Skrynšot videa ŭ instahramie geroi_show
Ekstrym-telešou pazicyjanirujecca jak sumiesny prajekt spartyŭnaha kłuba Łukašenki i Biełteleradyjokampanii. Uličvajučy toj fakt, što kiruje spartyŭnym kłubam Dźmitryj Łukašenka, nie dziŭna, što viadučaj šou druhi siezon zapar źjaŭlajecca jaho dačka Darja. Na hety raz kampaniju joj skłali žurnalistka telekanała «Biełaruś 5» Hanna Lubiankova i rasijski spartyŭny kamientatar Viktar Husieŭ.
Fota ź instahrama geroi_show
Jak paviedamlaŭ pres-reliz, «na vielmi składanaj pałasie pieraškod u duchu virtualnaj realnaści buduć pradstaŭniki maśmiedyja, sportu, kultury i mastactvaŭ. Vosiem kamand, dvaccać čatyry ŭdzielniki vyjduć z zony kamfortu nasustrač stracham. U realnym śviecie na zdymačnaj placoŭcy na zapis adnoj hulni idzie kala šaści hadzin, i ŭsio ź pieršaha dubla — u ekšen-šou nijakich pabłažak».
Pieršy vypusk šou «Hieroi. Pierazahruzka» vyjšaŭ 12 listapada — mienavita ŭ toj dzień, kali ŭ 2020 hodzie ŭ lakarni pamior Raman Bandarenka, žorstka źbity ŭ dvary ŭłasnaha doma. Cynizm situacyi ŭ tym, što siarod udzielnikaŭ šou byŭ čałaviek, jaki źbivaŭ Bandarenku, — baksior Dźmitryj Šakuta.
Kamanda «Vułkan»: Dźmitryj Šakuta, Hanna Kviłoryja i Mikita Bialko. Fota ź instahrama geroi_show
Jon vystupaŭ u składzie kamandy «Vułkan». Prafajł Šakuty na šou vyhladaje tak: spartoviec (boks), kiraŭnik bajcoŭskaha kłuba, instruktar pa śpiecpadrychtoŭcy. Pra toje, što šasnaccacirazovy čempijon śvietu pa boksie i kikboksinhu ŭdzielničaŭ u bojcy na Płoščy Pieramien, kaniečnie, nie zhadvajecca.
Sam Šakuta taksama ŭpeŭnieny, što jaho viedajuć vyklučna jak prafiesijnaha spartoŭca. Jon raspaviadaje na videa, što ciapier na amatarskim uzroŭni zajmajecca chakiejem. Adrenalin dla jaho — heta žyćciovaje padsiłkoŭvańnie. Dźmitryj paviedamiŭ, što lubić roŭpdžampinh i sprabavaŭ skakać z mastoŭ u roznych krainach — jamu padabajecca pačućcio svabodnaha padzieńnia.
— Spartoŭcy zaŭsiody žadajuć być pieršymi, — adznačyŭ Šakuta. — Tym bolš, što tut u kožnaj kamandzie spartsmieny vyšejšaha ŭzroŭniu.
Razam z Šakutam u kamandzie vystupajuć televiadučaja Hanna Kviłoryja i śpiavak Mikita Bialko. Ich supiernikami była kamanda «Piehas», u jakuju ŭvajšli śpiavak Tea, spartoviec i deputat Alaksandr Bahdanovič, dy Anastasija Kraŭčanka — zorka tyktoku, studentka teałahičnaha fakultetu BDU, jakaja maryć raźmierkavacca na BT, dzie zaraz i pracuje viadučaj.
Darja Łukašenka. Skrynšot videa na YouTube-kanale «Tielekanał Biełaruś 1»
— Adčajnyja śmielčaki vyrašyli kinuć vyklik losu i pazmahacca za tytuł hierojaŭ. Jany chočuć vyjavić charaktar i hučniej zajavić pra siabie. Ci nie rasčarujucca jany? Čas bitvy pryjšoŭ, — kaža kampjutarnym hołasam Darja Łukašenka.
Da finału kamandy dajšli ź likam 3:3. U apošnim spabornictvie syšlisia spartoviec Alaksandr Bahdanovič i Dźmitryj Šakuta: im treba było ŭźleźci na viežu i schapić hałoŭny kryštal hulni. U apošni momant Šakuta schapiŭ kryštal i zdabyŭ pieramohu dla kamandy.
Čytajcie taksama:
Jak zabivali Ramana Bandarenku. Chronika padziej
Źjaviłasia dadatkovaje rasśledavańnie pa śmierci Bandarenki. Jakija novyja rečy adtul viadomyja?
