Rasija druhuju noč zapar nanosić masiravany rakietny ŭdar pa Ukrainie
Pavietranyja siły USU paviedamili, što rasijskija vojski zapuścili ŭ bok Ukrainy kryłatyja rakiety. Niekatoryja rajony krainy pad pahrozaj błekaŭtu i prablem z vodazabieśpiačeńniem.
«Zafiksavanyja puski kryłatych rakiet z samalotaŭ Tu-95MS. Puski kryłatych rakiet zafiksavanyja z rajona Kaśpijskaha mora. Raźlikovy čas uvachodžańnia ŭ pavietranuju prastoru Ukrainy — kala 05:00», — havorycca ŭ paviedamleńni USU.
U vyniku rasijskich abstrełaŭ Charkava hetaj nočču nazirajucca prablemy z elektrazabieśpiačeńniem, u horadzie čutnyja vybuchi, paviedamiŭ mer Ihar Cierachaŭ.
«Ciapier kala 15 vybuchaŭ u Charkavie. U horadzie prablemy sa śviatłom — vorah celicca pa enierhietyčnaj infrastruktury. Jość pažary na miescach niekatorych prylotaŭ», — napisaŭ jon u telehramie.
Cierachaŭ zaklikaŭ žycharoŭ horada być aściarožnymi z-za niebiaśpieki novych abstrełaŭ.
«Z-za abiastočvańnia pompavych padstancyj u horadzie ŭžo nazirajucca prablemy z vodazabieśpiačeńniem. Taksama ranicaj na maršruty nie vyjdzie elektratranspart — pieravozki buduć ažyćciaŭlać aŭtobusy pa schiemie błekaŭta», — dadaŭ mer.
Kryvy Roh taksama atakavali rakiety i drony, paciarpieła krytyčnaja infrastruktura
«Kambinavanaja ataka varožymi rakietami i «šachiedami». Jość trapleńni ŭ abjekty krytyčnaj infrastruktury. Dzie jość mahčymaść, lepš nabrać vady i padzaradzić hadžety i paŭerbanki. Nahadvaju, što ŭ horadzie pracuje 213 punktaŭ niazłomnaści, u jakich usio jość», — napisaŭ Alaksandr Viłkuł.
Pavodle jaho słoŭ, u horadzie ŭviedzieny hrafiki avaryjnych adklučeńniaŭ. Balnicy i inšyja abjekty infrastruktury pa mahčymaści pierachodziać na hienieratary.
Pa Zaparožžy nanieśli vosiem rakietnych udaraŭ
«Vosiem rakietnych udaraŭ vorah nanios pa Zaparožžy. Naniesieny ŭdary pa abjektach infrastruktury, paciarpieli cyvilnyja damy. Infarmacyju ab paciarpiełych udakładniajem», — napisaŭ u telehramie kiraŭnik abłasnoj administracyi Ivan Fiodaraŭ.
Taksama pad pahrozaj adklučeńnia Zaparožskaja AES. A ŭ vakolicach Zaparožža rakieta trapiła ŭ płacinu na Dniapry.
U Chmialnickim jość zahinułyja i paranienyja mirnyja žychary, paviedamiŭ mer Simčyšyn. Paškodžanyja žyłyja damy i abjekty infrastruktury.
Łatuška: Ryžankoŭ maryć stać prezidentam Biełarusi i nienavidzić Łukašenku. Jon nie projdzie detektar chłuśni6
Kamientary