«Usie prakładačnyja vysierki». Raskryli, chto viadzie adzin z samych brudnych kanałaŭ łukašysckaj prapahandy
Bolšaja častka kantentu ŭ kanale Berezina pryśviečanaja prynižeńniu ŭkraincaŭ i tych biełarusaŭ, jakija vystupajuć suprać prarasijskaha režymu. «Naša Niva» zdoleła vykryć dvuch ludziej, jakija stajać za hetym redkasna ahidnym resursam.
Vyśvietlić ich asoby dapamahli boty, jakija zachoŭvajuć źviazki telehram-akaŭntaŭ i numaroŭ, a taksama infarmacyja, jakuju my atrymali ad «Kibierpartyzanaŭ».
Što saboj ujaŭlaje telehram-kanał Berezina
Telehram-kanał Berezina nievialiki, jak i ŭsie łukašysckija, na 5 tysiačaŭ padpisantaŭ, ale źjaŭlajecca adnym z najbolš ahresiŭnych. Jon zasnavany ŭ žniŭni 2020-ha i spačatku prosta publikavaŭ roznyja naviny. Čytanaść jaho była nievialikaja, na pieršych publikacyjach dahetul pa 10-15 prahladaŭ. Naprykancy 2020-ha prahladać dopisy stali sotni.
Ale ŭ niejki momant administracyja kanała, vidać, vyrašyła dadać «ahieńčyku». Na kanale pačali ŭžyvać ahresiŭnuju i prynižalnuju leksiku.
A z pačatkam vajny kanał pieraklučyŭsia na prarasijskuju prapahandu i pačaŭ raspalvać varožaść jašče i da ŭkraincaŭ. Pa kolkaści i ŭzroŭni ahresii kanał moža dać foru šmat jakim inšym praŭładnym resursam
Administratary rehularna publikujuć videa z «palityčnymi» zatrymanymi, hłumiacca z palitviaźniaŭ, radujucca parazam ukrainskaj armii i śmiarciam ukraincaŭ.
Mahčyma, kanałam zajmajucca bolš jak dva čałavieki, ale my dakładna vyznačyli asoby dvaich.
Ad hatela da prapahandy
Adzin z aŭtaraŭ kanała — Raman Kašyryn. Jak i ŭ vypadku z Ramanam Rolem, jakija viadzie kanał «Žoŭtyja Źlivy. Adukacyja», vyśvietlić jaho asobu ŭdałosia dziakujučy telehram-čatam — ahrehataram. Jahony telehram-akaŭnt (@roman_brz7) pijaryŭ «Biarezinu» ad momantu stvareńnia da kanca krasavika 2021-ha. Paśla hetaha ŭ čatach źjaviŭsia akaŭnt ź juziernejmam arhivarius_brz, jaki pačaŭ rabić toje samaje.
Ramanu Kašyrynu 31 hod. Rodam jon z Babrujska — adsiul, imavierna, i nazva jahonaha kanału (horad staić na race Biarezinie). Maje vyšejšuju adukacyju.
Viadomyja niekalki miescaŭ jahonaj pracy. U 2012-m jon pracavaŭ na AAT «Ałavies», jakoje trymała niekalki baraŭ i kłubaŭ u Minsku, u tym liku słavuty «Dazary», «Machita» na Cimirazieva i sušy-bar «Kajten» kala płoščy Jakuba Kołasa. Imavierna, jon byŭ zvyčajnym pracaŭnikom bara. Da 2014-ha jon pierajšoŭ na pracu ŭ minski «Reniesans Hatel». Prapracavaŭ niejki čas i ŭ hateli «Jeŭropa», jaki znachodzicca ŭ samym centry Minska. Nahadajem, što ŭ darahich hatelach stalicy, dzie sielacca zamiežniki, štat u značnaj doli ŭkamplektavany supracoŭnikami i ahientami śpiecsłužbaŭ.
Paźniej Raman adkryŭ IP, asnoŭnaj śfieraj dziejnaściu jakoha byŭ «Roźničny handal pa ŭzorach». Zvyčajna ŭ Biełarusi za takim apisańniem stajać internet-kramy. U 2015-m jon raźmiaščaŭ abjavu ŭ adnu z hrup Homiela:
«Treba terminova zaraz razdać 250—300 ulotak. Košt pytańnia 30 000. Pracy na paŭhadziny».
U studzieni 2017-ha mužčyna pijaryŭ hrupu ŭ sacyjalnaj sietcy «Ukantakcie», jakaja nazyvałasia «Praca ŭ Minsku: hramadskaje charčavańnie». Z krasavika 2017-ha Raman adkryvaje IP, asnoŭnaj śfieraj dziejnaści jakoha zajaŭlenaja «Dziejnaść pa stvareńni rekłamy».
U kancy 2018-ha Kašyryn pastupiŭ na zavočnuju mahistraturu ŭ Biełaruski handlova-ekanamičny ŭniviersitet spažyvieckaj kaapieracyi, jaki znachodzicca ŭ Homieli. Śpiecyjalnaść — «Suśvietnaja ekanomika».
U 2020-m Kašyryn pačaŭ uvachodzić u roznyja praŭładnyja čaty i pijaryć kanał Berezina.
Na miažy 2021 i 2022 hadoŭ mužčyna staŭ vieści sieminary dla dziaržaŭnych orhanaŭ. Ciapier jaho pradstaŭlajuć jak «miedyjaekśpierta ZAT «Notamiedyja». Heta pijar-ahienstva, jakoje da žniŭnia 2020-ha było niezaležnym i pracavała ŭ tym liku ź dziaržaŭnymi arhanizacyjami.
«U aktyŭnuju dyskusiju ab vykarystańni fejkaŭ u mietadałohii kahnityŭnaj vajny aŭdytoryju ŭciahnuŭ miedyjaekśpiert Raman Kašyryn. Zachoplenyja sprečki, razbor ukidaŭ fejkaŭ i nastupstvaŭ ad ich upłyvu nie pakinuli abyjakavym nivodnaha słuchača kursaŭ, a dyskusii na hetuju temu praciahvalisia jašče doŭha paśla zakančeńnia sustrečy», — tak apisvajuć sens adnaho z vystupaŭ praŭładnyja resursy.
Praŭda, nie da kanca jasna, jakim čynam jon vučyć abaraniacca ad fejkaŭ, kali Berezina pieryjadyčna stvaraje ich. Naprykład, spasyłajecca na fejkavy kanał 35-j bryhady, pra jaki my pisali raniej.
Beeresemaviec z «Chimvałakna»
Jašče adzin z kiraŭnikoŭ kanała — administratar čata supołki, 34-hadovy Anton Simanovič, jaki karystajecca niknejmam «Handlar bajanami». Mužčyna naradziŭsia ŭ Mahilovie. Vučyŭsia spačatku ŭ miascovaj 30-j škole, a paśla pastupiŭ u Licej Biełaruska-rasijskaha ŭniviersiteta. U 2008-m Anton pastupiŭ u Biełaruski dziaržaŭny ekanamičny ŭniviersitet.
Kali vieryć źviestkam ad «Kibierpartyzanaŭ», pa raźmierkavańni mužčyna pajšoŭ na pracu ekanamistam u «Mahiloŭchimvałakno». Prykładna ŭ hety ž čas va Ukrainie zdaryłasia Revalucyja hodnaści. I, miarkujučy pa kamientarach Antona, jon zaniaŭ adkryta prarasijskuju i antyŭkrainskuju pazicyju.
U kamientarach jon pastajanna skardziŭsia na małuju zarpłatu i vučyŭ ukraincaŭ žyćciu, pahražajučy Pucinym, jaki «źmiacie Ukrainu za 2-3 dni». A taksama pryznaŭsia, što raniej navat spačuvaŭ pratestam.
Paralelna Simanovič uvajšoŭ u jačejku BRSM na «Chimvałaknie».
Paśla 2020-ha jon uspłyŭ u roznych praŭładnych čatach, pryčym ź vielmi ahresiŭnymi kamientarami. Biełaruskuju movu jon nazyvaje «sutułasabačaj», biełaruskich patryjotaŭ — «lićvinśvińniami», a biełaruski ściah — «prakładkaj». Ukraincaŭ ža jon pieryjadyčna nazyvaje «čubatymi».
U jaki mienavita momant jon staŭ administrataram čata kanała «Bierazina», nieviadoma, jak i toje, ci piša jon dla kanała. Ale heta całkam imavierna, bo tam vykarystoŭvajecca padobnaja leksika («čubatyja», «prakładka» i h. d.).
Ci moža padpadać źmiest kanała Berezina pad normy artykułaŭ Kryminalnaha kodeksa ab raspalvańni varožaści? My spytali pra heta ŭ jurydyčnaj słužby pravaabarončaha centra «Viasna».
«Analiz pastoŭ telehram-kanała «Berezina» dazvalaje zrabić vysnovu, što skazanaje maje na mecie akazać aktyŭnaje ŭzdiejańnie na peŭnuju častku hramadstva, nakiravanaha na:
— uzbudžeńnie nianaviści, h. zn. mocnaj ustojlivaj niepryjaznaści da hrupy asobaŭ ź inšymi palityčnymi pohladami i tych, chto vymušana źjechaŭ za miežy Biełarusi,
— uzbudžeńnie varožaści, h.zn. nianaviści pamiž hrupami ludziej (tymi, chto padtrymlivaje dziejnuju ŭładu i jaje praciŭnikaŭ),
— prynižeńnie hodnaści hrupy asobaŭ ź inšymi palityčnymi pohladami i tych, chto vymušana źjechaŭ za miežy Biełarusi.
Jak bačna z pastoŭ telehram-kanała, jany nie tolki prynižajuć pradstaŭnikoŭ vyznačanaj sacyjalnaj hrupy … ale i raspaŭsiudžvajuć naŭmysna łžyvuju infarmacyju adnosna hetaj hrupy z metaj sparadzić niedavier da asobaŭ, što naležać da hetaj hrupy. Nazyvajučy ludziej ź inšymi palityčnymi pohladami … ludźmi, zdolnymi da ździajśnieńnia terarystyčnych aktaŭ, a taksama zaklikajučy hramadstva rabić danosy na pradstaŭnikaŭ hetaj hrupy, prapahandysty, takim čynam, pa-pieršaje, raspaŭsiudžvajuć iłžyvuju infarmacyju z metaj stvaryć niedavier i varožaje staŭleńnie da pradstaŭnikoŭ hetaj hrupy, i pa-druhoje, farmujuć niepryjaznaść, varožaść i pačućcio nianaviści da hetych ludziej», — miarkujuć jurysty.
«Naša Niva» — bastyjon biełaruščyny
PADTRYMAĆ«Heta pytańnie času, ale treba saśpieć». Pucin zahavaryŭ pra adziny parłamient i valutu Biełarusi i Rasii7
«Heta pytańnie času, ale treba saśpieć». Pucin zahavaryŭ pra adziny parłamient i valutu Biełarusi i Rasii
Biełaruskija biznesmieny śpiešna pradajuć doli ŭ svaich polskich transpartnych kampanijach. Što adbyvajecca?2
Kamientary