Respublikanskaja vystava «1,10 kvadrata», prymierkavanaja da 110-hodździa «Čornaha kvadrata», adkryłasia ŭ Nacyjanalnaj biblijatecy.
Ekspazicyja arhanizavana sumiesna ź Biełaruskim sajuzam mastakoŭ. Hledačam byli pakazany raznastajnyja tvory viciebskich mastakoŭ, natchnionyja jak tvorčaściu Kazimira Maleviča, tak i ŭvohule suprematyzmam, piša «Źviazda».
Treba adznačyć, što heta pieršaja vystaŭka ahulnaha adnajmiennaha prajekta, jaki budzie prachodzić na praciahu hoda na roznych vystavačnych placoŭkach Biełarusi.
— Dumaju, u Viciebsku kožny mastak ličyć siabie abaviazanym choć adnu pracu ŭ svaim žyćci pryśviacić Kazimiru Maleviču, bo heta horad, u jakim praktyčna naradzilisia Paryžskaja škoła i suprematyzm, — raspaviadaje pieršaja namieśnica staršyni Biełaruskaha sajuza mastakoŭ, mastactvaznaŭca Natalla Šaranhovič.
— Mnie zdajecca, što pryciahalnaść avanharda taho času zastajecca i siońnia. My sprabujem transfarmavać avanhard i pakazać, što ŭ peŭny momant času «Čorny kvadrat» prarvaŭ mastactva i daŭ zrazumieć: pohlad na jaho moža być inšym. Praź piksiel, kropku ci ekran možna zusim pa-inšamu ŭsprymać śviet.
Pavodle jaje słoŭ, na hetaj vystavie pradstaŭleny aŭtary roznych stylaŭ i roznych pakaleńniaŭ, ale kožny ź ich, z adnaho boku, robić svajo mastactva emacyjnym, a z druhoha — vielmi fiłasofskim. Naprykład, na vystavie pradstaŭleny dyptych «Cyrk. Słany iduć na pryščepku» Valanciny Lachovič.
Mastačcy 78 hadoŭ, ale jana da hetaha času nie prosta pracuje, ale sapraŭdy zajmajecca aktualnym mastactvam. Siarod usich karcin vielmi vyłučalisia svajoj unikalnaściu tvory maładoj mastački Vijalety Niakrasavaj, vykananyja ŭ aŭtarskaj technicy.
Heta nievierahodnaje spałučeńnie tekstylu, farbaŭ i tvorčaj idei. Taksama na vystavie možna ŭbačyć i tvory mastaka-manumientalista Vasila Vasiljeva, jaki piša nie tolki piša vialikija manumientalnyja tvory i stvaraje art-abjekty, ale i źjaŭlajecca kurataram šmatlikich mierapryjemstvaŭ, pryśviečanych avanhardnamu mastactvu.
U niekatorych hledačoŭ moža ŭźniknuć pytańnie da nazvy vystavy: čamu mienavita «1,10 kvadrata?»
— Nazva vystavy vielmi kanceptualnaja, jak i jaje źmiest. U im možna ŭbačyć aluziju na 110-hadovy jubilej, — tłumačyć zahadčyca siektara mastackich vystavak Nacyjanalnaj biblijateki Biełarusi Viktoryja Charytonava. — Jašče «0,10», — heta nazva apošniaj futurystyčnaj vystavy karcin, na jakoj u 1915 hodzie Kazimir Malevič pradstaviŭ svaje abstraktnyja pracy i kancepcyju suprematyzmu.
Pavodle jaje słoŭ, nul simvalizuje adsutnaść form, bo napramak suprematyzmu praduhledžvaŭ znajomstva z žyvapisam biez uvahi da konturaŭ i abjomaŭ tvora.
A 10 adsyłaje da dziesiaci mastakoŭ, jakija musili ŭdzielničać u vystavie ŭ 1915 hodzie. U vyniku ich akazałasia šeść čałaviek, ale nazvu vystavy pakinuli «0,10».
Ciapier čytajuć
Pamiatajecie Taćcianu Zareckuju, jakaja sa skandałam zvalniałasia z Kabinieta Cichanoŭskaj? U Estonii jaje padazrajuć u machlarstvie49
Kamientary