Žychara Pastavaŭ sudziać pa niekalkich kryminalnych artykułach
Na zakrytym sudovym pasiadžeńni Brescki abłasny sud 2 traŭnia razhladaje kryminalnuju spravu palitźniavolenaha Jaŭhiena Pielachataha, jakoha abvinavačvajuć pa šerahu dyfamacyjnych i pratesnych artykułaŭ. Spravu pryznačanaja razhladać sudździa Kaciaryna Hruda, piša «Viasna».
Pieršapačatkova było viadoma pra abvinavačańni pavodle art. 368 Kryminalnaha kodeksa (abraza Alaksandra Łukašenki) i č. 1 art. 130 (raspalvańnie inšaj sacyjalnaj varožaści albo varažniečy).
U chodzie śledstva da hetych artykułaŭ dadalisia:
- č. 1 art. 361-1 (stvareńnie ekstremisckaha farmavańnia abo ŭdzieł u im);
- č. 2 art. 367 (paklop u dačynieńni da Alaksandra Łukašenki);
- č. 3 art. 361 (zakliki da mier abmiežavalnaha charaktaru, skiravanyja na pryčynieńnie škody nacyjanalnaj biaśpiecy Biełarusi);
- art. 369 (abraza pradstaŭnika ŭłady)
U sudovym raskładzie paznačana, što Pielachaty źjaŭlajecca asobaj, jakaja ŭčyniła hramadska niebiaśpiečnaje dziejańnie, h. zn. u stanie nieprytomnaści abo asobaj, jakaje pakutuje na psichičny razład.
Jaŭhiena Pielachataha zatrymali na pracy jašče 1 červienia 2023 hoda. Padčas zatrymańnia suprać Jaŭhiena byli ŭžytyja «śpiecyjalnyja srodki i fizičnaja siła», a z pracoŭnaha kabinieta jaho vyvodzili ŭ kajdankach i ź miaškom na hałavie.
Na druhi dzień sud Leninskaha rajona Bresta abvinavaciŭ jaho ŭ niepadparadkavańni supracoŭnikam milicyi (art. 24.3 KaAP RB) i aryštavaŭ na 5 sutak. Paźniej jaho źmiaścili ŭ SIZA №6 Baranavič, abvinavaciŭšy ŭ napisańni niekalkich žorstkich telehram-kamientaroŭ pra Łukašenku i siłavikoŭ.
Kamientary