Sotni adzinak vajskovaj techniki, źniščanaj Rasijaj va Ukrainie, — mulažy — CNN
Ukraina aktyŭna padmianiaje svaju vajskovuju techniku na poli boju padroblenymi mulažami, kab rasijskaje vojska marna vydatkoŭvała snarady na źniščeńnie falšyvych celaŭ, paviedamlaje CNN.
Pavodle infarmacyi telekanała, vyrabam dakładnych kopij vajskovaj techniki zajmajecca ŭkrainskaja horna-mietałurhičnaja kampanija «Mietinviest», jakaja naležyć biznesmienu Rynatu Achmietavu. Jana ŭžo zrabiła sotni replik tych ci inšych vidaŭ zachodnich uzbrajeńniaŭ, jakija paźniej byli źniščanyja rasijskimi vojskami.
«Vajna abychodzicca doraha, i nam treba, kab rasijanie tracili hrošy na vykarystańnie dronaŭ i rakiet dla źniščeńnia našych falšyvych celaŭ, — raskazaŭ žurnalistam pradstaŭnik kampanii, jaki pažadaŭ zachavać ananimnaść. — Urešcie, drony i rakiety kaštujuć doraha. Našy madeli našmat tańniejšyja».
Tak, ź jahonych słoŭ, 155-milimietrovaja haŭbica M-777 brytanskaj vytvorčaści, jakaja vykarystoŭvajecca va Ukrainie, kaštuje niekalki miljonaŭ dalaraŭ, a «Mietinviest» stvaraje jaje repliku sa zvyčajnych kanalizacyjnych trub mienš čym za tysiaču dalaraŭ.
«Paśla kožnaha traplańnia vajskoŭcy zdajuć nam trafiejnyja abłomki. My ich źbirajem. Kali naša prynada była źniščanaja, značyć, my pracavali nie darma», — rastłumačyŭ pradstaŭnik «Mietinviesta».
Paśla pačatku vajny, raskazvaje jon, supracoŭniki kampanii kinulisia stvarać kopii dla adpraŭki na pieradavuju, kab Ukraina vyhladała bolš uzbrojenaj, čym była na samaj spravie. Adnak spačatku makiety byli davoli hrubymi i, kali mulažy doŭha nie pryciahvali ŭvahu praciŭnika, inžyniery viartalisia da čarciažoŭ, kab ich pierarabić.
«My ličym nie kolkaść vyrablenych falšyvych celaŭ, a kolkaść źniščanych. Čym chutčej našy pastki buduć źniščanyja, tym lepš dla nas», — adznačyŭ surazmoŭca.
Čytajcie taksama:
Budanaŭ nie ličyć, što vajna z Rasijaj budzie praciahłaj
Va Ukrainu prybyli pieršyja 10 tankaŭ Leopard 1
Rasijski piłot, jaki pierahnaŭ va Ukrainu viertalot Mi-8, atrymaje paŭmiljona dalaraŭ
Kamientary