Amal usie zatrymanyja na miažy z Polščaj mihranty majuć śviežyja rasijskija vizy
U novaj chvali mihrantaŭ, što imknucca pieraadoleć biełaruska-polskuju miažu, praktyčna niama žančyn ź dziećmi.
«Za situacyjaj sočać polskija słužby. Jany adznačajuć źmieny ŭ paraŭnańni z pačatkam mihracyjnaha kryzisu. Pablizu miažy niama mihrantaŭ, a zamiežniki čakajuć u najbližejšych haradach, kab trapić u Polšču. Choć aharodža na miažy značna pamienšyła cisk na polski ŭčastak, sproby nielehalnaha praniknieńnia na terytoryju ES usio jašče robiacca», — raskazaŭ RMF.fm pradstaŭnik Hałoŭnaj upravy Pamiežnaj słužby Polščy Konrad Švied.
Ciapier amal usie zamiežniki, zatrymanyja paśla sproby niezakonnaha pierasiačeńnia polskaj miažy, majuć niadaŭna vydadzienyja rasijskija vizy. Heta aznačaje, što asnoŭnym napramkam, adkul zamiežniki traplajuć u Biełaruś, źjaŭlajecca Rasija, — padkreśliŭ Konrad Švied.
Heta źviazana z błakavańniem niekalki miesiacaŭ tamu častki pramych avijaznosin, u tym liku ź Blizkaha Uschodu ŭ Minsk.
Švied taksama źviartaje ŭvahu na toj fakt, što ŭsio čaściej traplajucca zamiežniki ź Indyi i Pakistana, kali pieršapačatkova lidziravali žychary Blizkaha Uschodu, Afhanistana i afrykanskich krain.
Cikava taksama, što ŭ novaj chvali nielehalnaj mihracyi praktyčna niama žančyn ź dziećmi.
Pavodle źviestak Padlaskaha adździaleńnia Pamiežnaj słužby, u kastryčniku było ździejśniena bolš za paŭtary tysiačy sprob niezakonnaha pierasiačeńnia polska-biełaruskaj miažy. Z pačatku hoda na polska-biełaruskaj miažy takich sprob było amal 22 tysiačy.
Nielehalnyja mihranty, zatrymanyja sioleta polskimi pamiežnikami, prybyli z bolš čym 50 krain.
Bajden nie źbirajecca zdymacca z vybaraŭ i abiacaje pieramohu niahledziačy na sumnievy ŭ jaho zdaroŭi3
Kamientary