List Bondaravaj staršyni Biełteleradyjokamapanii Ivanu Ejsmantu. Fota: sacyjalnyja sietki Bondaravaj
Nahodaju dla zvarotu da staršyni Biełteleradyjokampanii Ivana Ejsmanta stała pieradača «Navahodniaja śpioka», jakaja vyjšła na kanale «NTV-Biełaruś» adrazu paśla vystupleńnia Łukašenki.
U svaim liście Bondarava aburajecca, što ŭ joj byli pakazany rasijskija artysty, jakija prymali ŭdzieł u «hołaj viečaryncy». Siarod ich ANNA ASTI, Filip Kirkoraŭ, Łalita Milaŭskaja, Dzima Biłan, Hluk'OZA i inšyja. Bondarava zaŭvažaje, što ŭ toj čas, jak u Rasii ich źniali z usich kanałaŭ, «kiraŭnictva kanała NTB-Biełaruś paličyła dapuščalnym ihnaravać niehatyŭny rezanans ad hetaj pravakacyi».
Danosčyca ličyć, što pieradača, jakaja tranślavałasia ŭ zapisie, musiła być adredahavanaja.
Ale «Navahodniaja śpioka»— heta tolki nahoda nahadać kiraŭnictvu Biełteleradyjokamapanii ab inšych «niehatyŭnych momantach», jakija zafiksavała Bondarava.
Jana źviarnuła ŭvahu na pieradaču «Faktar baj», dzie, pa jaje mierkavańni, «nieadnarazova praskokvali sceny raspusnaha i niedapuščalnaha źmiestu».
Kadry ź pieradačy «Faktar.BY», jakija Bondarava prykłała da svajho lista na imia staršyni Biełteleradyjokampanii Ivana Ejsmanta. Krynica: sacyjalnyja sietki Bondaravaj.
Akramia hetaha, jana nie moža zrazumieć, jak na našym telebačańni mohuć demanstravać ukrainskaje šou «Bahinia šopinhu. Bitva błandzinak», dzie viadučymi zjaŭlajucca transhiendar, niebinarny čałaviek i andrahinka, jakija «dyskredytujuć bazavyja asnovy našaj dziaržavy».
Ale i heta nie ŭsio. Bondaravaj nie padabajecca, što ŭ pieradačach na BT prysutničaje «Zinaida Furor», jakaja na samoj spravie zjaŭlajecca mužčynam Jaŭhienam Jermałkovičam «u vobrazie toŭstaj žančyny».
Kadry ź pieradačy «Bitva błandzinak» i Zinaidy Furor, jakija Bondarava prykłała da svajho lista na imia staršyni Biełteleradyjokampanii Ivana Ejsmanta. Krynica: sacyjalnyja sietki Bondaravaj.
Prapahandu spažyvańnia narkotykaŭ, amaralnych i asacyjalnych pavodzin, ŁHBT a taksama niehatyŭnych adnosin da pradstaŭnikoŭ siłavych struktur Bondarava ŭbačyła ŭ klipie «Kosmarejv» hurta «Bih bojz».
Tekst pieśni «Kosmarejv» hurta «Bih bojz». Krynica: sacyjalnyja sietki Bondaravaj.
U adkazie za podpisam namieśnika staršyni Biełteleradyjokampanii Andreja Ivanca adznačana, što parušeńniaŭ zakanadaŭstva niama. Bolš za toje, mnohija hledačy prosiać pakazvać u efiry telepieradač artystaŭ z Rasii, jakich Bondarava zhadvaje ŭ svaim liście.
U liście adznačajecca, što mierkavańnie pradstaŭnikoŭ hladackaj aŭdytoryi ab źmieście tych ci inšych telepieradač mohuć nie supadać, tamu Bondaravaj rekamiendujecca źviarnuć uvahu na takija pieradačy, jak «Panarama», «Hałoŭny efir», «Razmova ŭ Prezidenta», «Zrazumiełaja palityka», «Kłub redaktaraŭ».
Adkaz Biełteleradyjokampanii na list Bondaravaj. Fota: sacyjalnyja sietki Bondaravaj.
U kancy lista Bondaravaj vykazali dziažurnuju padziaku za prajaŭlenuju cikavaść da videasiužetaŭ i pieradač Biełteleradyjokampanii.
Zrazumieła, što taki adkaz danosčycy nie spadabaŭsia. «Nie, usio-taki nielha z našymi tebešnikami pracavać cicha, nie źviartajučy hramadskaj uvahi: jany žesty dobraj voli prymajuć za słabaść i plujuć na praciahnutuju da ŭzajemadziejańnia ruku», — napisała Bondarava na svajoj staroncy, dzie i vykłała pierapisku.
Čytajcie jašče:
Chto moža pieramahčy Bondaravu i na kaho ŭpłyvaje Azaronak
Danosčyca Bondarava idzie ŭ deputaty Minharsavieta
«U nas Ejsmantu možna ŭsio?» Bondarava atakavała kiraŭnika BT za navahodni kancert
