Kampanija, što kaliści startavała jak vytvorca tannych akumulataraŭ dla mabilnych telefonaŭ, siońnia pretenduje na suśvietnaje lidarstva ŭ prodažy elektramabilaŭ.
Usiaho niekalki hadoŭ tamu zasnavalnik kitajskaj kampanii-aŭtavytvorcy BYD pieražyvaŭ, što kampanija nie vyžyvie. Siońnia ž kampanija nastupaje na piatki Tesla na rynku prodažu elektramabilaŭ.
BYD pradała sioleta 431 603 całkam elektryčnyja aŭtamabili ŭ trecim kvartale, što krychu mienš za 435 059 pradadzienych aŭtamabilaŭ Tesla. Ahułam ža da kanca hoda kampanija płanuje pradać kala 1,8 miljona elektramabilaŭ. Kali płan budzie vykanany, heta zraŭniaje kampaniju BYD z Tesla, jakaja pastaviła tuju ž metu pa prodažach elektramabilaŭ na hety hod (u paraŭnańni z 1,31 miljona prodažaŭ letaś).
57-hadovy zasnavalnik Van Čuańfu (Wang Chuanfu) kazaŭ, što spałučeńnie litar «BYD» nie mieła nijakaha kankretnaha značeńnia, kali jon jaho prydumaŭ. Adnak siońnia kampanija kaža, što BYD rasšyfroŭvajecca jak «Build Your Dreams», choć kažuć, što ŭ pieršyja hady Van žartavaŭ, što BYD sapraŭdy aznačaje Bring Your Dollars.
Niahledziačy na toje, što kampanija BYD była zasnavanaja ŭ 1995 hodzie jak vytvorca akumulataraŭ, jana tolki za apošnija niekalki hadoŭ rezka padniałasia ŭ mižnarodnym rejtynhu aŭtavytvorcaŭ. Kampanija taksama pradaje hibrydnyja bienzinava-elektryčnyja aŭtamabili i płanuje pradać u hetym hodzie 3,6 miljona aŭtamabilaŭ (elektra– i hibrydaŭ razam), što, vierahodna, pastavić jaje ŭ top-10 suśvietnych aŭtavytvorcaŭ pa kolkaści prodažaŭ. BYD užo abyšła Volkswagen u jakaści samaha pradavanaha aŭtamabilnaha brenda ŭ Kitai i ciapier naroščvaje svaje ekspartnyja mahutnaści, raspaviadaje The Wall Street Journal.
Rost BYD paŭtaraje historyju mnohich kitajskich kampanij. BYD pačynaŭsia z kapijavańnia praduktaŭ Toyota, ale zatym kitajskaja kampanija stała nastolki daśviedčanaj u skaračeńni vydatkaŭ, što tahačasny hienieralny dyrektar Toyota Akia Tajoda naviedaŭ BYD, kab daviedacca pra jaje sakrety. Niemałavažny i toj fakt, što kitajskija čynoŭniki vydzialali subsidyi i kuplali aŭtamabili BYD dla dziaržaŭnych parkaŭ, adnačasova stymulujučy bolš šyroki rynak elektramabilaŭ.
U apošni čas BYD zajmałasia aktyŭnaj ekspansijaj na rynku Jeŭropy i Paŭdniova-Uschodniaj Azii, robiačy staŭku na kankurentazdolny košt elektramabilaŭ kitajskaj vytvorčaści. Pa-za miežami Kitaja heta ŭžo samy pradavany elektramabil na niekatorych rynkach, uklučajučy Aŭstraliju, Šviecyju, Tajłand i Izrail. Asnoŭnaja ekspartnaja madel BYD, Atto 3, pradajecca ŭ Jeŭropie jak aŭtamabil «dastupnaha premium-kłasa» pa canie kala 40 000 dalaraŭ.
Tym časam zaniepakojenyja niedarahoj kankurencyjaj z boku Kitaja amierykanskija i jeŭrapiejskija palityki sprabujuć naroščvać svaju ŭnutranuju pramysłovaść. U ES taksama rasśledujuć, nakolki spraviadliva kitajskija aŭtavytvorcy atrymlivali vyhadu ad dziaržaŭnaj dapamohi.
U Paŭnočnaj Amierycy BYD staŭ adnym z najbujniejšych vytvorcaŭ elektryčnych aŭtobusaŭ i hruzavikoŭ, razhladajučy hety siehmient jak bolš lohki punkt uvachodu, čym lehkavyja aŭtamabili, na fonie patencyjnaj reakcyi rehulataraŭ i kankurentaŭ z ZŠA. Adnosiny pamiž ZŠA i Kitajem nastolki napružanyja, što kiraŭniki BYD zajavili, što rynak spažyvieckich aŭtamabilaŭ u ZŠA dla ich pakul faktyčna zabaronieny.
Adnak pašyreńnie za miežy Kitaja vielmi važnaje dla kampanii. Ekanomika Kitaja zapavolvajecca: ahulny abjom prodažaŭ lehkavych aŭtamabilaŭ upaŭ ź piku ŭ 2017 hodzie, a ŭnutranaja kankurencyja ŭzmacniajecca.
Sakrety pośpiechu
«Jak zrabić adnu z samych paśpiachovych aŭtavytvorčych kampanij?», — spytajecie vy. Vielmi prosta: dastatkova mieć niekalki socień tysiač dalaraŭ pačatkovaha kapitału i kitajski rynak pracy.
Spadar Van zasnavaŭ BYD u 1995 hodzie, kab vyrablać nievialikija akumulatary, jakija vykarystoŭvalisia ŭ mabilnych telefonach i inšych pryładach. Pačynała firma z kapijavańnia praduktaŭ japonskich tahačasnych lidaraŭ rynku Sanyo i Sony.
U Šeńčženie, pazyčyŭšy kala 300 000 dołaraŭ u bahataha stryječnaha brata, Van naniaŭ bolš za 1000 rabočych i raźbiŭ vytvorčaść akumulataraŭ na sotni etapaŭ, ź jakimi adnosna niepadrychtavanyja pracaŭniki mahli spravicca biez darahoha abstalavańnia. Tematyčnaje daśledavańnie Harvardskaj škoły biznesu raspaviadaje, jak dla źniaćcia kavałka izalenty z akumulatara spatrebilisia dva supracoŭniki BYD: adzin adklejvaŭ ražok, a druhi adździraŭ usiu pałosku. Metaj padobnaha drobnaha padziełu pracy była chutkaść i paźbiahańnie patreby ŭ darahich mašynach.
Kali BYD zajmieli ŭ jakaści klijenta kampaniju Motorola ŭ 2000 hodzie i Nokia ŭ 2002-im, heta ŭmacavała pazicyju kitajskaj kampanii ŭ piaciorcy viadučych u śviecie vytvorcaŭ akumulatarnych batarej. Jakraz u toj čas prodažy mabilnych telefonaŭ pačali imkliva raści, i BYD byŭ adnym z samych tannych pastaŭščykoŭ akumulataraŭ.
Prykładna ŭ toj ža čas Van ubačyŭ patencyjał vykarystańnia akumulatarnych batarej u aŭtamabilach. U kancy 1990-ch hadoŭ kampanija Toyota była pijanieram u vytvorčaści hibrydnych bienzinava-elektryčnych aŭtamabilaŭ sa svaim Prius. Pieršy aŭtamabil BYD — siedan ź bienzinavym ruchavikom, vypuščany ŭ 2005 hodzie pad nazvaj F3 — vyhladaŭ amal identyčna Toyota Corolla. Dla niespraktykavanaha voka adzinaj roźnicaj pamiž mašynami byŭ značok.
Van nikoli nie saromieŭsia svajoj stratehii kapijavańnia. U intervju jon kazaŭ, što BYD čerpała natchnieńnie z hatovaj pradukcyi inšych i što jana śpiecyjalizujecca na vyvučeńni aŭtamabilaŭ, kab znajści, jakija detali byli zapatentavanyja, paźbiahajučy ich kapijavańnia, ale z achvotaj kapijujučy inšyja. «My pavinny vučycca ŭ ich, tady my zmožam stajać na ich plačach», — skazaŭ jon u intervju kitajskaj prahramie navin u 2021 hodzie.
U aŭtamabilnym biznesie Van pajšoŭ užo pravieranym šlacham radykalnaha skaračeńnia vydatkaŭ. Jon paźbieh darahich układańniaŭ u aŭtamatyzacyju i naniaŭ tysiačy rabočych dla vykanańnia prostych pracesaŭ. Jon pryciahvaŭ supracoŭnikaŭ pa karotkaterminovych kantraktach i zamianiaŭ ich na praciahu niekalkich hadoŭ, kab paźbiahać pavyšeńnia zarobkaŭ.
U vyniku jon zmoh pradać F3 — aŭtamabil ź bienzinavym ruchavikom — usiaho za 8000 dalaraŭ, abo prykładna za pałovu koštu tahačasnaj Toyota Corolla. Niahledziačy na prablemy ź jakaściu (naprykład, vokny, jakija pierastajuć pravilna zajazdžać uvierch i ŭniz), F3 uznačalvaŭ čarty prodažaŭ u Kitai da kanca 2000-ch hadoŭ.
Novaja kankurencyja
Pry kancy 2010-ch hadoŭ inšyja kitajskija startapy pa vytvorčaści elektryčnych transpartnych srodkaŭ pačali ŭkładać hrošy ŭ rynak, što ros. A ŭ 2019 hodzie Tesla pačała pradavać aŭtamabili, vyrablenyja na novym zavodzie ŭ Šanchai. Ich možna było pradavać u Kitai pa značna nižejšych koštach, čym papiarednija madeli Tesla, bo nie treba było bolš płacić impartnyja taryfy. U vyniku ŭ pieršaj pałovie 2020 hoda kala 20% elektramabilaŭ, pradadzienych u Kitai, užo składali Tesla — u paraŭnańni z prykładna 6% hodam raniej.
BYD kankuruje pa canie z Tesla — kitajski vytvorca ŭ apošnija hady vypuściŭ šerah aŭtamabilaŭ, jakija pretendujuć na vyšejšy kłas, ale pry hetym usio jašče tańniejšyja za pradukcyju kampanii Iłana Maska.
U 2019 hodzie BYD pradała na 21% mienš aŭtamabilaŭ, čym u papiarednim hodzie, na fonie novaj kankurencyi, zapavoleńnia ekanomiki i źnižeńnia dziaržaŭnych subsidyj na kuplu elektramabilaŭ i hibrydaŭ. Zarobki ŭ 2019 hodzie ŭpali amal udvaja. Van skazaŭ tady, što adnoj z metaŭ kampanii ŭ toj čas było vyžyvańnie.
U 2020 hodzie novy akumulatar adkryŭ u kampanii druhoje dychańnie. Akumulatar pad nazvaj Blade byŭ adnoj z šerahu ekśpierymientalnych technałohij, u jakija Van i jaho kamanda inžynieraŭ inviestavali hadami, sprabujučy znajści biaśpiečniejšy akumulatar, jaki moh by siłkavać aŭtamabili na dalokich adlehłaściach.
Novaja batareja debiutavała ŭ elektryčnym siedanie Han, jaki, pa słovach kampanii, moža prajechać kala 600 km na adnoj zaradcy. Aŭtamabil kaštuje kala 30 000 dalaraŭ, što prykładna na 40 000 mienš, čym Tesla Model S z anałahičnym dyjapazonam.
Za apošniaje dziesiacihodździe BYD zaklučyła ŭhody na pastaŭku elektryčnych aŭtobusaŭ apierataram aŭtaparkaŭ u šerahu krain, uklučajučy ZŠA, Vialikabrytaniju i Japoniju. Pry hetym BYD praciahvaje vykarystoŭvać nizkaapłatnych rabotnikaŭ, kab padtrymlivać nizkija vydatki. Niekatoryja z rabotnikaŭ zavoda BYD samaha nizkaha źviana raspaviadajuć, što im płaciać mienš za 750 dalaraŭ na miesiac u paraŭnańni z prykładna 1000 dalaraŭ, jakija płaciać na zavodzie Tesla ŭ Šanchai.
U toj ža čas zarobki na zavodach u Kitai vyraśli na 122% za apošniaje dziesiacihodździe, i heta prymusiła niekatorych vytvorcaŭ šukać tańniejšuju pracoŭnuju siłu ŭ inšych miescach. Kampanija BYD sprabuje prystasavacca, užo mienš abapirajučysia na mietady vytvorčaści, aryjentavanyja na čałavieka. Tak, zavody, pabudavanyja BYD zusim niadaŭna, kaštujuć daražej i majuć značna bolšy ŭzrovień aŭtamatyzacyi, kažuć pradstaŭniki kampanii.
Vystupajučy ŭ žniŭni na mierapryjemstvie ŭ honar vytvorčaści svajho piacimiljonnaha elektramabila, kiraŭnik kampanii Van parazvažaŭ pra toje, jak BYD pieratvaryłasia z vytvorcy akumulataraŭ u adnaho ź viadučych aŭtavytvorcaŭ. Kampanija spatrebiłasia 13 hadoŭ, kab vyrabić adzin miljon aŭtamabilaŭ; paŭtara hoda, kab vyrabić jašče dva miljony; i tolki dzieviać miesiacaŭ, kab vyrabić apošnija dva miljony. «Nastupiła era kitajskich aŭtamabilaŭ», — zajaviŭ Van.
Kamientary