Vyśvietliłasia, što «Bajsoła» taksama dva. Stryžak patłumačyŭ, čamu i kali heta adbyłosia
Andrej Stryžak dniami paviedamiŭ, što «Bajsoł» jašče dva hady tamu padzialiŭsia na dźvie asobnyja arhanizacyi. «Naša Niva» pacikaviłasia, čamu tak adbyłosia i jak heta paŭpłyvała na pracu fondu.
Ad imia «Bajsoł» raniej pracavali dźvie jurydyčnyja asoby — u Niderłandach i Litvie. Andrej Stryžak tłumačyć, što adkryć jurasobu ŭ Niderłandach było praściej i chutčej. Tamu pieršapačatkova fond zapracavaŭ pad jurysdykcyjaj hetaj krainy.
«Pieršaja jurydyčnaja asoba była zarehistravanaja vielmi chutka — adrazu paśla pačatku pracy ŭ žniŭni 2020. Hałandskaje zakanadaŭstva najbolš pasavała dla chutkaha adkryćcia arhanizacyi. Druhaja jurydyčnaja asoba, jakuju adkryli ŭžo ŭ Litvie, zapracavała bližej da śniežnia 2020 hoda», — kaža Andrej Stryžak.
Źjaŭleńnie druhoj arhanizacyi Stryžak tłumačyć tym, što amal usia kamanda znachodziłasia na toj momant u Litvie.
Praz hod paśla vybaraŭ, u žniŭni 2021 hoda, u arhanizacyi adbyŭsia raskoł. Andrej Stryžak zastaŭsia kiraŭnikom litoŭskaha kryła «Bajsoł» (LPF Bysol), a niderłandskaja častka fondu ciapier pad kiraŭnictvam suzasnavalnika «Bajsoł» Jarasłava Lichačeŭskaha.
Raskoł u arhanizacyi, jaki adbyŭsia amal dva hady tamu, Stryžak tłumačyć tak:
«Roznaść pohladaŭ u raźvićci arhanizacyi i niemahčymaść ich spałučeńnia ŭ adnoj struktury pryviali da taho, što było pryniata sumiesnaje rašeńnie pra toje, što Jarasłaŭ pojdzie ŭ asobnuju strukturu. U vyniku ŭ litoŭskaj arhanizacyi zastalisia ja i kamanda fondu, my praciahnuli budavać «Bajsoł», u hałandskaj Jarasłaŭ pačaŭ budavać svoj asobny pracoŭny trek», — tłumačyć Stryžak.
Pa jahonych słovach, usio, što ciapier jość u infapoli pad imiem «Bajsoł», — heta praca litoŭskaj arhanizacyi pad jahonym kiraŭnictvam.
Fond, jakim kiruje Jarasłaŭ Lichačeŭski, maje nazvu Stichting Belarusian Solidarity Foundation. Sajt fondu — sbsf.fund. Da pracy hetaj jurydyčnaj asoby Stryžak, pa jaho słovach, nie maje dačynieńnia sa žniŭnia 2021-ha, jak i Lichačeŭski — da pracy LPF Bysol.
Kiraŭnik «Bajsoł» kaža, što raniej jany nie afišavali fakt adychodu Jarasłava, bo jon nijak nie ŭpłyvaŭ na ich prahramy i vykanańnie abaviazkaŭ pierad zajaŭnikami. Taksama, pa słovach Stryžaka, padzieł i adychod Lichačeŭskaha ŭ asobnuju arhanizacyju nie ŭpłyvaŭ na pracu z partniorami i donarami.
«Razumiejučy toje, što lubaja navina takoha kštałtu, jak adychod, pierafarmavańnie i h. d., aŭtamatyčna ŭsprymajecca častkaj hramadstva jak padstava dla sraču, było pryniataje rašeńnie nie davać čarhovaj nahody dla šytstormu», — kaža Andrej Stryžak.
«Sajt bysol.org i danat praź jaho — heta danat u arhanizacyju pad maim kiraŭnictvam.
Na siońnia taki danat mahčymy z bankaŭskaj karty, u tym liku z vykarystańniem technałohij Google Pay i Apple Pay, a taksama praz PayPal. Na padychodzie mahčymaść zručnaha i bolš biaśpiečnaha danatu praz kryptavaluty, bo pieraśled našych donaraŭ minskim režymam mocna skaračaje mahčymaści achviaravańniaŭ nam ź Biełarusi. I my ŭvieś čas padkreślivajem niebiaśpieku pry danacie praz «Bajsoł» ź biełaruskich i rasijskich płaciežnych instrumientaŭ», — kaža Stryžak.
«Bajsoł» ciapier pracuje pa nastupnych kirunkach:
— piersanalnyja zbory;
— padtrymka palitviaźniaŭ i byłych palitviaźniaŭ;
— padtrymka łakalnych inicyjatyŭ;
— padtrymka biełaruskich dobraachvotnikaŭ i vieteranaŭ;
— słužba evakuacyi i adaptacyi.
«Pracu hetych kirunkaŭ zabiaśpiečvajuć dapamožnyja hrupy i adździeły: IT-adździeł, jurydyčnaja, buchhałtarskaja, administratyŭnaja, kamunikacyjnaja hrupy i haračaja linija», — kaža kiraŭnik «Bajsoł».
A što, kali kamuści ŭ fejsbuku trapicca staraja spasyłka na zbor ad imia niderłandskaj jurasoby, kali taja jašče była ŭ składzie «Bajsoł», i čałaviek tudy pieraličyć hrošy? Što budzie sa srodkami — ich prymuć, na što skirujuć? I ci pieradadzienaja na dapamohu paciarpiełym suma, sabranaja niderłandskaj arhanizacyjaj raniej?
Stryžak zaŭvažaje, što nie viedaje, jakim čynam ciapier pracuje Stichting Belarusian Solidarity Foundation, bo jon nie maje da jaho dačynieńnia.
Jarasłaŭ Lichačeŭski na zapyt «Našaj Nivie» pa kamientary nie adkazaŭ.
Što tyčycca niepasredna LPF Bysol, to ad jaho imia vystupać maje prava Andrej Stryžak, a taksama asoby, jakija majuć paŭnamoctvy na aficyjnuju kamunikacyju ad imia fondu.
«Jarasłaŭ Lichačeŭski ŭ pieralik hetych asob nie ŭvachodzić, ale, biezumoŭna, moža adkazvać na pytańni, jakija datyčnyja jahonaha byćcia ŭ składzie fondu «Bajsoł» (da žniŭnia 2021 hoda)», — padkreślivaje Stryžak.
«Naša Niva» — bastyjon biełaruščyny
PADTRYMAĆ
«Moj kachany nie čytaje naviny, kali jany napisanyja pa-biełarusku». Darja Caryk stała na abaronu ruskaj movy i pryplała navat Paźniaka48
Kamientary