Ukraina naroščvaje vytvorčaść ułasnaj zbroi, ale ci dastatkova chutka?
Za dva hady armija Ukrainy atrymała niekalki novych vidaŭ zbroi, na vypusk zbroi ŭnutry krainy ŭ 2024 hodzie płanujecca vydatkavać kala 6 miljardaŭ dołaraŭ (ź ich adzin miljard na bieśpiłotniki). U krainie razhortvajuć vytvorčaść jeŭrapiejskija inviestary. Adnak hety praces moh by iści chutčej.
Jak piša The New York Times, na momant uvarvańnia Rasii ŭkrainskaja armija mieła tolki adnu samachodnuju artyleryjskuju sistemu «Bahdana». Pry hetym tolki jana mahła stralać snaradami kalibru NATA. Cistema była nastolki efiektyŭnaj u pieršyja dni vajny, što jaje pieramiaščali pa poli boju pa ŭsioj krainie.
Ciapier abaronnaja pramysłovaść Ukrainy štomiesiac vypuskaje vosiem takich sistem, što śviedčyć pra patencyjny bum vytvorčaści zbroi ŭnutry krainy.
Hety rost adbyvajecca ŭ vyrašalny momant, kali rasijskaja vajskovaja mašyna ŭ čatyry razy pavialičyła svaju vytvorčaść. U toj ža čas pakiet dapamohi ZŠA dla Ukrainy znachodzicca na razhladzie Kanhresa, a jeŭrapiejskija abaronnyja kampanii ź vialikaj aściarožnaściu naładžvajuć svaju vytvorčaść u krainie.
U takoj situacyi Ukrainie nieabchodna adnavić svaju abaronnuju pramysłovaść, kab nie zaležać ad Zachadu. Pakul nieviadoma, ci atrymajecca heta zrabić svoječasova, kab źmianić trajektoryju vajny.
Razam z tym, vydańnie adznačaje, što ŭkrainskija vajskovyja inžyniery ŭžo prademanstravali dziŭnaje ŭmieńnie prystasoŭvać staryja sistemy ŭzbrajeńniaŭ da bolš sučasnaj ahniavoj mocy.
Tolki za apošni hod ukrainskija abaronnyja pradpryjemstvy vypuścili ŭ try razy bolš bronietechniki, čym vyrablali da 2022 hoda, i ŭ čatyry razy pavialičyli vytvorčaść supraćtankavych rakiet, pavodle danych ukrainskaha ŭrada.
Płanujecca, što finansavańnie daśledavańniaŭ i raspracovak sioleta ŭzraście ŭ vosiem razoŭ — da 1,3 miljarda dołaraŭ. Pry hetym u 2023 hodzie vajskovyja zakupki padskočyli da 20-hadovaha maksimumu i skłali amal 10 miljardaŭ dołaraŭ, u toj čas jak da poŭnamaštabnaj vajny hety pakazčyk składaŭ kala 1 miljarda dołaraŭ u hod.
Na zbroju, vyrablenuju ŭnutry krainy, u 2024 hodzie płanujecca vydatkavać kala 6 miljardaŭ dołaraŭ (ź ich adzin miljard na bieśpiłotniki).
Ale praciahły pieryjad spadu vajskovaj pramysłovaści chutčej za ŭsio budzie ciažka pieraadoleć, jak i naładzić vytvorčaść niekatorych vidaŭ zbroi. Siarod apošniaj tak nieabchodnyja na poli boju 155-milimietrovyja snarady. Ich vytvorčaść zaležyć ad impartnaj syraviny i licenzijnych pravoŭ zachodnich vytvorcaŭ ci ŭradaŭ.
Vydańnie cytuje słovy ministra pa pytańniach stratehičnych halin pramysłovaści Ukrainy Alaksandra Kamyšyna, jaki abiacaje, što vytvorčaść hetych snaradaŭ «na padychodzie», ale nie ŭdakładniaje terminaŭ.
Palityčnyja lidary ŭ Jeŭropie, jakija aścierahajucca asłableńnia amierykanskaj padtrymki, i kiraŭniki pradpryjemstvaŭ, jakija bačać rynkavyja mahčymaści, zaachvočvajuć vajskovuju vytvorčaść va Ukrainie, navat kali spatrebicca niekalki hadoŭ na toje, kab vajskovaja pradukcyja trapiła na pole boju.
Niamiecki hihant vajskovaj pramysłovaści Rheinmetall i turecki vytvorca bieśpiłotnikaŭ Baykar znachodziacca ŭ pracesie budaŭnictva zavodaŭ va Ukrainie. U sakaviku ministr abarony Francyi zajaviŭ, što try francuzskija kampanii, jakija vyrablajuć bieśpiłotniki i naziemnaje vajskovaje abstalavańnie, blizkija da zaklučeńnia anałahičnych pahadnieńniaŭ.
U minułym miesiacy Hiermanija i Francyja abviaścili ab stvareńni sumiesnaha pradpryjemstva dla vytvorčaści va Ukrainie detalaŭ dla tankaŭ i haŭbic i, u kančatkovym vyniku, cełych sistem uzbrajeńniaŭ.
Ekśpierty adznačajuć, što zavody, jakija padtrymlivajucca zamiežnikami, buduć u asnoŭnym pabudavanyja na zachadzie krainy, udalečyni ad linii frontu. Jany buduć abaronienyja sistemami SPA. Ciapier ukrainskija vajskoŭcy raźmiaścili takija sistemy vakoł niekatorych svaich najbolš važnych zavodaŭ pa vytvorčaści zbroi.
Kampanija BAE Systems — vytvorca takich vidaŭ zbroi, jak haŭbicy M777 i Archer, bajavyja mašyny Bradley i CV90, a taksama tanki Challenger 2 — naładziła ramont paškodžanaj u bajach zbroi na zavodach va Ukrainie.
Adnak pakul nivodzin bujny amierykanski vytvorca zbroi nie abviaściŭ ab płanach adkryć vytvorčyja linii va Ukrainie.
Pieraškodaj na šlachu razhortvańnia vajskovaj vytvorčaści va Ukrainie, jak adznačaje vydańnie, źjaŭlajecca «pavucińnie biurakratyi». Inviestary sprabujuć pravieści svaje prapanovy praz try ministerstvy — abarony, ličbavaj transfarmacyi i pa pytańniach stratehičnych halin pramysłovaści.
«My sprabujem zrazumieć, jak usio heta spałučajecca i jak jany pracujuć razam», — cytuje vydańnie słovy Uiljama Tejłara (William Taylor), byłoha pasła ŭ Kijevie, jaki ŭznačalvaje pracu Instytuta miru ZŠA pa naładžvańni suviaziaŭ pamiž amierykanskimi i ŭkrainskimi abaronnymi kampanijami.
Čytajcie jašče:
Ukraina ŭ minułym miesiacy pačała vytvorčaść rakiet z dalokaściu bolš za 640 km
U Biełaruskaj pravasłaŭnaj carkvie abnavili ceńnik? Voś jakija buduć rekamiendavanyja taryfy7
Kamientary