Hrecyja stała pieršaj pravasłaŭnaj krainaj, jakaja ŭzakoniła adnapołyja šluby
Parłamient prahałasavaŭ za zakonaprajekt upeŭnienaj bolšaściu.
Parłamient Hrecyi ŭ čaćvier upeŭnienaj bolšaściu prahałasavaŭ za lehalizacyju adnapołych šlubaŭ i ŭsynaŭleńnie dziaciej adnapołymi siemjami. Hrecyja stała 37-j krainaj u śviecie i pieršaj pravasłaŭnaj krainaj, jakaja ŭzakoniła šluby ludziej adnaho połu, piša Bi-bi-si.
Za novy zakon prahałasavali 176 z 245 prysutnych deputataŭ hreckaha parłamienta.
Zakon prasoŭvaŭ asabista premjer-ministr Kiryjakas Micatakis, lidar kansiervatyŭnaj partyi «Novaja demakratyja».
Pry hetym suprać lehalizacyi adnapołych šlubaŭ vystupali dziasiatki deputataŭ ad partyi premjera, ale zatoje za jaho prahałasavali deputaty ad apazicyi, u tym liku ad levaj partyi «Siryza», čyj lidar, Stefanas Kasiełakis — hiej.
«Heta histaryčnaja viacha ŭ spravie zabieśpiačeńnia pravoŭ čałavieka, jakaja adlustroŭvaje siońniašniuju Hrecyju — prahresiŭnuju, demakratyčnuju krainu, jakaja horača vieryć u jeŭrapiejskija kaštoŭnaści», — napisaŭ premjer-ministr Micatakis u sacsietcy Ch (byłym tvitary).
Hreckaja (Eładskaja) pravasłaŭnaja carkva, jakaja maje ŭ krainie dziaržaŭny, kanstytucyjny status «pieravažajučaj relihii» i karystajecca aŭtarytetam siarod mnohich deputataŭ partyi Micatakisa, vystupaje rašuča suprać lehalizacyi adnapołych šlubaŭ.
Kiraŭnik carkvy, archijepiskap Afinski i ŭsioj Ełady Jeranim II, zajaviŭ, što novy zakon — heta sproba naviazać krainie novyja realii, jakija rujnujuć tkanku hramadstva.
U niadzielu ŭ Afinach prajšła demanstracyja suprać novaha zakona. Na jaje ź ikonami i raśpiaćciami ŭ rukach vyjšli kala čatyroch tysiač čałaviek.
Hrecyja, pa danych sacyjołahaŭ — samaja relihijnaja kraina ŭ Jeŭropie. Pa padlikach amierykanskaha Pew Research Center, da 90% žycharoŭ Hrecyi ličać siabie pravasłaŭnymi chryścijanami, 58% ź ich śćviardžajuć, što relihija hraje vielmi važnuju rolu ŭ ich žyćci.
Praŭda, u carkvu chodziać usiaho 16%, ale i heta — najvyšejšy pakazčyk va ŭsioj Jeŭropie.
Jak nahadvaje ahienctva AFP, hramadzianskija sajuzy — ale nie šluby — adnapołych par byli ŭzakonienyja ŭ Hrecyi ŭ 2015 hodzie, kali krainaj praviła partyja «Siryza». Jaje lidar, Stefanas Kasiełakis, u kastryčniku minułaha hoda pabraŭsia šlubam sa svaim partnioram u ZŠA, za što padvierhnuŭsia abrazam z boku kansiervatyŭnych palitykaŭ-hamafobaŭ.
Pryniaty pry ŭradzie «Siryzy» zakon nie dazvalaŭ adnapołym param i ŭsynaŭlać dziaciej: uziać pryjomnaje dzicia aficyjna moh adzin partnior, ale nie abodva. Nie vyrašaŭ hety zakon i prablemy spadčyny adnapołych par.
ŁHBT-arhanizacyi Hrecyi vitali pryniaćcie novaha zakona. «Siońnia — dzień radaści!» — abviaściła ŭ sacsietkach adna ź ich, «Viasiołkavyja siemji Hrecyi».
Kamientary