Za čatyry pajezdki ŭ Polšču moža atrymacca narmalnaja biełaruskaja zarpłata. Kolki zarablajuć biełaruskija čaŭnaki
Pahladzieli, na čym zarablajuć čaŭnaki va ŭmovach, kali pałova punktaŭ propusku na miažy ź ES zakrytyja, a atrymać vizu składana.
Raznastajnaść ździŭlaje
Z Polščy ŭ Biełaruś praz čaŭnakoŭ traplajuć samyja roznyja tavary. Ad praduktaŭ charčavańnia i padhuźnikaŭ da adzieńnia i aŭtamabilnych zapčastak.
Najbolšuju ŭznaharodu płaciać za pieravozku tavaraŭ, jakija padlahajuć abaviazkovamu dekłaravańniu i majuć abmiežavańni pa ŭvozie. Heta moža być bytavaja technika, aŭtamabilnyja pakryški.
Naprykład, za pieravozku kavamašyny vahoj 3 kh prapanujuć 30 dalaraŭ pry ŭmovie, što čałaviek zamarozić svaje hrošy ŭ VAT (PDV). Kali biez układańniaŭ svaich hrošaj, to $20.
Za pieravoz mikrachvaloki vahoj 19 kh dajuć 40 dalaraŭ, a za akustyčnyja kałonki vahoj 20 kh — 35 dalaraŭ. U abodvuch vypadkach čaŭnok musić zamarozić hrošy ŭ PDV da nastupnaj pajezdki.
Za pieravoz noŭtbuka koštam kala $800 dajuć 60 dalaraŭ.
U admysłovych čatach u telehram možna znajści zajaŭki na pierakid radyjataraŭ aciapleńnia. Za 12-kiłahramovy dajuć 20 dalaraŭ za pieravozku praź miažu.
Za dastaŭku matraca 1,8ch2 mietry vahoj 55 kiłahram prapanujuć 130 dalaraŭ.
Moža spatrebicca navat pryčep
Časam sustrakajucca i bolš ekskluziŭnyja prapanovy. Za pieravozku častki kuzava aŭtamabila prapanujuć 230 dalaraŭ. Zakazčyk papiaredžvaje, što dla pieravozki detali spatrebicca pryčep, bo ŭ zvyčajny bus jana nie pamieścicca.
Pieravozka niedarahich novych aŭtazapčastak apłačvajecca pa taryfie 2-3 dalary za kiłahram. Naprykład, za pieravozku machavika vahoj 15 kiłahram dajuć 35 dalaraŭ, ale treba ŭkładać hrošy ŭ PDV. Pa 2-3 dalary za kiłahram apłačvajuć pieravozku bytavoj chimii.
Mienš za ŭsio płaciać za pieravozku tavaraŭ, jakija iduć biez afarmleńnia VAT i nieabchodnaści dekłaravać ich na čyrvonym kanale. Za pieravozku kapsuł dla kavymašyny možna atrymać pa 3-4 dalary za pačku. Na čałavieka vydajuć kamplektami, za jakija ŭ zaležnaści ad kolkaści i vahi atrymlivajecca 20 abo 30 dalaraŭ.
Za adzieńnie biez VAT dajuć pa 2,5-3 dalary za kh. Za pieravoz pary abutku — $5. Dziciačaje adzieńnie aceńvajuć pa 1 dalary za adzinku. Ale praskokvajuć i bolš vyhadnyja prapanovy. Tak, naprykład, za pieravozku spalnych miachoŭ vahoj 1 kh čaŭnaku hatovy zapłacić pa 5 dalaraŭ za štuk, praŭda, biez zamarozki hrošaj u PDV nie abyścisia.
Pasiŭny dachod, abo pajezdka pasažyram
Kab zarablać na pierakidcy tavaraŭ, nie abaviazkova mieć ułasnaje aŭto. Niekatoryja ludzi zarablajuć tym, što prajazdžajuć praź miažu pasažyram, na jakoha afarmlać dekłaracyju.
Prakaciŭšysia pasažyram, čaŭnaki mohuć raźličvać na ŭznaharodu pamieram ad 50 dalaraŭ.
Pajezdki na ŭłasnym aŭto adkryvajuć bolš šyrokija mahčymaści, choć i niasuć dadatkovyja vydatki ŭ vyhladzie strachoŭki, pošliny na vyjezd za miažu i abaviazkovuju dezynfiekcyju. Tym nie mienš, aŭtamabilisty mohuć zarabić dadatkovyja hrošy na pieraprodažy paliva, jakoje u Biełarusi kaštuje ŭ 2 razy tańniej, čym u Polščy.
Taksama čaŭnaki pravoziać cyharety, praŭda, biez parušeńniaŭ vieźci možna tolki 2 pački. Zvyčajna ŭ kamplekt čaŭnaka ŭvachodzić ałkahol. U Polšču viazuć tannuju harełku, a ŭ Biełaruś naadvarot bolš darahi ałkahol z šopaŭ.
Biełaruskaja zarpłata za čatyry pajezdki ŭ Polšču
Najbolšyja zarobki na miažy majuć cyharetnyja kantrabandysty, ale razam z bolš vysokimi prybytkami jany niasuć i bolš vysokija ryzyki. U adroźnieńni ad kantrabandystaŭ, zvyčajnyja čaŭnaki «pracujuć» u miežach dazvolenych normaŭ, choć i ich dziejnaść zakonnaj nazvać składana.
Čaŭnaki-amatary zvyčajna jeździać praź miažu nie čaściej čym raz na 7 dzion, bo pry bolš častych pajezdkach značna skaračajucca limity ŭvozu tavaraŭ. Takim čynam u siarednim vychodzić čatyry pajezdki na miesiac, dziakujučy jakim žychary Bresta i vakolic mohuć zarablać 200—400 dalaraŭ u miesiac.
«Naša Niva» — bastyjon biełaruščyny
PADTRYMAĆČytajcie taksama:
Polskija pamiežniki nie prapuskajuć biełarusaŭ ź vizami PBH biez pracoŭnaha zaprašeńnia ci damovy
Razmytnienyja pa lhocie aŭto nielha budzie pradavać u Rasiju. Što źmienicca ŭ zakonie i jak heta adabjecca na Biełarusi?
Dalar vyras da maksimumu za čatyry miesiacy
Što za studentka Uljana, ź jakoj na bali valsiravaŭ Łukašenka?9
Kamientary