Karcinu Marka Šahała vystavili na aŭkcyjon u Prazie. Startavaja cana niemałaja
Jak piarlinu svajho vosieńskaha aŭkcyjona vystaŭlaje Šahała češskaja halereja Adolfa Łoasa — Adolf Loos Apartment and Gallery. Karcina stvoranaja ŭ 1976 hodzie i nazyvajecca Maternité sur fond bleu («Maciarynstva na sinim fonie»), piša «Radyjo Svaboda».
U centry kampazicyi vyjava maci, jakaja trymaje na rukach dzicia, miakka nachiliŭšy da jaho hałavu. Za imi, niby ŭ sinim mroivie ŭspaminaŭ, paznavalny anturaž staroj biełaruskaj pravincyi.
«Hetaja karcina ŭvasablaje paetyčnuju vizualnuju movu Šahała, jakaja adlustroŭvaje historyju jaho ŭłasnaj siamji i kachańnia, — havorycca ŭ katałohu aŭkcyjonu. — Kampazicyja mary pryhadvaje jak detali asabistaj i siamiejnaj historyi mastaka, tak i rysy ŭschodniejeŭrapiejskaha falkłoru. U karcinie zaŭvažnyja matyvy viaskovaha žyćcia, vyjavy žyvioł, hałúbki, jakaja dadaje tvoru miralubivuju atmaśfieru».
Jak paviedamiŭ dyrektar halerei Uładzimir Łekieš, tvor da samaj śmierci mastaka znachodziŭsia ŭ jaho doma, potym trapiŭ u pryvatnuju kalekcyju. Mienavita z hetaj zachodniejeŭrapiejskaj kalekcyi halereja atrymała tvor, na aŭkcyjonie jon budzie ŭpieršyniu.
Startavuju canu pastavili ŭ 12 miljonaŭ češskich kron (480 tysiač jeŭra). Da samaj vialikaj sumy, prapanavanaj pieramožcam, treba budzie dadać i aŭkcyjonnuju praviziju (21 pracent).
Aŭkcyjon adbudziecca ŭ Prazie 12 listapada i budzie niepubličnym. Udzieł u im mohuć brać tolki tyja, chto papiarednie zarehistravaŭsia. Dla biełarusaŭ Čechii, navat kali jany i nie źbirajucca pazmahacca za nabyćcio tvora ziemlaka, jość prynamsi šaniec jaho pabačyć. Pierad aŭkcyjonam halereja daje mahčymaść paznajomicca z tvorami ŭ vystavačnaj zali Expo 58 ART (ad 21 kastryčnika da 11 listapada).
Znakavych tvoraŭ Marka Šahała ŭ Biełarusi, dzie jon naradziŭsia, davoli mała. U svoj čas biełaruski biznes rabiŭ sproby viartać ich na radzimu.
«Biełhazprambank» ź inicyjatyvy Viktara Babaryki kupiŭ na aŭkcyjonie «Sotbis» dla svajoj karparatyŭnaj kalekcyi dziasiatki tvoraŭ mastakoŭ paryžskaj škoły, uradžencaŭ Biełarusi. Ale hetuju kalekcyju dałučyli da kryminalnaj spravy Viktara Babaryki; što ź joj ciapier, nieviadoma.
«Rejdarskim zachopam» nazyvajuć mastactvaznaŭcy dałučeńnie da kryminalnaj spravy karparatyŭnaj kalekcyi karcin, što naležyć «Biełhazprambanku».
Za miažoj tvory Marka Šahała (1887—1985) možna pabačyć u Nacyjanalnym muziei Marka Šahała ŭ francuzskaj Nicy, u francuzskim Centry Pampidu, Nacyjanalnaj mastackaj halerei ŭ Vašynhtonie, Muziei sučasnaha mastactva ŭ Ńju Jorku (MoMA), Instytucie mastactva ŭ Čykaha, sietcy brytanskich muziejaŭ Tate, Ruskim muziei ŭ Sankt-Pieciarburhu ci Traćciakoŭskaj halerei ŭ Maskvie.
-
U sacsietkach uspłyła karcina Białynickaha-Biruli. Nie ŭsie vierać, što akademik moh malavać tak
-
«Z zadavalnieńniem syhrała b Kaleśnikavu». Śviatłana Zielankoŭskaja — pra novyja roli, Michałka i toje, jak zavablivali viarnucca ŭ Biełaruś
-
Mižnarodny Kanhres daśledčykaŭ Biełarusi nazvaŭ najlepšyja navukovyja publikacyi za 2023 hod
Čamu ŭ Haazie nie buduć rasśledavać katavańni i zabojstvy ŭ Biełarusi? Tłumačyć Łatuška i deputat Jeŭraparłamienta ad Litvy5
Kamientary