Łukašenka nie pojdzie na nastupny termin? Łatuška i Karbalevič adkazvajuć Čałamu

Karbalevič: Paśla 2020 hoda jon realna aścierahajecca adkaznaści

Palityčny ahladalnik «Radyjo Svaboda» Valer Karbalevič adznačaje, što prahnozy nie nadziejnaja reč, bo jany nie mohuć uličvać padziei, jakija mohuć zdarycca za hetyja paŭtara hoda, jakija zastalisia da nastupnych vybaraŭ.

«Vajna va Ukrainie, stan zdaroŭja samoha Łukašenki mohuć šmat na što paŭpłyvać. Ale kali ničoha ekstraardynarnaha nie zdarycca i status-kvo zachavajecca, to najbolš imaviernym vyhladaje scenar, što Łukašenka budzie ŭdzielničać u nastupnych vybarach».

Pa-pieršaje, sam Łukašenka pra heta davoli prazrysta namiakaje. I tut, na dumku analityka, jamu možna daviarać.

«Pa-druhoje, heta vynikaje z łohiki palityčnaha pracesu. Paśla ŭsiaho taho, što Łukašenka narabiŭ paśla 2020 hoda, jon realna aścierahajecca adkaznaści. I hety strach całkam abhruntavany», — ličyć Valer Karbalevič.

Pavialičyć

Analityk kaža, što ŭ historyi chapaje prykładaŭ, kali dyktataraŭ pryciahvali da adkaznaści praź niejki čas, navat kali tyja zabiaśpiečvali siabie šmatjarusnymi harantyjami biaśpieki, zakładali ich u Kanstytucyju.

«Ale heta nie pracuje, lubyja zakony možna admianić, źmianić Kanstytucyju. Harantyi pierajemnikaŭ taksama nielha nazvać vielmi nadziejnymi. Kazachstan — jaskravy prykład.

Da taho ž treba być upeŭnienym, što pierajemnik zmoža nadoŭha zastacca va ŭładzie. Što na jaho miesca nie pryjduć chutka inšyja ludzi, jakija ničoha nikomu nie harantavali», — adznačyŭ Karbalevič.

Usiebiełaruski narodny schod (UNS) analityk taksama nazyvaje nie vielmi nadziejnaj kanstrukcyjaj, bo jana moža spracavać, a moža i nie.

Tamu prynamsi pry zachavańni status-kvo Łukašenka budzie imknucca da pažyćciovaj ułady, zajmajučy adnačasova status kiraŭnika UNS i kiraŭnika dziaržavy.

 Karbalevič taksama nie vieryć u varyjant, kali Łukašenka abiare ŭ jakaści pierajemnika adnaho sa svaich synoŭ.

«Toj, chto atrymaje ŭładu paśla Łukašenki ŭ jakaści pierajemnika, musić być zdolnym hetuju rolu vykonvać. Sam Łukašenka niekalki razoŭ kazaŭ, što nie bačyć u Viktara takich zdolnaściej. Sam fakt taho, što Viktar nie zajmaje nijakaj dziaržaŭnaj pasady, źjaŭlajecca vielmi pakazalnym».

Karbalevič kaža, što, nakolki jamu viadoma, padčas krytyčnych padziej 2020 hoda Viktar Łukašenka vystupiŭ suprać žorstkaha scenaru padaŭleńnia pratestaŭ, praz što patrapiŭ u apału i byŭ nakiravany kiraŭnikom Nacyjanalnaha alimpijskaha kamiteta, jaki pa svaim jurydyčnym statusie źjaŭlajecca hramadskaj arhanizacyjaj.

«Tamu, kali b, naprykład, Viktara rychtavali da roli pierajemnika, to jaho pryznačyli b na pasadu čynoŭnika, a jon naadvarot straciŭ tuju palityčnuju vahu, jakuju mieŭ raniej, kali zajmaŭ pasadu pamočnika prezidenta».

Valer Karbalevič ličyć, što praz roznahałośsi baćki i syna ŭ 2020 hodzie Alaksandr Łukašenka nie budzie rabić staŭku na Viktara.

«Pazicyju Viktara možna było zrazumieć, bo jon, napeŭna, chacieŭ zastavacca žyć u Biełarusi i paśla taho, jak jaho baćka zhubić pasadu. Ale paśla taho, što Alaksandr Łukašenka narabiŭ paśla 2020 hoda, ciažka ŭjavić, jak heta budzie mahčyma. Tamu praz heta Viktar Łukašenka moh być prychilnikam bolš łahodnaha varyjantu vychadu z kryzisu», — ličyć Karbalevič.

@nashaniva Łukašenka nie budzie bałatavacca na nastupnych vybarach #čałyj #łukašienko #biełaruś #novostibiełarusi #biełaruśnovosti #aleksandrłukašienko #našaniva ♬ The Cruel 5 - Mr Obed

Łatuška: Viktar Łukašenka moža atrymać u spadčynu poŭny kantrol nad dziaržavaj

Hałoŭnym sensam žyćcia Łukašenki Pavieł Łatuška nazyvaje ŭładu. Tamu jon ličyć, što Łukašenka budzie vieści baraćbu za jaje da apošniaha ŭzdychu.

«Heta toj čałaviek, jaki naŭrad ci admovicca ad ułady samastojna. Badaj, adziny varyjant, kali jon moža heta zrabić sam — stan zdaroŭja, jaki nie dazvolić jamu praciahvać utrymlivać uładu i kiravać dziaržavaj. Davoli ciažka ŭjavić sabie dyktatara, jaki, naprykład, pierasoŭvajecca ŭ invalidnym vazku», — ličyć kiraŭnik Narodnaha antykryzisnaha ŭpraŭleńnia i pradstaŭnik Abjadnanaha pierachodnaha kabinieta.

Pavialičyć

Mienavita stan zdaroŭja Łatuška nazyvaje tym adzinym faktaram, jaki moža paŭpłyvać na rašeńnie admovicca ad udziełu ŭ nastupnych vybarach.

«Ale tut taksama varta razhladać situacyju ŭ kantekście dvojeŭładździa, jakoje ŭžo stvarajecca na našych vačach. Źjaŭlajecca novaja pasada — staršynia Usiebiełaruskaha narodnaha schodu. Z farmalnaha punktu hledžańnia, jana moža ŭsprymacca navat vyšejšaj za pasadu prezidenta».

U takim vypadku heta budzie ŭmoŭny zychod, bo Łukašenka zojmie hanarovuju pasadu staršyni UNS i atrymaje status «smatračaha» za krainaj i za tym, kamu jon pieradaść funkcyi prezidenta.

«Łukašenka, jak dyktatar, nie daviaraje nikomu, jon nie maje siabroŭ. Jon taksama zapałochany. Asabliva ŭ apošnija hady ŭtrymańnia ŭłady. Heta i vyklikaje jašče bolš masavyja represii ŭ krainie. Tut spracoŭvaje jak pomsta za toje, što ŭ jaho razumieńni narod jamu nibyta zdradziŭ, tak i strach paŭtareńnia 2020 hoda. Kali my kažam pra mahčymaha pierajemnika, to takoj asobaj moža być tolki chtości z členaŭ jaho siamji».

Pavieł Łatuška ličyć, što takim patencyjałam vałodaje tolki starejšy syn Łukašenki — Viktar. Jon jak syn nie zdradzić svajmu baćku i sistemna budzie zachoŭvać jaho spadčynu.

Łatuška ličyć, što Alaksandr Łukašenka choča ŭvajści ŭ historyju jak čałaviek, jaki stvaryŭ niezaležnuju Biełaruś.

«Jamu nie ŭsio roŭna, što adbudziecca ź jaho spadčynaj paśla śmierci. U vypadku, kali jaho miesca zojmie Viktar, jon razumieje, što toj zachavaje jaho imia ŭ historyi, prynamsi na niejki čas, jak stvaralnika, a nie razburalnika.

U inšym vypadku źmiena ŭłady budzie aznačać poŭnuju desakralizacyju Łukašenki.

Pavialičyć

Kali da ŭłady pryjdzie asoba nie ź siamji, to jana budzie abvinavačvać va ŭsich prablemach mienavita Łukašenku. Viktar ža nie budzie vykarystoŭvać heta ŭ publičnaj prastory».

Tym nie mienš, Łatuška miarkuje, što chutčej za ŭsio jak minimum da 2025 hoda składziecca situacyja, kali Łukašenka budzie niezakonna ŭtrymlivać dźvie pasady: prezidenta i staršyni UNS.

«I tut cikava, što Łukašenka padpisaŭ ukaz, zhodna ź jakim u staršyni UNS źjaŭlajecca namieśnik. Pryznačeńnie niekaha na hetuju pasadu budzie mieć važnaje značeńnie ŭ razumieńni dalejšych źmienaŭ va ŭładzie. Kali hetuju pasadu zojmie Viktar, stanie zrazumieła, što jon pieradaje ŭ spadčynu pasadu svajmu synu. I tady tearetyčna vyrastaje šaniec, što Viktar moža bałatavacca na pasadu prezidenta.

Kali ŭjavić sabie takuju situacyja, što Alaksandr Łukašenka pamiraje, a Viktar budzie pryznačany prezidentam Biełarusi i adnačasova źjaŭlacca namieśnikam staršyni UNS, to jon paśla Łukašenki atrymaje ŭ spadčynu i pasadu staršyni UNS. Heta budzie aznačać poŭny kantrol nad dziaržavaj, što važna dla Alaksandra Łukašenki paśla jaho adychodu. Jon taksama dumaje pra heta», — upeŭnieny Pavieł Łatuška.

Inšym faktaram, jaki moža spryjać pakidańniu Łukašenkam pasady, Łatuška nazyvaje nievykanańnie daručeńniaŭ Pucina.

«U takim vypadku Maskva moža stvaryć umovy, pry jakich jon nie zmoža bałatavacca abo nie zmoža zabiaśpiečyć sabie pieraabrańnie».

Čytajcie taksama:

Viadučaja ANT Natalla Niemahaj: Mnie da dźviarej prynosili pachavalnyja vianki

U Žłobinie na padvorkach staviać rasijskija ściahi. Miascovyja siłaviki heta tolki vitajuć

• 10
• 0
• 7
• 2
• 6
• 11
• 42
• 0