U Litvie zatrymali dvuch litoŭcaŭ, jakija pracavali na Biełaruś: adzin ź ich pranik u Sajuz strałkoŭ
Hienieralnaja prakuratura pieradała ŭ sud kryminalnuju spravu, u jakoj dvoje hramadzian Litvy abvinavačvajucca ŭ špijanažy na karyść Biełarusi. Padazravanyja sami prapanavali supracoŭnictva ź biełaruskaj vajennaj raźviedkaj, a adzin ź ich metanakiravana infiltravaŭsia ŭ Sajuz strałkoŭ, pry hetym pieradavaŭ nie zasakrečanuju infarmacyju, piša LRT.
Pavodle źviestak dasudovaha rasśledavańnia, u mai 2022 hoda abodva abvinavačanyja adpravilisia ŭ Minsk, dzie praz pasiarednika damovilisia ab kantaktach i dalejšym supracoŭnictvie z pradstaŭnikami vajskovych struktur Biełarusi.
U metach špijanažu adzin z abvinavačanych ustupiŭ u Litoŭski sajuz strałkoŭ i staŭ jaho aktyŭnym čalcom.
U chodzie rasśledavańnia było sabrana dastatkova dadzienych, jakija dazvalajuć mierkavać, što paśla hetaj sustrečy da svajho zatrymańnia ŭ listapadzie 2023 hoda abodva abvinavačanyja vykonvali zadańni Hałoŭnaha raźviedvalnaha ŭpraŭleńnia Hienieralnaha štaba Ministerstva abarony Biełarusi.
Pavodle materyjałaŭ spravy, biełaruskaje HRU było zacikaŭlena ŭ atrymańni infarmacyi ab dysłakavanaj u Litvie vajskovaj technicy i ŭzbrajeńni, jakoje naležyć litoŭskamu vojsku, dobraachvotnickim siłam nacyjanalnaj abarony, sajuźnikam pa NATA; ab stratehičnaj infrastruktury abjektaŭ i ich achovie; ab dziejnaści Litoŭskaha sajuza strałkoŭ i źmiestu vučeńniaŭ, jakija jon pravodziŭ; ab dziejnaści biełaruskaj apazicyi ŭ Litvie i jaje ŭdzielnikach, a taksama ab hramadzianach Litvy, jakija mahli b być zavierbavanyja.
Chacia, jak miarkujecca, infarmacyja, sabranaja i pieradadzienaja abvinavačanymi biełaruskamu HRU, nie była zasakrečanaj, jana ŭjaŭlaje kaštoŭnaść dla ŭzbrojenych sił zamiežnych dziaržaŭ pry padrychtoŭcy płanaŭ vajennaj ahresii, a taksama vykarystoŭvajecca dla inšaj dziejnaści, nakiravanaj suprać Litvy.
U ciapierašni čas da abodvuch abvinavačanych prymieniena samaja strohaja miera strymańnia — aryšt.
Maksimalnaje pakarańnie za heta złačynstva — pazbaŭleńnie voli terminam da 15 hadoŭ.
Z Łondana Mielnikava vylecieła na Šry-Łanku, u jaje byŭ kachanak spartovaha vyhladu ź Biełarusi22
Kamientary