŭcam śmiećciavoza.
Jaho abvinavacili ŭ aktyŭnym udziele ŭ dziejańniach, jakija hruba parušajuć hramadski paradak 29 maja ŭ Hrodnie (č.1 art. 342 KK), a taksama ŭ hvałtoŭnych dziejańniach u dačynieńni da milicyjantaŭ (art. 364 KK).
U Hrodnie 2 červienia 2021 hoda paśla doŭhaha sudovaha pracesu Uładzimiru prysudzili 4 hady kałonii va ŭmovach strohaha režymu. Termin jaho nakiravali adbyvać u barysaŭskuju kałoniju № 14, dzie nieadnarazova źmiaščali ŭ štrafny izalatar. Praz šmatlikija «parušeńni» praviłaŭ unutranaha rasparadku (PUR) palitviaźniu ŭzmacnili režym i pieraviali na turemny režym u Žodzina. Viadoma, što tam jaho taksama bolš za čatyry miesiacy ŭtrymlivali ŭ ŠIZA.
Paźniej ź inicyjatyvy administracyi žodzinskaj turmy suprać Knihi zaviali kryminalnuju spravu pavodle art. 411 KK (złosnaje niepadparadkavańnie zakonnym patrabavańniam administracyi kałonii).
U Žodzinie 29 červienia nad im raspačaŭsia sud. Spravu razhladaŭ sudździa Ivan Hrynkievič — jon ža niadaŭna asudziŭ pavodle hetaha artykuła i Siarhieja Cichanoŭskaha.
25 lipienia Uładzimiru ahučyli prysud — pryznačyć jašče adzin hod źniavoleńnia ŭ dadatak da čatyroch hadoŭ kałonii.
Kamientary