Fota: Belsat
Usiaho za pieryjad z 10 žniŭnia 2020 hoda pa 30 červienia 2023 hoda 52 436 biełarusaŭ atrymali humanitarnyja vizy i amal 114 tysiač hramadzian Biełarusi atrymali vizy pa prahramie Poland.Business Harbour, pieravažna heta rabotniki IT-śfiery.
Za apošnija miesiacy kolkaść atrymanych viz vyrasła ŭ dva razy, taksama raście kolkaść tych, chto źviartajecca pa mižnarodnuju abaronu — usiaho takich zvarotaŭ było zarehistravana 7,5 tysiačy. 414 biełarusaŭ atrymali ŭ Polščy status uciekača.
Volha Dabravolskaja zaznačaje, što kolkaść hramadzian Biełarusi, jakija chadajničali ab atrymańni mižnarodnaj abarony, rezka ŭzrasła paśla 24 lutaha 2022 hoda. Kali ŭ 2020-m było 407 takich zvarotaŭ va Upraŭleńnie spraŭ inšaziemcaŭ, u 2021-m — 2257 zvarotaŭ, to ŭ 2022-m paśla pačatku vajny va Ukrainie było zarehistravana 4426 zvarotaŭ. U 2023-m zarehistravana 1600 takich chadajnictvaŭ ad hramadzian Biełarusi.
Zhodna sa statystykaj Upraŭleńnia spraŭ inšaziemcaŭ, biełarusy składajuć druhuju pavodle kolkaści paśla ŭkraincaŭ nacyjanalnuju hrupu. I heta pieršaja pa kolkaści hrupa patencyjnych uciekačoŭ, jakija nie majuć mahčymaści viarnucca na radzimu praz pahrozu asabistaj svabodzie.
Pry hetym kiraŭnica departamienta pravavoj dapamohi CBS zaznačaje, što kolkaść stanoŭčych rašeńniaŭ pa chadajnictvach biełarusaŭ składaje 99%, admovy atrymała ŭsiaho 56 čałaviek. Jašče adno nazirańnie Volhi Dabravolskaj tyčycca taho, što
ŭ 2020 i 2021 hadach hramadzianie Biełarusi najbolš časta padavali zajavy na atrymańnie dazvołu na žycharstva ŭ suviazi z pracaŭładkavańniem u Polščy, takich zvarotaŭ było 75%, a ciapier ličby źmianilisia. Tolki 54% chacieli b lehalizavacca na asnovie pracy, a 28% składajuć tyja, chto ŭ jakaści padstaŭ dla pierajezdu nazyvaje humanitarnyja pryčyny.
Amal 4 tysiačy stanoŭčych rašeńniaŭ było pryniata ŭ adnosinach da biełarusaŭ, jakija mienavita pa humanitarnaj vizie atrymali časovy dazvoł na žycharstva.
Volha Dabravolskaja
«Biełarusy ŭ 2020-2021 hadach vielmi aściarožna stavilisia da statusu ŭciekača. Im padavałasia, što najaŭnaść humanitarnaha dazvołu na žycharstva nie tak istotna «adryvaje» ich ad radzimy. Apošnija hady situacyja źmianiłasia, atrymańnie mižnarodnaj abarony ŭžo nie tak pałochaje. I jašče prykmietna, što biełarusy pryjechali ŭ Polšču nie prosta «adsiadziecca», jany aktyŭnyja ŭ hramadskim płanie: arhanizoŭvajuć inicyjatyvy, fondy, asacyjacyi, stvarajuć biznes-prajekty. Pavodle statystyki, hramadzianie Ukrainy i Biełarusi letaś zasnavali ŭ Polščy novych firmaŭ u try razy bolej, čym raniej rehistravałasia štohod», — kaža Volha Dabravolskaja.
Vielmi časta biełarusy pierajazdžali ŭ Polšču cełymi siemjami, i za apošnija hady tut naradzilisia sotni dziaciej. Paŭstaje pytańnie pra lehalizacyju, bo ŭ maleńkich biełaruskich hramadzian niama biełaruskaha pašparta. Niekatoryja baćki hatovyja pajechać u Biełaruś, kab aformić dakumienty, ale Volha Dabravolskaja raić uzvažvać ryzyku i nie rabić paśpiešlivych krokaŭ. Možna atrymać mižnarodnuju abaronu. Jurystka raić źviarnuć uvahu na dva momanty. Kali baćki padali chadajnictva i čakajuć rašeńnia adnosna siabie, to dastatkova tolki prykłaści da svaich dakumientaŭ paśviedčańnie ab naradžeńni dziciaci. Kali baćki ŭžo majuć padabaronny status — atrymali status uciekača ci mižnarodnuju abaronu, — tady padajecca asobnaja zajava na dzicia, i jano taksama atrymaje abaronu pavodle statusu baćkoŭ.
Kali baćki majuć dazvoł na žycharstva, u tym liku časovy na padstavie humanitarnaj vizy, jość mahčymaść vieści administracyjnyja pracedury biez pašparta, kali jość inšaje paśviedčańnie asoby dziciaci. Byli vypadki, kali baćki iduć u biełaruskuju ambasadu, biaruć daviedku ab viartańni dziciaci ŭ Biełaruś, ale nie viartajucca. Daviedka zastajecca dadatkovym dakumientam dla lehalizacyi. Taksama biez pašparta možna atrymać polski prajazny dakumient — čałavieku nie treba dakazvać, što jon nie moža viarnucca ŭ Biełaruś, kab atrymać pašpart.
Kiraŭnica departamienta pravavoj dapamohi CBS kaža, što ŭ lubym składanym vypadku biełarusy mohuć źviartacca pa kansultacyi. Ale prosić stavicca z razumieńniem nakont mahčymaha času čakańnia: u suviazi z tym, što kolkaść biełarusaŭ u Polščy niaspynna raście, na infaliniju štodnia pastupaje nie mienš za 50 zvarotaŭ.
