Stała viadoma, jak i kali źbirajucca pravodzić vybary ŭ Kaardynacyjnuju radu

8 śniežnia delehaty Kaardynacyjnaj rady pryniali rašeńnie, što novy skład arhanizacyi buduć abirać sami biełarusy pramym hałasavańniem. Vybary adbuducca ŭ sakaviku 2024 hoda i buduć elektronnymi, a ŭsiaho biełarusam treba budzie vybrać 120 «deputataŭ». Vosiem ź ich — heta siabry asnoŭnaha składu Rady, jakija na hety momant znachodziacca ŭ źniavoleńni. 18 miescaŭ atrymajuć pradstaŭniki arhanizacyj hramadzianskaj supolnaści.

«Ludzi ŭ Biełarusi zmohuć prahałasavać, zarehistravaŭšysia pa numary telefona, ludzi pa-za krainaj — pa dakumiencie, jaki śviedčyć asobu. Treba budzie zarehistravacca ŭ śpiecyjalnaj sistemie dla taho, kab atrymać mahčymaść prahałasavać,

— patłumačyŭ «Lusterku» schiemu Andrej Jahoraŭ. — Hałasavańnie budzie arhanizavana z dapamohaj roznych servisaŭ i dadatkaŭ i budzie čymści nahadvać toje, jak heta było zroblena ŭ płatformie «Hołas» u 2020 hodzie.

My starajemsia raspracavać rašeńnie, jakoje stanie maksimalna biaśpiečnym. Jak i luboje techničnaje rašeńnie, jano patrabuje času i raspracoŭki. Biaśpieka — heta adziny momant, jaki moža spynić nas ad praviadzieńnia vybaraŭ u sakaviku».

Pa słovach Jahorava, vybary ŭ Kaardynacyjnuju radu adbuducca pa praparcyjnaj vybarčaj sistemie. Heta značyć, biełarusy buduć hałasavać nie za asobnych kandydataŭ, a za śpisy pretendentaŭ. Maksimalna možna budzie vybrać try śpisy, minimalnaja kolkaść kandydataŭ u kožnym ź ich składzie 10 čałaviek.

Takija śpisy zmohuć farmiravać palityčnyja partyi, arhanizacyi hramadzianskaj supolnaści i lubyja inšyja abjadnańni hramadzian. Dla hetaha treba budzie padać palityčnuju prahramu na termin nie mienš za dva hady i dekłaracyju kaštoŭnaściaŭ, na asnovie jakich sfarmiravany palityčny subjekt.

Nie mienš za 40% kandydataŭ u kožnym śpisie pavinny składać žančyny. Pry raźmierkavańni miescaŭ u śpisach pieramožcaŭ dvoje ź piaci ludziej, jakija prajšli ŭ Kaardynacyjnuju radu ad kožnaha vybarčaha abjadnańnia, taksama pavinny być žančynami.

Taksama Jahoraŭ adznačyŭ, što pravodzić vybary budzie svaja asobnaja Centralnaja vybarčaja kamisija. Rašeńnie ab miechaniźmie jaje farmiravańnia jašče nie pryniata — heta budzie zroblena ŭ najbližejšy čas, a dziejnyja delehaty KR prymuć śpiecyjalnaje pałažeńnie ab CVK.

Ahitacyjnaja kampanija na vybarach u KS pačniecca ŭ lutym. Heta zroblena dla taho, kab jana prajšła paralelna z aficyjnymi vybarami ŭ Pałatu pradstaŭnikoŭ i miascovyja saviety, jakija projduć u Biełarusi 25 lutaha 2024 hoda.

Paŭnamoctvy dziejnaha składu Kaardynacyjnaj rady minajuć 8 lutaha 2024 hoda. Jahoraŭ zajaviŭ, što bližej da hetaj daty budzie pryniata rašeńnie albo ab praciahu pracy biahučaha sklikańnia, albo ab jaje prypynieńni da farmiravańnia novaha składu KR.

• 15
• 0
• 9
• 7
• 1
• 0
• 5
• 0