«Usich ja ŭ rot **aŭ, i maral vašu taksama». Rasijanie raskazali, navošta pisali danosy ŭ biełaruski KDB
U bazie zvarotaŭ u KDB my znajšli niamała danosaŭ ad «nieabyjakavych» rasijan z roznych kutkoŭ krainy-susiedki. Dazvanilisia niekalkim ź im, kab spytać, navošta jany ŭmiešvalisia ŭ spravy Biełarusi.
«U asabistym paviedamleńni Z. tłumačyŭ, što «za mir»»
Hanna Čemisava, choć i pražyvała na toj momant u Maskvie, patłumačyła svoj zvarot u KDB u 2023 hodzie prosta: «Ja advučyłasia i chaču ŭ Biełarusi žyć dalej».
U svaim liście da orhanaŭ biaśpieki dziaŭčyna paprasiła razabracca z žycharom Mahiloŭščyny, tamu što jon, cytata: «U asabistym paviedamleńni tłumačyŭ, što «za mir», tym samym nie padtrymlivaje denacyfikacyi nacystaŭ i nacysckaj ideałohii na terytoryi Ukrainy i nie padtrymlivaje niezaležnaści Łuhanskaj narodnaj respubliki i Danieckaj narodnaj respubliki. Prašu zrabić zachady i pravieści prafiłaktyčnuju pracu ź im i jaho siamjoj. Taksama ŭ hetaha maładoha čałavieka ŭ sacyjalnaj sietcy instagram u publičnaj historyi videa z padtrymkaj na siońnia zabitaha nacysta i voraha ruska-biełaruskaha naroda».
Dziaŭčyna miarkuje, što pastupiła słušna.
«Biełaruś zaraz u palityčnaj biaśpiecy, joj ničoha nie pahražaje, tamu što jana pad krylcam našaha prezidenta. Ale pry hetym u akopach siadziać maje stryječnyja braty, pamirajuć. Usie na śpiecyjalnaj vajennaj apieracyi. A niechta, jak hety, adkasili ad vojska i majuć prava ŭzvyšacca nad imi? I ŭzvyšać pry hetym nacystaŭ?»
Hannu nie kłapocić, što ciapier jana ŭ śpisie danosčykaŭ, dastupnym anłajn. Chacia i rasstrojenaja faktam, što bazu KDB, akazvajecca, možna ŭzłamać.
«Ja ŭsio zrabiła pravilna, mnie ni za što nie soramna. A tych, chto ŭschvalaje nacystaŭ, spadziajusia, jašče žyćcio pravučyć».
«Usich ja ŭ rot **aŭ, i maral taksama vašu»
Razmova z maskoŭskim kiroŭcam taksi Siarhiejem Vińnikavym atrymałasia vielmi karotkaj. Chacia jaho danos byŭ dosyć razhornuty. U svaim zvarocie da KDB mužčyna padrabiazna apisaŭ adzin sa svaich vyklikaŭ: 16 sakavika minułaha hoda jon pryniaŭ zakaz u žančyny hod 50-ci i pavioz jaje ŭ aeraport Šaramiećcieva.
«Pamiž nami zaviazaŭsia dyjałoh. Vyśvietliłasia, što žančyna źjaŭlajecca hramadziankaj Respubliki Biełaruś. Padčas hutarki vyśvietliłasia, što jana źjaŭlajecca prychilnicaj radykalnych pohladaŭ u dačynieńni da ŭłady Respubliki Biełaruś, vykazvała nacyjanalistyčnyja pohlady, toje, što nienavidzić Rasiju i ruskich, ułady Biełarusi, padtrymlivaje źviaržeńnie ŭłady ŭ Respublicy Biełaruś»,
— Siarhiej Vińnikaŭ taksama pakinuŭ svaje dadzienyja z abiacańniem raspavieści pra svaju klijentku bolš detalova, i dałučyŭ rekvizity zakaza — u tym liku mabilny numar žančyny.
Na infarmacyju, što ciapier jon fihuruje siarod danosčykaŭ, Siarhiej adreahavaŭ łakanična: «Mnie po**j».
«Usich ja ŭ rot **aŭ, i maral vašu taksama. Hetaja p**da končanaja, žyviolina. Ja jaje davioz tolki tamu, što nie moh vykinuć pasiarod darohi», — dadaŭ taksist i kinuŭ słuchaŭku.
«Nie dajcie ź Biełarusi zrabić fašysckuju chachlandyju!»
Siarhiej Saprykin z Navasibirska ŭ kastryčniku 2020 hoda vykazvaŭ spačuvańnie biełaruskim siłavikam u ich nialohkim supraćstajańni «revalucyjanieram, jakija chočuć źniščyć krainu». I kab dapamahčy im, dasłaŭ dadzienyja adnaho z mužčyn u Adnakłaśnikach, jaki, pa jaho słovach, zaklikaŭ viešać siłavikoŭ i ich dziaciej.
«Nie dajcie ź Biełarusi zrabić fašysckuju chachlandyju! Honar maju. Praparščyk zapasu śpiecnazu VV MUS RF Saprykin S. M.», — skončyŭ jon svoj zvarot u KDB.
Jak vyśvietliłasia, za čatyry hady Siarhiej prasunuŭsia ŭ svaim žadańni zmahacca z ukraincami jašče dalej. Pa słovach mužčyny, jon ciapier sam na froncie.
Svaje turboty za los Biełarusi Saprykin arhumientavaŭ nastupnym čynam:
«Ruś — heta maja radzima. I ŭ tym liku Biełaja Ruś. Ja nie dazvolu, kab na majoj Biełaj Rusi raspaŭsiudziłasia karyčnievaja čuma. Biełarusy — moj bracki narod. My adnoj kryvi. I zaraz ja niezadavoleny tolki tym, što Baćku pieradali mała jadziernaj zbroi. Ja by chacieŭ pabolš. I kab dźvie rakiety ŭ Polšču palacieli — i tam vyras vialiki jadzierny hryb, naŭprost u centry Varšavy. Dźvie rakiety chaj by palacieli ŭ Ryhu. Praciahvać? Takoje majo słova aficera!»
Kamientary