Dniami ź Minska ŭ Deli palacieŭ pieršy pramy rejs. Na prezientacyi novaha napramku hienieralny dyrektar Belavia Ihar Čarhiniec zajaviŭ, što dla kampanii heta stała histaryčnaj padziejaj. U intervju Tochka.by kiraŭnik biełaruskaha avijapieravozčyka raspavioŭ pra finansavy stan kampanii, adkul «prychodziać» hrošy, ci možna spadziavacca na toje, što novy (i zatratny) rejs u Deli stanie prybytkovym i što z avijaparkam kampanii.
Tranzit — asnova zarobku
Havoračy pra adkryćcio pramych avijaznosin z Deli, Čarhiniec zajaviŭ, što spadziavajecca na tranzit. Mienavita jon byŭ da pačatku suśvietnaj pandemii hałoŭnym «ruchavikom» raźvićcia nacyjanalnaha avijapieravozčyka.
Tak, Belavia była adnym z asnoŭnych vyhadaatrymalnikaŭ kanfliktu pamiž Rasijaj i Ukrainaj u Biełarusi. Jana paśpiachova raźvivała tranzit praź Minsk, ale nie tolki na napramku Kijeŭ — Maskva. U aeraport Minsk prylatali i pasažyry z Rasii, Siaredniaj Azii i Kaŭkaza, dzie jany pierasadžvalisia na rejsy jak u harady Ukrainy, tak i krain Jeŭrasajuza.
Čatyry hady tamu, pavodle statystyki avijakampanii, bolš za 50% pasažyrapatoku skłali tyja, chto lacieŭ tranzitnymi rehularnymi rejsami.
Ciapier ža dla Belavia zastaŭsia adkrytym uschodni i častka paŭdniovaha kirunku.
Kiraŭnictva kampanii spadziajecca, što i rejs u Deli budzie vykarystoŭvacca tranzitnikami.
Deli — pierśpiektyŭny kirunak, choć i stratny
«Navat na pieršym rejsie z Deli byli pasažyry, jakija lacieli sa stalicy Indyi praź Minsk u Sankt-Pieciarburh. Praz tydzień jany buduć viartacca tym ža šlacham — ź pierasadkaj u Minsku», — havoryć hiendyrektar Belavia.
Taksama, pavodle jaho infarmacyi, na pieršy zvarotny rejs sa stalicy Indyi bilety zakazvali pasažyry, jakija lacieli z Chanoja praz Deli ŭ Minsk.
«Kab taki rejs, jak Minsk — Deli, isnavaŭ, patrebnyja tranzitnyja pasažyry. I avijakampanija abaviazanaja pracavać na pryciahnieńnie tranzitnych patokaŭ», — havoryć Čarhiniec.
Taksama ŭ płanach Belavia — paloty ŭ Vieniesuełu z pasadkaj na Kubie. Tudy nieabchodna «stavić» «Boinh». Miž tym na minułym tydni Ministerstva finansaŭ ZŠA zajaviła ab tym, što ŭ dačynieńni da biełaruskaj avijakampanii ŭviedzieny sankcyi, a mienavita zabarona na pieraloty amierykanskimi samalotami.
Što z avijaparkam?
Žurnalist pacikaviŭsia ŭ kiraŭnika avijakampanii: što čuvać ź lizinhavymi amierykanskimi samalotami i kolki «Boinhaŭ» vykupiła Belavia?
«Usie samaloty, jakija siońnia ekspłuatuje avijakampanija, źjaŭlajucca jaje ŭłasnaściu», — zajaviŭ Čarhiniec.
Ale paśla sankcyj, uviedzienych paśla pasadki samalota rejsa Afiny — Vilnia, na jakim 23 maja 2021 hoda lacieŭ Raman Pratasievič, pavietrany park Belavia skaraciŭsia z 29-ci mašyn da 14-ci.
Pieravažnaja bolšaść z 18-ci lizinhavych avijałajnieraŭ atrymała novych uładalnikaŭ / arandataraŭ.
Z 18-ci tolki try akazalisia całkam apłačanyja, tamu zastalisia ŭ rasparadžeńni Belavia.
U śniežni 2021-ha ŭ avijakampanii zajavili, što płanujuć papoŭnić svoj fłot, «jak nabyvajučy samaloty va ŭłasnaść, tak i zaklučajučy dahavory lizinhu z kampanijami, jakija nie źjaŭlajucca rezidentami ES», — było skazana ŭ paviedamleńni pres-słužby avijapieravozčyka.
Ale navin pra nabyćcio jakich-niebudź bartoŭ nie źjaviłasia ni tady, ni ŭ 2022-m, ni viasnoj 2023-ha.
Sankcyi suprać Belavia
U krasaviku 2022-ha ŭłady ZŠA ŭpieršyniu ŭklučyli siem Boeing-737, jakija naležać Belavia, u śpis samalotaŭ, absłuhoŭvańnie jakich parušaje ekspartny kantrol ZŠA.
U siaredzinie červienia 2022-ha sankcyi ŭzmacnili: Belavia pazbaŭlałasia prava ekspartu z ZŠA, reekspartu abo pieradačy tavaraŭ i pasłuh, jakija padpadajuć pad dziejańnie ekspartnaha kantrolu. Kampanijam pa ŭsim śviecie siońnia zabaroniena absłuhoŭvać, ramantavać i inšym čynam vykarystoŭvać vyrablenyja ŭ ZŠA zapčastki dla absłuhoŭvańnia avijaparku Belavia.
A 9 žniŭnia 2023-ha ŭ Vašynhtonie ŭviali čarhovy pakiet sankcyj u dačynieńni da biełaruskaj avijakampanii i avijaramontnaha zavoda.
Nahadajem, što z 2021 hoda praz sankcyi Jeŭrasajuza i ZŠA Belavia straciła nie tolki pałovu fłotu, ale i mahčymaść latać u krainy Jeŭropy (hety napramak zabiaśpiečvaŭ ilvinuju dolu prybytku avijakampanii).
Niadaŭna ŭśled za Turcyjaj, jakaja zajaviła, što nie budzie prymać i absłuhoŭvać biełaruskija «Boinhi», z padobnaj zajavaj vystupiła i Hruzija. Pryčynaj stali sankcyi, nakładzienyja niadaŭna ZŠA na avijapieravozčyka.
Biełarusam i ŭ Hruziju šlach zakryty?
Akazałasia, nie. Hetaja zabarona nie paralizavała avijaznosiny pamiž Biełaruśsiu i Hruzijaj. Belavia praciahvaje vykonvać rejsy ź Minska adrazu ŭ try hruzinskija harady — Tbilisi, Batumi i Kutaisi.
Paźbiehnuć prablem dapamahaje toje, što robić heta Belavia na brazilskich samalotach Embraer, jakich niama ŭ sankcyjnych śpisach Minfina ZŠA.
Što da 7-hadzinnaha bieśpierasadačnaha rejsa ŭ Deli, to jaho moža ździajśniać tolki adzin Boeing 737 MAX 8, jaki znachodzicca ŭ avijaparku Belavia. Heta aznačaje, što ŭ vypadku techničnych niepaładak (a ŭłady ZŠA zabaranili pastaŭku zapčastak na amierykanskija samaloty Belavia) avijakampanii daviadziecca vykarystoŭvać samaloty Boeing 737 papiarednich pakaleńniaŭ u jakaści padmieny.
Ci zdaść Tramp Ukrainu Rasii? Čamu demakraty razhromlenyja? Da čaho pryviadzie kantrol respublikancaŭ nad vykanaŭčaj i zakanadaŭčaj uładaj adnačasova?8181
Kamientary