Pucin zajaviŭ, što byŭ hatovy nie akupavać paŭdniovyja vobłaści Ukrainy ŭ abmien na suchaputny kalidor u Krym
Rasijski praviciel upieršyniu pasprabavaŭ patłumačyć, čamu ŭvarvaŭsia ŭ Chiersonskuju i Zaparožskuju vobłaści.
Uładzimir Pucin na sustrečy z kiraŭnictvam rasijskaha MZS zajaviŭ, što ŭ pačatku poŭnamaštabnaj vajny, maŭlaŭ, nie vyklučaŭ zachavańnia ŭkrainskaha suvierenitetu nad Zaparožskaj i Chiersonskaj abłaściami ŭ abmien na suchaputny kalidor u Krym.
Pucin upieršyniu z pačatku ŭvarvańnia patłumačyŭ pryčyny, nibyta pa jakich jon uvarvaŭsia ŭ paŭdniovyja vobłaści Ukrainy. Pavodle jaho słoŭ, 5 maja 2022 hoda jon praz pasiarednika pieradaŭ prapanovu ab urehulavańni ŭ Zaparožskaj i Chiersonskaj abłaściach. Na dumku «Ahientstva», havorka idzie pra tahačasnaha premjera Izraila Naftali Bienieta, jaki naviedvaŭ Maskvu 5 maja.
Pucin adznačyŭ, što pasiarednik pytaŭsia ŭ jaho, ź jakoj pryčyny rasijskija vojski znachodziacca ŭ Zaparožskaj i Chiersonskaj abłaściach. Rasijski kiraŭnik nibyta adkazaŭ, što taki byŭ płan Hienštaba.
«Tady ad zamiežnaha kalehi pajšło ŭdakładnieńnie: ci buduć rasijskija vojski zastavacca ŭ Chiersonskaj i Zaparožskaj abłaściach i što budzie z hetymi rehijonami paśla dasiahnieńnia metaŭ SVA. Na heta adkazaŭ, što ŭ cełym nie vyklučaju zachavańnia ŭkrainskaha suvierenitetu nad hetymi terytoryjami, adnak pry ŭmovie, što Rasija budzie mieć tryvałuju suchaputnuju suviaź z Krymam. Heta značyć, Kijeŭ pavinien harantavać tak zvany servitut — jurydyčna aformlenaje prava dostupu Rasii na Krymski paŭvostraŭ praz Chiersonskuju i Zaparožskuju vobłaści», — raskazaŭ Pucin.
Jon zajaviŭ, što pasiarednik adpraviŭsia ŭ Kijeŭ z hetaj prapanovaj, adnak ukrainskija ŭłady nibyta admovilisia ad jaho pasłuh praz toje, što jon staić na prarasijskich pazicyjach.
Nahadajem, Rasija ŭ 2022 hodzie abjaviła ab anieksii Chiersonskaj i Zaparožskaj abłaściej Ukrainy, pry hetym rasijskija vojski nie kantralujuć abłasnyja centry. Siońnia Pucin nazvaŭ svaje ŭmovy dla pačatku mirnych pieramoŭ: ukrainskija vojski pavinny całkam pajści z terytoryi hetych rehijonaŭ, a taksama z terytoryj Danieckaj i Łuhanskaj abłaściej.
Łukašenka: Chto tam u Rasii viakaje na šmatviektarnaść Biełarusi i vyzvaleńnie palitviaźniaŭ?10
Kamientary