Rasijskija elity vierać u pośpiech paŭtornaha ŭvarvańnia va Ukrainu praź Biełaruś — Zyhar
Vydańnie Foreign Affairs vypuściła artykuł viadomaha rasijskaha žurnalista Michaiła Zyhara, jaki padzialiŭsia insajdami ad niekalkich prakramloŭskich aliharchaŭ i biznesmienaŭ nakont nastrojaŭ ich asiarodździa datyčna vajny va Ukrainie. Voś pra što ciapier marać rasijskija elity.
Krynicy ŭ čynoŭnickim i dziełavym asiarodździ Kramla ananimna padzialilisia z antyvajennym žurnalistam Michaiłam Zyharam infarmacyjaj pra nastroi rasijskich elit na fonie ciapierašnaha stanu vajny va Ukrainie. Tekst Zyhara vyjšaŭ u bujnym zachodnim vydańni Foreign Affairs.
Pavodle krynic, mnohija pradstaŭniki elit, jakija ŭ pačatku vajny byli šakavanyja padziejami i tamu krytykavali Pucina, pierastali supraciŭlacca i navat stali padtrymlivać palityku Kramla. Pryčyny ŭ ich roznyja: adnyja pavieryli ŭ pieramohu Rasii na poli boju, inšyja pryznali biessensoŭnaść pratestaŭ, a trecija paličyli, što zachodnija krainy asłabieli i vydychnucca raniej za Rasiju.
«Elita ŭžo nie dyskutuje, ci varta padtrymlivać Pucina. Hałoŭnaje pytańnie, jakoje kłapocić ciapier mnohich — čym ža skončycca vajna?
Častka z nas spadziajecca, što dastatkova tolki adnaho paśpiachovaha bujnoha nastupu, kab Pucin supakoiŭsia. Jość i tyja, chto źviazvaje kaniec vajny z abaviazkovym zachopam Charkava ci Kijeva. Ale jašče adna častka vieryć, što Pucin pojdzie dalej u Jeŭropu, kab paralizavać NATA. I heta niahledziačy na mahčymuju pieramohu Trampa na vybarach», — padzialilisia niekalki rasijskich aliharchaŭ na ŭmovach ananimnaści.
Jany dadali, što prychilniki dalejšaj eskałacyi pierakananyja ŭ poŭnaj słabaści Zachadu i ŭ tym, što NATA nie pryjdzie na dapamohu bałtyjskim krainam.
«Na dumku rasijskaj elity, najbolš imaviernaj cellu budzie Estonija ci Łatvija. Dla hetaha spačatku naša FSB destabilizuje situacyju ŭ krainach praz rasijskuju mienšaść, jakaja paprosić ab «dapamozie» Kramla «z-za pryhniotu».
Tady rasijskija vojski pierasiakuć miažu i voźmuć pad svoj kantrol harady va ŭschodniaj častcy abiedźviuch dziaržaŭ, takija, jak, naprykład, pieravažna ruskamoŭny estonski horad Narva. Uziaŭšy Narvu, Pucin pravieryć, ci sapraŭdy NATA hatovaje pajści na ryzyku raźviazvańnia treciaj suśvietnaj vajny. I adbudziecca heta, chutčej za ŭsio, jašče da prezidenckich vybaraŭ ZŠA, kab dakładna pieraškodzić Bajdenu pieraabracca na novy termin», — miarkujuć niekatoryja aliharchi.
Pa ich acenkach i nazirańniach, svaju rolu va ŭsim hetym jašče zhulaje i Biełaruś.
«Šmat chto ŭ Maskvie vieryć, što paŭtorny nastup ź Biełarusi na ŭkrainskuju stalicu budzie bolš paśpiachovym, čym u 2022 hodzie, bo kolkaść rasijskaj armii pavialičyłasia, jana ciapier lepš padrychtavanaja i abstalavanaja, a ŭkraincy zanadta stamilisia i nie zmohuć arhanizavać efiektyŭnuju abaronu na jašče adnym napramku», — piša Michaił Zyhar sa spasyłkaj na krynicy ŭ rasijskich elitach.
«Drenna być izhojem-pieramožcam, ale jašče horš być izhojem, jaki prajhraŭ. My pavinny pieramahčy, bo nam tady nie daduć žyćcia, a Rasija razvalicca», — skazaŭ adzin z apytanych aliharchaŭ, jaki raniej krytykavaŭ vajnu, a potym źmiryŭsia.
Nahadajem, što ŭ pačatku hoda niamieckaje vydańnie Bild atrymała dostup da sakretnaha dakumienta Bundeśviera, u jakim raśpisany scenar paŭnavartasnaha rasijskaha ŭvarvańnia ŭ Jeŭropu ŭ 2025 hodzie, da jakoha ciapier rychtujecca NATA. U hetym scenary asnoŭnaja rola adviedzienaja Biełarusi.
Pavodle scenara, Rasija hetym letam moža pačać aktyŭna ździajśniać kibierataki na sistemy NATA i pravakavać biesparadki ŭ krainach Bałtyi z udziełam etničnych rasiejcaŭ, što stanie padstavaj dla praviadzieńnia ŭ vieraśni na terytoryi Biełarusi vučeńniaŭ «Zachad-2024» z udziełam 50 tysiač rasijskich sałdat.
Na padstavie vučeńniaŭ Rasija, pavodle scenaru, usiu vosień budzie naroščvać svoj vajskovy kantynhient i arsienał rakiet u Biełarusi kala miežaŭ Litvy i Polščy, adnačasova robiačy toje ž samaje i z boku Kalininhrada.
Potym u śniežni 2024-ha ŭ rajonie Suvałkskaha kalidora Rasija moža spravakavać «štučny pamiežny kanflikt» i «biesparadki sa šmatlikimi achviarami», jak heta było ŭ 2021-m ź nielehalnymi mihrantami.
Usio heta pavinna budzie adbyvacca ŭ razhar vybarčaj kampanii ŭ ZŠA, kali ŭ krainy jašče nie budzie abranaha lidara.
«Mienavita ŭ toj momant Rasija pry dapamozie Biełarusi moža zładzić u rajon Suvałkskaha kalidora vajskovaje ŭvarvańnie, padobnaje da rasijskich dziejańniaŭ va Ukrainie ŭ 2014 hodzie», — piša Bild, spasyłajučysia na sakretny dakumient Bundeśviera.
Čakajecca, što ŭ sakaviku 2025 hoda Rasija pierakinie ŭ Biełaruś dadatkovyja dźvie tankavyja dyvizii i bolš za 70 tysiač sałdat. U adkaz na heta NATA ŭ mai pierakinie da miežaŭ Rasii i Biełarusi 300-tysiačny vajskovy kantynhient, siarod jakich budzie 30 tysiač sałdat z Hiermanii.
Dalej, pa scenary, pavinien adbycca «Dzień X» (poŭnamaštabnaje rasijskaje ŭvarvańnie i vajna z NATA), zychod jakoha ŭ dakumiencie zastajecca adkrytym, adznačaje Bild.
Źniavoleny raskazaŭ, jak siadzieŭ u kałonii ŭ Hłybokim u susiedniaj kamiery sa Statkievičam2
Kamientary