Alena Žyvahłod i Alaksandr Dabravolski. Fota: archiŭ Aleny Žyvahłod i fejsbuk Alaksandra Dabravolskaha
«My vykarystoŭvajem palityčnaje šou režymu Łukašenki jak nahodu abmierkavać situacyju ŭ krainie»
Inicyjatyva «Česnyja ludzi» prapanuje ŭ adziny dzień hałasavańnia vykarystać «aktyŭny bajkot» — pryjści na ŭčastki i pastavić u biuleteni ptušačku «suprać usich».
«Vynik hetaj kampanii — nie pratesty abo pracenty hałasavańnia. Heta novyja ludzi, novyja idei, novyja abmierkavańni i dadatkovaja ŭvaha da koraniu ŭsich prablem Biełarusi — palityčnaj sistemy, vybudavanaj vakoł dyktatara, a nie ludziej», — adznačajecca ŭ zvarocie inicyjatyvy «Česnyja ludzi».
Lidarka supołki Alena Žyvahłod tłumačyć: «My vykarystoŭvajem hetaje palityčnaje šou režymu Łukašenki jak nahodu abmierkavać situacyju ŭ krainie z novymi ludźmi, atrymać asabisty dośvied i ŭmacavać hramadzianskuju supolnaść, — tłumačyć jana. — Raskazać znajomamu ŭ čarzie pra toje, što nam žadajuć pryznačyć deputataŭ, i rastłumačyć, čamu vy płanujecie pastavić suprać usich — heta i jość aktyŭny bajkot».
Alena Žyvahłod. Fota: archiŭ Aleny Žyvahłod
Pa słovach Aleny Žyvahłod, sens aktyŭnaha bajkotu ŭ tym, kab pašyrać koła paplečnikaŭ i vykazać niazhodu z dyktaturaj praz dastupnyja mietady.
«Adziny dzień «hałasavańnia» — heta nie finalny punkt, — davodzić Alena Žyvahłod. — Heta nahoda dla ahulnych dziejańniaŭ. Razmaŭlać ź siabrami dy blizkimi pra vybary, stavić «suprać usich» — usio heta pra dziejańnie, pra toje, kab nie pahadžacca z dyktaturaj».
Alena Žyvahłod nastojvaje, što stratehija «Česnych ludziej» nie razychodzicca z ofisam Śviatłany Cichanoŭskaj.
«Heta mahčymaść apavieści bolš šyrokamu kołu ludziej pra toje, što adbyvajecca ŭ krainie, z pravami čałavieka, palitviaźniami, jak Łukašenka dapamahaje Pucinu ŭ vajnie i hetak dalej, — tłumačyć jana. — Dyktatury tolki i treba, kab my byli ŭ apatyi, siadzieli doma i sumavali. A my pavinny rabić, nakolki heta biaśpiečna: zachoŭvać siabie, abjadnoŭvacca, abmieńvacca navinami, nie advaročvacca ad palityki».
Alena Žyvahłod zaŭvažaje, što biez aktyŭnaha ŭdziełu hramadzian nie budzie nijakaj demakratyi.
Što da roźnicy ŭ stratehijach, to, pavodle jaje mierkavańnia, heta «całkam naturalna dla demakratyčnaha pracesu», bo «dapamahaje bolš šyrokamu abmierkavańniu».
«U situacyi, kali «adziny dzień hałasavańnia» nie źjaŭlajecca revalucyjnym i vynik viadomy zahadzia, to roznaść u taktycy nie škodzić demakratyčnamu ruchu», — padkreślivaje Žyvahłod, jakaja taksama źjaŭlajecca siabram Kaardynacyjnaj rady.
«Niama sensu ŭdzielničać u imitacyi»
Śviatłana Cichanoŭskaja zaklikała bajkatavać vybary. Jaje staršy palityčny daradca Alaksandr Dabravolski padkreślivaje: ciapier niama nijakich umovaŭ dla vybaraŭ u Biełarusi. Kožny dzień aryštoŭvajuć 15 — 20 čałaviek, navat za łajki ŭ sacyjalnych sietkach. U turmach tysiačy ludziej pa palityčnych matyvach. Likvidavany ŭsie apazicyjnyja partyi, niezaležnyja ŚMI i tysiačy hramadskich arhanizacyj. Tych, chto ŭdzielničaŭ u nazirańni ci staviŭ podpisy za niezaležnych kandydataŭ, zvalniajuć z pracy ci aryštoŭvajuć.
«Sistema falsifikacyj zastałasia raniejšaj, vynik viadomy zahadzia, — davodzić jon. — Nam prapanujuć pa sutnaści biazvybary, demanstrujučy pahardu da prava ludziej vybirać. Ale my pakidajem za saboj prava ź nie mienšaj pahardaj stavicca da padmanu. My nie majem namieru dapamahać «pieraharnuć staronku», vydaŭšy biezvybary za hałasavańnie».
Tamu, praciahvaje palityk, «my zaklikajem admovicca ad udziełu ŭ hetym padmanie i imitacyi, u lubych mierapryjemstvach, ź im źviazanych».
Kali nasupierak svajoj voli niechta pryjdzie na vybarčy ŭčastak, rekamiendujuć hałasavać suprać usich.
Alaksandr Dabravolski. Fota: fejsbuk Alaksandra Dabravolskaha
Alaksandr Dabravolski tłumačyć, što daje takaja stratehija na prykładzie hulni z šuleram.
«U vas prosty vybar: ustupić u hulniu ci admovicca. U ašukanca vy vyjhrać nie možacie, adnak možacie nie dać vyjhrać jamu. Dla hetaha prosta nie treba iści na jaho ŭmovy, — adznačaje jon. — Ujavicie sabie: vašaj mamie pa telefonie chtości kaža, što joj treba addać kamuści svaje hrošy. Pieršaje, što treba zrabić — heta admovicca. Viadoma, ašukaniec pavinien panieści adkaznaść, ale najpierš treba nie paddacca na padman».
Pavodle słoŭ palityka, pazicyja Ofisu Cichanoŭskaj i inicyjatyvy «Česnyja ludzi» supadajuć u hałoŭnym: «treba vykazać niedavier ašukancam i pratest suprać padmanu».
Roźnica adnak u tym, što Ofis nie zaklikaje iści na vybarčyja ŭčastki.
«Na naš pohlad, niama sensu ŭdzielničać u imitacyi, — kaža Alaksandr Dabravolski. — Adnak my viedajem, što mnohich ludziej prymusiać pryjści pahrozami. U takim vypadku my prapanujem prahałasavać suprać usich kandydataŭ. Takim čynam, my ŭsie zaklikajem vykazać svoj pratest suprać ašukanstva, prapanujučy choć i roznyja, ale blizkija pa sensie formy pratestu».
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»Hladzicie taksama:
Jak u Biełarusi mohuć adbycca pieramieny? Apazicyja razhladaje čatyry varyjanty
Dziaržprapahanda abvinavačvaje demsiły ŭ raźjadnanaści. A jak na samaj spravie?
Žyvahłod z «Sumlennych ludziej»: Z nami źviazałasia ŭžo 150 členaŭ kamisij
