Štučny intelekt budzie treniravacca na navinach bujnych miedyjakampanij. A im za heta zapłaciać $250 miljonaŭ
Jak paviedamlaje The Wall Street Journal, amierykanskaja News Corp. zaklučyła pahadnieńnie z OpenAI, jakoje dazvolić raspracoŭščyku čat-bota GPT vykarystoŭvać kantent navin miedyjakampanii dla treniroŭki madelaŭ štučnaha intelektu.
OpenAI atrymaje dostup da biahučych i archiŭnych publikacyj vydańniaŭ, jakija naležać News Corp., u tym liku amierykanskich The Wall Street Journal, Barron's i New York Post, a taksama brytanskich The Times i The Sun.
Baki nie raskryvajuć finansavych umoŭ pahadnieńnia, adnak pa słovach krynic WSJ, News Corp atrymaje bolš za $250 miljonaŭ na praciahu piaci hadoŭ, jak u vyhladzie hrašovych srodkaŭ, tak i ŭ vyhladzie kampiensacyi vydatkaŭ na vykarystańnie technałohij OpenAI.
Raniej ab zaklučeńni padobnych partniorskich pahadnieńniaŭ z OpenAI abviaścili takija miedyjachołdynhi i vydańni, jak Associated Press, francuzskaja Le Monde i Axel Springer — uładalnik Politico, niamieckaj Bild i inšych viadomych ŚMI.
A ŭ krasaviku hetaha hoda pahadnieńnie z OpenAI ab pradstaŭleńni dostupu da kantentu padpisała hazieta Financial Times.
Pa ŭmovach ździełki, vydaviectvy pieradajuć licenziju na svaje materyjały vytvorcu ChatGPT, kab dapamahčy ŭ raspracoŭcy technałohii hienieratyŭnaha štučnaha intelektu, jakaja zmoža stvarać tekst, malunki i kod, jakija nie adroźnivajucca ad stvoranych čałaviekam.
Akramia hetaha, kali karystalniki ChatGPT buduć zapytvać infarmacyju, źviazanuju z materyjałami vydańniaŭ, jany zmohuć bačyć u adkazach pierakazy, uryŭki i cytaty z adpaviednych artykułaŭ, a taksama pramyja spasyłki na pieršakrynicy hetych publikacyj. Pry hetym kantent budzie dakładna atrybutavany (naprykład, łahatypam).
Dla niekatorych vydaviectvaŭ OpenAI raspracuje novyja pradukty na asnovie štučnaha intelektu. Tak hazieta Financial Times užo vykarystoŭvaje rašeńni OpenAI, u tym liku ChatGPT Enterprise i maje namier ciesna ŭzajemadziejničać z OpenAI pry raspracoŭcy novych praduktaŭ na bazie štučnaha intelektu.
U sakaviku Financial Times vypuściła beta-viersiju čat-bota Ask FT («spytaj Financial Times»), zasnavanaha na vialikaj moŭnaj madeli Claude Anthropic. Čat-bot dazvalaje padpisčykam znachodzić infarmacyju ŭ artykułach haziety.
Jak adznačajuć analityki, pahadnieńni OpenAI z najbujniejšymi vydańniami zaklučana ŭ toj čas, kali technałahičnyja firmy zmahajucca ź niedachopam dobrych navučalnych danych na rynku.
Daśledavańni pakazvajuć, što da 2026 hoda ŭ kampanij, jakija zajmajucca štučnym intelektam, mohuć skončycca vysakajakasnyja danyja pa navučańni, stvoranyja čałaviekam. U vyniku raspracoŭščyki mohuć sutyknucca z «kałapsam madeli».
Pa słovach Breda Łajtkepa (Brad Lightcap), hałoŭnaha apieracyjnaha dyrektara OpenAI, «partniorstva i pastajanny dyjałoh z Financial Times nakiravany na pošuk tvorčych i praduktyŭnych sposabaŭ vykarystańnia ŠI dla pašyreńnia mahčymaściaŭ miedyjaarhanizacyj i žurnalistaŭ, a taksama ŭzbahačeńnia dośviedu ChatGPT žurnalistykaj suśvietnaha kłasa ŭ realnym časie».
U toj ža čas šerah bujnych miedyjakampanij, u tym liku BBC, addali pieravahu raspracoŭcy ŭłasnych madelaŭ štučnaha intelektu. BBC viadzie pieramovy z technałahičnymi hihantami nakštałt Amazon ab prodažy dostupu da svaich archivaŭ u ramkach hetaj inicyjatyvy.
Procilehły padychod abrała hazieta New York Times, jakaja padała sudovy pazoŭ ab aŭtarskich pravach suprać OpenAI i jaje inviestara Microsoft. U im śćviardžajecca, što kampanii niezakonna vykarystoŭvali miljony artykułaŭ vydańnia dla navučańnia svaich madelaŭ biez atrymańnia na toje dazvołu.
Kamientary
Chucpa v čistom vidie! Obučienije = čtienije, a čtienije = obučienije (u ludiej).
Po kr.mierie to čto v otkrytom dostupie i dažie v akkauntnom [za podpisku]
- nie možiet triebovať licienzirovanija.
(dr.dieło voobŝie niedostupnyje archivy i rabočije matieriały).