OZ vypuściŭ čarhovuju biełaruskuju nastolnuju hulniu — «Patłumač»
U Biełarusi vyjšła novaja nastołka na biełaruskaj movie. Kab vyjhrać u «Patłumač», treba chutka adhadvać peŭnyja słovy. Nastołku vypuściła kampanija OZ: «Možna papoŭnić svoj słoŭnikavy zapas i viesieła pravieści čas», paviedamlaje «Budźma».
«Patłumač» — heta viasiołaja nastolnaja hulnia z prostymi praviłami. U joj hulcy pa čarzie tłumačać adno adnamu słovy z kartak. Prosta začytvać ich niamožna, ale možna padbirać asacyjacyi, nazyvać prymietniki ci dziejasłovy, jakija dobra da ich pasujuć, i vykarystoŭvać lubyja inšyja padkazki. Razvažać treba chutka, bo na adkazy dajecca abmiežavany čas, i čym bolš słoŭ hulcy zmohuć adhadać — tym lepš.
«Hulnia daje šyroki prastor dla fantazii, i kab pieramahčy, treba dobra razumieć adzin adnaho. Lepš być aściarožnym, bo kožnaje tłumačeńnie moža być pastkaj dla astatnich. Ale śmiešnyja adkazy i dziŭnyja asacyjacyi — heta taksama viesieła», — paviedamlajuć u kampanii.
U hulni naličvajecca 1200 biełaruskich słoŭ, padzielenych na dźvie hrupy pa ŭzroŭni składanaści. Bolš prostyja — dla tych, chto nie vielmi daskanała viedaje biełaruskuju movu. Jany dobra padychodziać dla hulni ź dziećmi. A bolš składanyja i ŭnikalnyja słovy — dla amataraŭ movy. Možna taksama źmianiać uzrovień składanaści, abirajučy bolšy ci mienšy pramiežak času dla adhadvańnia słoŭ. Naprykład, treba chutka rastłumačyć takija słovy, jak «dzirka», «huzik», «spadčyna», «šaniec», «kiroŭca», «zmrok» i «zołak».
«Nastolnaja hulnia «Patłumač» — heta nie prosta zabaŭka, a nahoda pahutaryć pa-biełarusku i vabna pravieści čas ź siabrami i rodnymi. Takija hulni zaraz majuć vialiki pośpiech siarod pakupnikoŭ, bo sumiaščajuć hulniu z atrymańniem novych viedaŭ i raźvićciom navykaŭ. Taksama heta niezvyčajna viasiołaja hulnia. My ličym, što «Patłumač», jak i astatnija biełaruskija nastołki, stanie chitom u krainie», — adznačajuć u sietcy OZ.
U «Patłumač» mohuć hulać adnačasova ad 2 da 6 udzielnikaŭ. Rekamiendavany ŭzrost hulcoŭ — ad 14 hadoŭ, ale strohich abmiežavańniaŭ niama. Prykładnaja praciahłaść adnoj partyi — 15-30 chvilin.
Nastolnuju hulniu «Patłumač» možna nabyć u firmovych kramach sietki OZ u Minsku i 18 inšych haradach ci zamović jaje dastaŭku ŭ lubuju kropku Biełarusi. Košt — 39 rubloŭ.
Raniej sietka OZ vypuściła hulni «Mova. Cudoŭnaja» i «Tutejšyja», jakija stali chitami i dahetul karystajucca vialikaj papularnaściu.
Zdajuć u arendu katedž zahinułaha chakieista Cypłakova. Voś interjery FOTY1
Kamientary