Biełarusaŭ zmohuć čaściej pryzyvać na vajskovyja zbory, a adkazvać za ich budzie i KDB

Pravieračnyja zbory — da 60-ci dzion zamiest 35-ci

Zbory padzialajucca na niekalki katehoryj: 

— navučalnyja zbory prypisnoha składu;

— dziela padrychtoŭki vajennaabaviazanych vajskova-ŭlikovych śpiecyjalnaściaŭ;

— navučalnyja zbory pa absłuhoŭvańni techniki niedatykalnaha zapasu;

— zbory dziela pravierki mabilizacyjnaj hatoŭnaści vajskovych čaściej i inšych vajskovych farmiravańniaŭ (pravieračnyja zbory). 

Takaja hradacyja zastałasia i ciapier. Ale voś terminy ŭ niekatorych katehoryj źmianilisia.

Kali raniej pravieračnyja zbory byli da 35-ci dzion, to novaj pastanovaj ich praciahłaść pavialičvajecca da 60-ci dzion.

Niekatorych na zbory zmohuć vyklikać čaściej

U raniejšym dakumiencie dakładna prapisvałasia, kolki razoŭ na zbory jakoj praciahłaściu mohuć pryzyvacca vajennaabaviazanyja. U novaj pastanovie praciahłaść zboraŭ prybrali, pakinuŭšy kolkaść pryzyvaŭ.

Miarkujučy pa ŭsim, niekatorych vajennaabaviazanych, jakija nie majuć aficerskich zvańniaŭ, zmohuć pryzyvać na zbory za čas zapasu čaściej.

Tak, vajennaabaviazanyja, jakija nie majuć aficerskich zvańniaŭ, mohuć być pryzvanyja na vajennyja zbory za čas znachodžańnia ŭ zapasie:

— pieršaha razradu pieršaj katehoryi — da piaci razoŭ (raniej — da troch razoŭ praciahłaściu da dvuch miesiacaŭ kožny raz);

— pieršaha razradu druhoj katehoryi — da piaci razoŭ (raniej — da čatyroch razoŭ praciahłaściu da dvuch miesiacaŭ kožny raz);

— druhoha razradu — da troch razoŭ (raniej — da dvuch razoŭ praciahłaściu da dvuch miesiacaŭ kožny raz);

— treciaha razradu — adzin raz (raniej — adzin raz praciahłaściu da 35-ci dzion).

Źmianieńni zakranuli i aficeraŭ zapasu. I tut usio vyhladaje našmat bolš surjozna, chacia praciahłaść zboraŭ i pieryjadyčnaść u novaj redakcyi taksama nie prapisany.

Aficeraŭ zapasu zmohuć vyklikać pry znachodžańni ŭ zapasie pieršaha razradu — da dziesiaci razoŭ, a druhoha i treciaha razradu — da piaci razoŭ.

Raniej pryzyŭ na zbory zapaśnikaŭ pieršaha razradu byŭ mahčymy adzin raz na dva hady praciahłaściu da dvuch miesiacaŭ kožny raz, a druhoha razradu — da dvuch razoŭ praciahłaściu da 35-ci dzion.

Zborami budzie zajmacca jašče i KDB. A adpraviać na ich nie tolki prydatnych pavodle stanu zdaroŭja

Jašče adna źmiena: raniej na vajskovyja i śpiecyjalnyja zbory nakiroŭvalisia «vajennaabaviazanyja, prydatnyja pavodle stanu zdaroŭja da vajennaj słužby».

Novym dakumientam praduhledžvajecca, što na zbory buduć nakiroŭvacca «vajennaabaviazanyja, prydatnyja pavodle stanu zdaroŭja da vajskovaj słužby, prydatnyja da słužby ź niaznačnymi abmiežavańniami, a taksama abmiežavana prydatnyja da vajskovaj słužby ŭ vajenny čas (ź ich piśmovaj zhody)».

Źmianieńni taksama praduhledžvajuć uzmacnieńnie roli KDB u praviadzieńni zboraŭ. Naprykład, raniej adbor kandydataŭ dla pryzyvu na vajskovyja i śpiecyjalnyja zbory pravodziŭsia vajskovymi kamisaryjatami, jany ž mahli zaprašać vajennaabaviazanych na ŭdakładnieńnie ŭlikovych danych. Zaraz heta zmohuć rabić i rehijanalnyja ŭpraŭleńni Kamiteta dziaržbiaśpieki.

Darečy, kali raniej z pozvaj dla prachodžańnia zboraŭ patrabavałasia zjavicca ŭ vajskovy kamisaryjat, to zaraz tam moža akazacca «UKDB pa vobłaści».

Pastanova ŭstupaje ŭ siłu paśla jaje aficyjnaha apublikavańnia.

• 2
• 0
• 2
• 8
• 1
• 2
• 22
• 0