«Byłych pankaŭ nie byvaje». Płejlist błohierki Lizy Vietravaj
«Naša Niva» praciahvaje raskazvać, što słuchajuć viadomyja biełarusy. Siońnia — płejlist błohierki Lizy Vietravaj (93 tysiačy padpisčykaŭ u tyktoku): dziaŭčyna raskazała nam pra luboŭ da roku, dziacinstva pad «Raźbitaje serca pacana» i pieśni, jakija mohuć zrabić baluča.
«Usio, što nam treba — heta viera»
Liza adznačaje, što ŭ jaje małady płejlist, bo sioleta dziaŭčyna pierajšła na Youtube Music, i amal usia muzyka ŭ im dadadzienaja niadaŭna. Somebody Told Me ad hurta The Killers — pieršy trek, jaki tudy trapiŭ. Ź dziacinstva Liza lubić hety hurt, i jon vypaŭ joj ŭ rekamiendacyjach.
Błohierka pryznajecca, što ciažkija treki — jaje lubimyja: «Ź dziacinstva słuchaju rok. Kaliści navat adnosiła siabie da pankaŭ, a byłych pankaŭ nie isnuje (śmiajecca). Samy ciažki trek ź dziacinstva? Pieršaje, što prychodzić u hałavu — Metallica i ich pieśnia Die, Die, My Darling, a taksama ich treki Master of Puppets i Nothing Else Matters. Taksama ja šmat słuchała Rammstein, ale ciapier starajusia ad ich admovicca, bo [salista hurta] Cila Lindemana abvinavacili ŭ hvałcie. Čytała žurnalisckija rasśledavańni pra heta, ale, mnie padajecca, ich małavata, usio nie da kanca zrazumieła. Mahu ŭjavić, što takoje mahło zdarycca — mahčyma, kali ty taki znakamity, tabie krychu zryvaje hałavu. Tak što maju da Rammstein pytańniečki i tamu ciapier namahajusia ich nie słuchać».
Liza kaža, što nie lubić rok, dzie «kryčać horłam», a voś bolš mieładyčnyja treki joj daspadoby. Akramia Metallica, dziaŭčyna dadaje ŭ płejlist Linkin Park, asabliva vydzialaje ich kampazicyju In the End.
Ź niečakanaha: błohierka — fanatka francuzskich rok-opier i kampazicyj ź ich. Naprykład, heta trek Penser l'impossible z rok-opiery Mozart ci pieśnia La gloire à mes genoux z Le rouge et le noir. Taksama ŭ jaje płejliście pieśnia Lili Alen Fuck You ź filmaŭ pra Brydžyt Džons, chacia sami filmy dziaŭčyna nie hladzieła. Dziaŭčyna raskazvaje, što z-za miełodyi hetaja pieśnia nahadvaje joj pra Kalady, u napružany čas zdymkaŭ trek dapamahaje rassłabicca.
Što Liza moža słuchać hadzinami? Heta trek I Don't Dance ad Sunrise Avenue: «Mnie padabajecca, što heta lohkaja muzyka, jakaja mianie nie napružvaje, i ja razumieju, pra što tam śpiavajuć. Hetaja pieśnia dobra pasuje pad moj nastroj, słuchaju jaje na paŭtory miesiacy try-čatyry. Słuchaju ŭ ich i inšyja pieśni.
Z anhłamoŭnych mnie jašče padabajecca Random Hero, u ich jość pieśnia Could You Be My Love. Jašče ŭ maim płejliście šmat The Rasmus, The Score, Green Day i My Chemical Romance».
Dobra, a jakaja pieśnia najbolš vyražaje Lizu? Pieršaje, što zhadvaje dziaŭčyna — pieśnia Hurricane ad Thirty Seconds to Mars, a taksama ich ža End of All Days — druhaja kampazicyja, i jaje Liza nazyvaje važniejšaj. U biełaruski navat jość tatuiroŭka sa słovami adtul — All We Need Is Faith, to-bok «usio, što nam treba — heta viera». Praŭda, hetaja tatuiroŭka sa słovami adtul zroblenaja na elfijskaj movie, bo ŭ čas, kali Liza jaje rabiła, jana fanacieła pa Tołkijenu. Chacia u End of All Days niaprosty tekst, hetaja pieśnia daje nadzieju, adznačaje Liza.
Jość u płejliście błohierki i bolš papsovyja rečy, ale i jany padabranyja z hustam. Naprykład, heta pieśnia Bonnie and Clyde ad kitajskaj śpiavački Yuqi ci italjanski hurt Måneskin, jaki staŭ viadomym paśla pieramohi na Jeŭrabačańni. U italjancaŭ dziaŭčyna ŭpadabała pieśniu L'Altra Dimensione. Jašče adzin papsovy trek ad Lizy — francuzskaja śpiavačka Zaz, pieśnia Cette journée.
«Kažuć, pieśni nie mohuć zrabić baluča, ale pad hety albom ja try razy płakała»
Ale dziaŭčyna zusim nie abmiažoŭvajecca zamiežnikami: «Słuchaju taksama šmat biełaruskaha, i mnie padajecca, što novy albom «TAM» ad Leibonik — vielmi biełaruski. Kažuć, što pieśni nie mohuć zrabić baluča, ale hety albom ja słuchała niedzie trojčy i ŭsie try razy płakała. Mnie vielmi padabajecca muzyka Nizkiz, jany ŭ mianie čamuści asacyjujucca z 2020-2021 hadami, ale taksama ich słuchaju, asabliva «Jak spyniajecca cišynia». NAVIBAND — prosta supier, mnie vielmi padabajecca ich pieśnia «Inšymi» i toje, što jany zrabili viersiju pieśni «Biažy» pa-ŭkrainsku.
Nie słuchaju hłyboki biełaruski andehraŭnd, bo nie zaŭsiody maju čas takoje znajści. Ja padpisałasia na biełaruskuju śpiavačku Nevika i saču za jaje tvorčaściu — na maju dumku, heta vielmi fajnyja papsovyja treki, nam takoha nie chapała. Adkryćciom minułaha hoda dla mianie byŭ hurt Nochy i ich albom «Praź cichi akijan», pieśnia «Našamaniu» mnie vielmi zajšła. A jašče jość ich trek «Viečarynka» — słuchaju jaho, kali mnie nie chapaje enierhii i treba pierazaradka. Paśla hetaj pieśni padpisałasia na ich u sacsietkach, kab nie prapuskać toje, što jany robiać».
Kožnaja ranica ŭ Vietravaj pačynajecca z treka Pan ad Iva Sativa — viadomaj biełaruskaj vykanaŭcy, jakaja abjadnoŭvaje chip-chop z falkłornymi matyvami. Z hetaha treka pačałosia znajomstva Lizy z tvorčaściu Ivy. Błohierka charaktaryzuje Pan jak vielmi enierhičnuju pieśniu, što zaradžaje badzioraściu.
«RSP pišuć movaj, jakoj my hutaryli ŭ Haradziei»
Muzyka Lizinaha dziacinstva — «Raźbitaje serca pacana». Vietrava rodam z Haradziei, i kali jana była padletkam, u jaje asiarodku było vielmi modna trasianić: «Tady streliła pieśnia RSP «Rozavy zakat», a jana napisanaja toj movaj, jakoj my hutaryli ŭ miastečku, tamu vielmi nam zajšła. Pamiataju, jak my ŭklučali hety trek na telefonie, chadzili pa miastečku i śpiavali jaho».
Toje, što RSP robiać ciapier, taksama adhukajecca dziaŭčynie: jana nazyvaje treki «Rovar», «Bieh». Apošniaja pieśnia mocna nahadvaje Vietravaj 2020-ty, bo tady «šmat davodziłasia biehać». Liza nie znachodzić u RSP ni adnaho treka, jaki joj nie padabajecca — usio ž taki heta ŭlubiony hurt jaje dziacinstva. Jašče adzin biełaruski tvor ź jaje płejlista — Promni ad Syndrom Samazvanca, hurta, što, pavodle błohierki, ździviŭ jaje svajoj tvorčaściu.
Słuchaje Liza i ŭkrainskuju muzyku, ale nie ŭsio joj padychodzić: «Paśla 24 lutaha 2022-ha, kali ja vyjazdžała z Ukrainy, słuchała ŭkrainski hurt «Antitiła», i ciapier mnie ich słuchać składana, bo trochi tryhieryć. Mnie vielmi padabajecca toje, što robić Nadzia Darafiejeva, u jaje vielmi enierhičnyja, pazityŭnyja, prostyja treki, jakija kłasna słuchać, kali ty stamlaješsia abo tabie treba padtrymać svoj nastroj. Asabliva mnie daspadoby pieśnia «Ŝob nie zijti z rozumu».
Jašče z ukraincaŭ adznaču Arcioma Pivavarava, navat była na jaho kancercie. U jaho jość prajekt, dzie jon biare vieršy ŭkrainskich kłasikaŭ i robić ź ich fajnyja sučasnyja treki, jakija stanoviacca vielmi papularnymi. Heta mocna, ja b chacieła, kab i ŭ Biełarusi byŭ taki vykanaŭca. Možna pasłuchać ich duet z Nadziaj Darafiejevaj «Dumi», duet z Naściaj Kamienskich «Tam u topoli», «Oči». Zaraz jon maje adnosna novy trek «Ti znaješ, ŝo ti ludina».
Luboŭ da roku vyklikała ŭ Lizy i zachapleńnie kłasičnaj muzykaj u sučasnaj apracoŭcy. Da prykładu, heta Bietchovien, Bach i Vivaldzi, abo, naprykład, pryhožaje tanha. Takija rečy, dzielicca biełaruska, čamuści nahadvajuć joj rok, i pad heta dziaŭčynie kamfortna pracavać. Kłasičnaja muzyka, raskazvaje Liza, dapamahaje joj kancentravać dumki na pracy.
«Naša Niva» — bastyjon biełaruščyny
PADTRYMAĆŠto słuchaje Saša Ivulin — płejlist
Ukrainka z rasijskim pašpartam źbiraje «Minsk-Arenu». Try razy zapar
Što słuchać pa-biełarusku? Top papularnych piesień u Spotify na rodnaj movie PŁEJLIST
Kamientary