Niuchać, naciskać i pratykać videlcam. Jak nie stać achviaraj ašukanstva pry vybary miasa?
Na minułym tydni biełarusaŭ uraziła navina pra złačynnuju hrupoŭku, jakaja dziejničała na terytoryi Minskaj, Mahiloŭskaj i Homielskaj abłaściej. Złamyśniki dastavali tušy z žyviolnych mohilnikaŭ, admyvali miasa sodaj abo myjnym srodkam Fairy, kab prybrać niepryjemny pach, a potym pradavali jaho pierakupščykam abo zvyčajnym spažyŭcam pad vyhladam chatniaha. U siezon šašłykoŭ i barbiekiu čytać takija naviny asabliva tryvožna: nie chaciełasia b zamiest duchmianaj šyi na šašłyk kupić niekalki kiłahramaŭ tuchlaciny. Tamu vydańnie «Mocnyja naviny» padrychtavała hajd pa miasie: jak vybrać, na što źviartać uvahu i što pavinna naściarožyć pakupnika.
Vybar №1: kuracina
Kuracina — mabyć, adzin z samych papularnych vidaŭ miasa. Ź jaje možna pryhatavać mnostva roznych straŭ. Naturalna, vybirać kuracinu taksama treba ŭmieć: voś niekalki łajfchaki i paradaŭ, jakija možna pry hetym vykarystoŭvać.
- Źviarnicie ŭvahu na źniešni vyhlad tuški: hrudka nie pavinna być zanadta pavialičanaj i vyhladać praparcyjna kaniečnaściam. U advarotnym vypadku heta moža być prykmietaj taho, što kurycu vyhadavali na harmonach. Ptuška pavinna być biez defiektaŭ: pierałomaŭ kostak, hiematom, drapin, kryvianych zhustkaŭ.
- Kab pravieryć, nakolki kuracina jakasnaja, lohieńka naciśnicie na jaje palcam. Śviežaje miasa budzie trymać formu. A voś na starym i niaśviežym zastanucca ŭvahnutaści.
- Koler taksama adyhryvaje niemałavažnuju rolu. Miasa maładych kurej zvyčajna maje śvietła-ružovuju afarboŭku, skura miakkaja i biełaja, a tłušč bledna-žoŭty. Na łapkach bačnyja drobnyja łuskavinki. U darosłaj kurycy skura bolš toŭstaja, z žaŭtlavaj afarboŭkaj. Miasa kumpiačkoŭ, u adroźnieńnie ad hrudki, maje bolš nasyčany jarki ružovy, a ŭ chatniaj ptuški navat čyrvony koler.
- Što tyčycca pachu, to jon pavinien być śviežym i naturalnym. Lepš nie kuplać miasa ŭ marynadzie sa śpiecyjami, jakija pierabivajuć pach papsutaha. Čaściej za ŭsio ŭ kramach «jadzierna» marynujuć kurej, jakija zalažalisia i nieprydatnyja dla prodažu.
Vybar №2: jałavičyna
Što moža być smačniejšaje za stejk, pryhatavany sa śviežaj jałavičyny? Hety vid miasa bahaty na białok i žaleza, jano źmiaščaje vitaminy A, PP, C, B i minierały — kalcyj, sielen, mahnij, kalij.
Jak ža pavinna vyhladać śviežaja i jakasnaja jałavičyna?
- Jakasnaja jałavičyna moža mieć koler ad jarka-ružovaha da ciomna-čyrvonaha. Usio zaležyć ad uzrostu žyvioliny. Tłušč pavinien być dalikatna-bieły i ščylny — u takim vypadku miasa ličycca jakasnym. U maładoj jałavičyny tłušč navat trochi kryšycca. Žoŭty tłušč śviedčyć pra zalažałaść miasa.
- Śviežaje miasa budzie mieć pryjemny małočny pach. Kali vy adčuli lohkuju kiślinku — značyć, miasa pradajecca ŭžo daŭno.
- Pry naciskańni na kavałak śviežaha miasa nijakaj jamki ŭ miakaci zastavacca nie pavinna — jano tut ža prymaje raniejšuju formu.
- Jašče adzin łajfchak, jakija padkazali pradaŭcy — ahledźcie pryłavak. Kali vakoł jaho ci na im vilhotna — varta zadumacca. Niadobrasumlennyja pradaŭcy bahata zmočvajuć i apyrskvajuć miasnyja kavałki, kab jany zachoŭvali tavarny vyhlad. Zvyčajna takija manipulacyi robiać, kali miasa zalažałasia. Dobraje miasa pavinna być krychu vilhotnym, niebliskučym i nielipučym.
Vybar №3: śvinina
Śvinina nie sastupaje pa smaku i pažyŭnaści toj ža jałavičynie abo kuracinie. A kab nabyty kavałak śvininy sapraŭdy paradavaŭ amataraŭ hastranamičnych zadavalnieńniaŭ, važna surjozna padyści da vybaru miasa.
- Śviežaja śvinina, jakuju nie apracoŭvali i nie zasolvali, afarbavanaja raŭnamierna ŭ bledna-ružovy koler z matavaj pavierchniaj. Čyrvonaje adcieńnie miasa moža havaryć pra padfarboŭvańnie, a blednaść — pra vykarystańnie harmonaŭ rostu. Šaravaty koler — pieršaja prykmieta raskładańnia białku, jon charakterny dla niaśviežaha i zavietranaha miasa.
- Dobraje miasa nie pavinna pachnuć litaralna «śvińnioj». Taki niepryjemny pach majuć tušy knyroŭ, to-bok niekastryravanych samcoŭ. Pry nahravańni jano pačnie vydzialać mocny pach, a dalikatny z vyhladu kavałak pieratvorycca ŭ «padešvu».
- Śviežaje miasa nie lipnie da ruk i nie pakidaje na ich ślizkaj kansistencyi.
- Nahrejcie videlec i pratknicie kavałak miasa: kali źjavicca starońni pach, to ź miasam vidavočna niešta nie toje.
I samaja hałoŭnaja parada, jakuju «Mocnym navinam» padkazali na rynku: nie saromiejciesia pravieryć dakumienty na miasa. Pravierka jaho prachodzić niekalki etapaŭ: spačatku na bojni, potym — u łabaratoryi na rynku. Kali ŭ pradaŭca z hetym uźnikajuć prablemy — heta padstava zadumacca.
Kamientary