«Hrantasosy kupajucca va ŭzajemnym kryvaduššy». Capkała aplavaŭ marafon salidarnaści
Marafon salidarnaści z palitviaźniami «Nam nie ŭsio adno» sabraŭ 574 tysiačy jeŭra. Nie ŭsie paličyli heta pośpiecham. Były kiraŭnik PVT i pretendent na prezidenctva Valeryj Capkała adreahavaŭ sieryjaj krytyčnych dopisaŭ.
Zbor srodkaŭ na akazańnie dapamohi palitviaźniam — kryvadušnaść, napisaŭ Capkała ŭ svaim telehram-kanale. Ën vystupaje za bolš radykalnyja dziejańni.
«Kryvadušnaść — pryciahvać da siabie ŭvahu, vykarystoŭvajučy trahiedyju siemjaŭ zakładnikaŭ režymu, ale ihnaravać nieabchodnaść vydačy ordara na aryšt Łukašenki», — napisaŭ były pamočnik Alaksandra Łukašenki.
Valeryj Capkała nie škaduje hadkich słoŭ u adras arhanizataraŭ i ŭdzielnikaŭ marafonu: «Usie palitviaźni pamianiali b hetyja 200 dalaraŭ na volu abo na vas, kryvadušnikaŭ i padluhaŭ, zamiest siabie za kratami».
Pieršy svoj dopis Valeryj Capkała prailustravaŭ fotazdymkam Śviatłany Cichanoŭskaj z kiraŭnikom fondu «Bajsoł» Andrejem Stryžakom, u adnym z vuhłoŭ jakoha źmieščana fota Siarhieja Cichanoŭskaha.
U dopisie palityk nie kankretyzuje, jak vydača ordara na aryšt Łukašenki dapamoža palitviaźniam i ich siemjam. Varta adznačyć, što Mižnarodny kryminalny sud vydaŭ ordar na aryšt Uładzimira Pucina za vyvaz ukrainskich dziaciej z akupavanych terytoryj poŭdnia Ukrainy.
«Naša Niva» vysłała Valeryju Capkału pytańni, čamu jaho aburyŭ marafon salidarnaści i što jon prapanuje dziela vyzvaleńnia palitviaźniaŭ. Na momant publikacyi artykuła adkazu ad palityka pakul nie było.
Valeryj Capkała pierajšoŭ u apazicyju da Alaksandra Łukašenki ŭ 2020 hodzie. Da taho jon pracavaŭ jahonym pamočnikam, a paśla kiraŭnikom Parka vysokich technałohij. Capkała sabraŭ nieabchodnuju kolkaść podpisaŭ, kab stać kandydatam u prezidenty, ale jaho, jak i Viktara Babaryku, nie zarehistravali. Paśla hetaha jahonaja žonka Vieranika Capkała adyhrała, razam sa Śviatłanaj Cichanoŭskaj i Maryjaj Kaleśnikavaj, vyklučnuju rolu ŭ mabilizacyi hramadstva na vybary 2020 hoda.
Adčuvajučy niebiaśpieku, Vieranika pakinuła krainu napiaredadni dnia hałasavańnia. Paśla hetaha jany z Valeryjem žyvuć za miažoju. Pad kaniec 2020 hoda Capkała pačaŭ šukać asobnych šlachoŭ-daroh. Ën uvajšoŭ u kaalicyju z Volhaj Karač i šeraham inšych dziejačaŭ druhoha płana.
Zajavy Capkały adnosna marafonu vyklikali niamała krytyčnych zaŭvah u sacyjalnych sietkach, dzie vynik marafonu vyklikaŭ zbolšaha zachapleńnie: ludzi nie čakali takoha vializnaha zboru.
«Pačałosia… paleźli čerci z usich bakoŭ… Dva razy pieračytali płyń dumak Capkały, aformleny ŭ post, tak ničoha i nie zrazumieli», — adznačajecca ŭ kamientary na navinnym kanale biełarusaŭ Litvy Razam.
U samim telehram-kanale Valeryja Capkały dopis taksama sabraŭ emacyjnyja kamientary.
«Biedny Valeryj. Vy taki nikčemny», — havorycca ŭ pieršym.
«Valeryj praciahvaje prabivać dno, — havorycca ŭ jašče adnym. — Kvaternaje pytańnie sapsavała maskvičoŭ, a prahnaść, praźmiernaje eha i, niama čaho hrachu taić, prostaja čałaviečaja duraść zahubili Valeryja», — havorycca ŭ inšym.
«Hetym pastom vy kančatkova siabie pachavali jak palityka, nazaŭždy!» — kateharyčna zajaŭlaje treci kamientatar.
«Pry ŭsim razumieńni taho, što roznyja hrupy ludziej pahardžajuć adna adnoj, treba pryznać, što sposabu vyzvaleńnia asudžanych pa peŭnych artykułach pakul nichto nie prydumaŭ», — havorycca ŭ inšym dopisie.
Aŭtary niekatorych kamientaroŭ ličać, što prostaja dapamoha viaźniam — heta niedastatkova radykalna.
«Za 200 miljonaŭ možna było vojska naniać i chacia b pasprabavać, ale imprezy — heta viesieła i biaśpiečna», — prapanuje adzin ź ich.
Anłajn-marafon «Nam nie ŭsio adno!» pravodziŭsia ź inicyjatyvy pradstaŭnicy Abjadnanaha pierachodnaha kabinieta pa sacyjalnych pytańniach Volhi Harbunovaj pry družnaj padtrymcy niezaležnych ŚMI i pravaabarončych supołak, kab sabrać hrošy dla palitviaźniaŭ i ich siemjaŭ. Za dva dni marafonu było achviaravana 574 356 jeŭra.
«Hety marafon znoŭ daŭ vieru ŭ toje, što my, biełarusy, zdolnyja abjadnacca», — zajaviła lidarka biełaruskich demakratyčnych sił Śviatłana Cichanoŭskaja pa zaviaršeńni zboru.
«My zdolnyja dapamahać adno adnamu, dzie b my ni znachodzilisia, — adznačyła jana. — Razam my znoŭ pakazali ŭsiamu śvietu, što nam nie ŭsio adno na losy tych, chto ciapier znachodzicca ŭ zakładnikach režymu».
Sabranyja hrošy naziralnaja rada na čale z pradstaŭnicaj Abjadnanaha pierachodnaha kabinieta Volhaj Harbunovaj maje raźmierkavać pamiž 13-ciu inicyjatyvami i fondami, jakija zajmajucca akazańniem padtrymki palitźniavolenym. Jany, u svaju čarhu, buduć adpraŭlać hrošy represavanym pa niabačnych kapilarach sistemy dapamohi.
«Naša Niva» — bastyjon biełaruščyny
PADTRYMAĆHladzicie taksama:
Vadzim Prakopjeŭ pradstaviŭ svoj płan vyzvaleńnia palitviaźniaŭ
Jak schavać, što ty danaciŭ praz fejsbuk? Valeryj Capkała i Andrej Stryžak majuć roznyja mierkavańni
Kamientary