Nie ŭsio tak prosta. Kolki budzie kaštavać polskaja turystyčnaja viza i jak chutka možna atrymać
Dniami stała viadoma, što vizavy centr Polščy adnaviŭ pryjom dakumientaŭ na turystyčnyja vizy va ŭsich vizavych centrach. Pravieryli, ci mahčyma zapisacca samastojna i kolki hrošaj za zapis biaruć pasiaredniki.
Pačynajučy z 4 vieraśnia padacca na polskuju turystyčnuju vizu možna ŭ lubym vizavym centry krainy. Ale zapisacca samastojna na padaču składana. Kamu ŭdasca, taho možna ličyć ščaśliŭčykam, bo samastojny zapis biez dapamohi pasiarednikaŭ aščadzić vam šmat hrošaj.
Tym ža, chto nie zdoleje sam «złavić» datu, daviadziecca karystacca pasłuhami pasiarednikaŭ, u jakich heta atrymlivajecca lepš.
Za zapis na padaču, zapaŭnieńnie ankiety i kansultacyju nakont padrychtoŭki dakumientaŭ biaruć ad 800 rubloŭ (kala $250) da 950 rubloŭ (kala $290).
Broń hatela musić być apłačanaj
Da vyšej ahučanych sum treba dadać 35 jeŭra konsulskaha zboru, 11 jeŭra servisnaha zboru, vydatki na strachoŭku i broń hatela. Pryčym, jak paviedamiŭ surazmoŭca adnaho ź vizavych ahienctvaŭ, broń musić być sapraŭdnaj i abaviazkova apłačanaj, bo adno z abaviazkovych patrabavańniaŭ — paćvierdžanaja tranzakcyja, što vy sapraŭdy apłacili za žytło. Choć, pavodle słoŭ ahienta, pieršyja dni išli razmovy, što dastatkova najaŭnaści samoj broni biez fakta apłaty.
Śpiecyjalist raić nie braniravać samych tannych kojka-miescaŭ u chostełach, bo ŭ ambasadzie mohuć nie pavieryć, što čałaviek pajedzie ŭ taki adpačynak. Asabliva, kali jon pakaža, što maje hodny zarobak.
Najaŭnaść hrošaj na padarožžy taksama treba budzie paćvierdzić. Padrabiaźniej pra ŭsie patrabavańni možna aznajomicca pa spasyłcy.
Na jaki termin možna atrymać vizu?
U teoryi turystyčnuju vizu mohuć vydać terminam da 5 hadoŭ, ale dla hetaha treba mieć adpaviednuju vizavuju historyju.
«Za apošnija try hady musić być minimum adna šenhienskaja viza. U takim vypadku možna raźličvać na vizu terminam 1—3 hady. A voś tym, chto robić vizu ŭpieršyniu, chutčej za ŭsio, adkryjuć vizu adnarazovuju, a šmatrazovuju z karotkim terminam, u lepšym vypadku da 6 miesiacaŭ», — kaža surazmoŭca.
Pry hetym śpiecyjalist pryznajecca, što ciapier niemahčyma dakładna kazać pra terminy, na jakija Polšča budzie vydavać turystyčnyja vizy. Bo vizavyja centry tolki dniami adnavili pryjom dakumientaŭ pa hetym typie viz.
«Bližej da kanca vieraśnia pačnie źjaŭlacca niejkaje razumieńnie, jak pojduć spravy z terminami. Raniej (da pandemii) Polšča, badaj, lepš za ŭsich adkryvała doŭhaterminovyja vizy. Ale z taho času šmat što źmianiłasia, tamu kankretyki pakul niama».
Ad tydnia da miesiaca
Što tyčycca terminaŭ zapisu, to, pa słovach surazmoŭcy, novyja miescy i daty źjaŭlajucca kožny tydzień. Zapis idzie na tydzień napierad. U inšym ahienctvie nam ahučyli bolš praciahłyja terminy: maŭlaŭ, kali pačynać supracoŭnictva na hetym tydni, to zapis adbudziecca na kaniec vieraśnia — pačatak kastryčnika.
Tym nie mienš surazmoŭca ŭchilajecca ad pramoha adkazu, čamu zapisacca samastojna amal niemahčyma, a ŭ jaho i jahonych kaleh heta atrymlivajecca paśpiachova.
«Tak było i raniej, jašče ŭ časy, kali Polšča vydavała vizy «na zakupy». Atrymać vizu było nieskładana, patrabavańni byli minimalnyja, a voś zapisacca samastojna i tady było niaprosta», — padkreślivaje surazmoŭca.
Infarmacyja ab adnaŭleńni zapisu na polskija turystyčnyja vizy źjaviłasia na sajtach vizavych ahienctvaŭ.
Na sajcie adnaho z bujnych vizavych ahienctvaŭ paznačana, što atrymać turystyčnuju vizu na 5 hadoŭ možna, kali joj papiaredničała turystyčnaja polskaja viza terminam na 3 hady na praciahu apošnich troch hadoŭ.
Z hetaha vynikaje, što kali apisanyja ŭmovy adpaviadajuć rečaisnaści, to raźličvać na 5-hadovuju vizu amal niemahčyma. Reč u tym, što praz pandemiju Polšča prypyniła vydaču turystyčnych viz hramadzianam Biełarusi jašče viasnoju 2020 hoda.
Čytacie taksama:
«Adstaju za vas». Za kolki pradajuć miesca ŭ čarzie na miažy ź Litvoj i Polščaj
Jak źmianiłasia situacyja na miažy paśla zakryćcia Litvoj dvuch punktaŭ propusku
Zakryćcia hranic pakul nie budzie, kanfrantacyja spała. Spytali ŭ ekśpiertaŭ, ci možna havaryć pra pačatak adlihi pamiž Minskam i ES
Kamientary