Jakaja piensija budzie ŭ Łukašenki paśla adychodu ad ułady?
Pavodle zakona, paśla śmierci eks-kiraŭnika dziaržavy ź biudžeta pavinny płacić usim členam jaho siamji.
Dniami deputaty ŭchvalili praŭki ŭ zakon «Ab prezidencie Respubliki Biełaruś», jakija harantujuć šykoŭnaje žyćcio na piensii Łukašenku i jahonaj siamji. Pra jakuju sumu vypłat idzie havorka?
U abnoŭlenym zakonie havorycca, što eks-prezident praciahnie pažyćciova atrymlivać zarpłatu štomiesiac u 100-pracentnym pamiery. Hetyja vypłaty harantujucca niezaležna ad taho, ci jość u jaho inšyja krynicy dachodu.
Apošni raz źviestki pra zarobak Łukašenki publikavalisia pierad vybarami 2020 hoda. Tady jon paznačyŭ, što za 2019 hod zarabiŭ 117 068 rubloŭ. Heta 9755 rubloŭ na miesiac.
Kali pieraličyć u valutu, zarobak Łukašenki składaŭ kala 4670 dalaraŭ.
Adnak, jak vynikaje z abnoŭlenaha zakona, pamier rehularnych vypłat paśla adychodu ad ułady budzie roŭny zarobku novaha dziejučaha prezidenta.
Takim čynam Łukašenku nie budzie strašnaja nijakaja devalvacyja abo denaminacyja biełaruskaha rubla. Tak jon zaściaroh siabie ad traplańnia ŭ pastku, u jakoj apynuŭsia pieršy kiraŭnik niezaležnaj Biełarusi Stanisłaŭ Šuškievič, kali ciaham niekalkich hadoŭ atrymlivaŭ piensiju ekvivalentnuju niekalkim dalaram. U 2013-m, naprykład, piensija pieršaha kiraŭnika niezaležnaj Biełarusi składała 37 centaŭ, a ŭ 2015-m — 20 centaŭ.
Nahadajem, Łukašenka ŭ 1997-m admianiŭ pastanovu parłamienta ab pažyćciovaj piensii byłomu premjeru i kiraŭniku dziaržavy ŭ pamiery 70-75% ad akładu dziejnaha premjera i śpikiera. Heta aznačała, što piensii byli zafiksavanyja na ŭzroŭni sum, paznačanych na momant vydańnia dekreta.
Dabicca pavyšeńnia piensii ŭ Šuškieviča atrymałasia tolki naprykancy 2015 hoda — jon staŭ atrymlivać 220 dalaraŭ.
Pakłapaciŭsia pra siamju
Viartajučysia da asoby Łukašenki — za košt biudžetu budzie arhanizavana nie tolki jaho pachavańnie i ŭviekaviečańnie pamiaci.
Zhodna z zakonam, paśla śmierci eks-prezidenta kožnamu z členaŭ jaho siamji pažyćciova pryznačajecca hrašovaje ŭtrymańnie (100% ad zarpłaty dziejnaha prezidenta) niezaležna ad najaŭnaści ŭ ich inšych krynic srodkaŭ da isnavańnia.
Chto majecca na ŭvazie pad členami siamji, jakija paśla śmierci eks-prezidenta buduć atrymlivać prezidenckuju zarpłatu, nie ŭdakładniajecca.
Taksama, zhodna z abnoŭlenym zakonam, sam eks-prezident i členy jaho siamji buduć mieć dziaržaŭnuju achovu.
Aproč hetaha, byłomu prezidentu biaspłatna pieradajecca va ŭłasnaść na vybar dla pastajannaha pražyvańnia nieruchomaść, jakaja znachodzicca ŭ dziaržaŭnaj ułasnaści ŭ Biełarusi, uklučajučy ziamielny ŭčastak z raźmieščanymi na im kapitalnymi pabudovami, inšaj nieruchomaściu, u tym liku haspadarčaha pryznačeńnia, a taksama ruchomaja majomaść, źviazanaja z dobraŭparadkavańniem i ekspłuatacyjaj nieruchomaści, havorycca ŭ dakumiencie.
Całkam aznajomicca z dakumientam možna pa spasyłcy.
«Naša Niva» — bastyjon biełaruščyny
PADTRYMAĆ
Kamientary