U Biełarusi boleje busłoŭ

Udzielniki mižnarodnaha Kanhresu arnitolahaŭ, jaki prachodzić u niamieckim Hamburhu ahučyli tradycyjny padlik papulacyi biełych busłoŭ, jaki raz na dziesiać hod pravodzicca admysłoŭcami roznych krainaŭ śvietu. Pavodle spravazdačy, busłoŭ na Ziamli stała bolej na 37 adsotkaŭ, pryčym siarod eŭrapiejskich krainaŭ najbolš kolkaść busłoŭ pavialičyłasia ŭ Hišpanii, Polščy, va Ukrajinie i ŭ Biełarusi. Adnačasna arnitolahi zaniepakojenyja tym, što busły pakidajuć svaje tradycyjnyja miescy abitańnia.

Dla bolšaści eŭrapiejcaŭ bieły busieł jość kultavaj ptuškaj. Jak inšyja narody biełarusy skłali pra jaho niamała mitaŭ. Naprykład, pra ščaście, jakoje prychodzić u tyja chaty, dzie busły źvivajuć svaje hniozdy.

Što da realijaŭ, to apošnim časam busły źvivajuć svaje hniozdy ŭ niazvykłych miescach. Naprykład, na słupach linijaŭ elektrapieradačaŭ. Niamiecki arnitolah Kaj -Michael Tomzen tłumačyć: «Pojmy rekaŭ pačynajuć zarastać travoj. Busły nia ŭ stanie dabyvać ježu dla svaich ptachaŭ, a tamu vymušanyja mihravać». Navukoviec miarkuje, što chutkim časam biełym busłam, jakija hniazdujucca ŭ rajonie Elby moža stać vielmi ciesna i što ŭ pošukach siłkavańnia jany navat zmohuć źniščyć inšyja vidy. U hetym sensie rost papulacyi vida moža toić u sabie peŭnuju niebiaśpieku, -- ličyć arnitolah Tomzen.

Tym časam jahonaja biełaruskaja kaleha Iryna Samusienka, jakaja rychtavała dla Hamburskaha kanhresu źviestki pa papulacyi biełaha busła ŭ Biełarusi (adnak nie zmahła ŭziać udzieł u forumie z-za prablemaŭ finansavańnia), pierakanaja: dla Ŭschodniaj Eŭropy pavieličeńnie hetaha vidu jość pazytyŭnym faktaram. Bieły busieł vielmi niepieraborlivaja i ŭsiejadnaja ptuška, jakaja dapamahaje zmahacca z tymi ž myšapadobnymi hryzunami ci kałaradskimi žukami. Padobna eŭrapiejskim busłam, biełaruskija taksama śchilnyja da masavaj źmieny miescaŭ hniezdavańnia.

(Samusienka: ) «Hety praces spravakany čałaviekam. Busły prylatajuć, im treba vyroščvać ptušaniat. Tamu jany i mihrujuć u nasielennyja punkty da ludziej. Tut papulacyja busła raście, a ŭ pojmach rekaŭ, naadvarot, źmianšajecca»

Pavodle Iryny Samusienki da mielijaracyi i Čarnobyla, pojma Prypiaci była dla biełaruskich busłoŭ takim ža lubimym miescam, što i pojma Elby dla busłoŭ niamieckich. Ptuški pakidajuć svaje tradycyjnyja hniozdy na vysachłych z–za mielijaracyi drevach, a zamiest hetaha hniazdujucca na ŁEPach, śviedčyć biełaruskaja vučonaja.

Jak ličyć Iryna Samusienka, rost papulacyi biełaha busła maje ŭ kožnym rehijonie svaje pryčyny. Kali havaryć pra Biełaruś, to 2005 hod, kali pravodzilisia asnoŭnyja padliki, staŭ dla busłoŭ spryjalnym u źviazku ź niebłahim uradžajem dy dobraj zimoŭkaj u Afrycy. Nie ŭ apošniuju čarhu, pakazčyki rostu papulacyi źviazanyja z uviadzieńniem bolš daskanałaj sistemy padlikaŭ hniezdavańnia. Dziesiać hod tamu ličby vyznačalisia vyklučna šlacham apytańnia miascovych žycharoŭ, a tamu byli nia samymi dakładnymi.

Radyjo Svaboda

• 0
• 0
• 0
• 0
• 0
• 0
• 0
• 0