Vydzialeńnie Biełarusi finansavaj dapamohi Jeŭrasajuza adkładvajecca

Biełaruś pakul nie moža atrymać ad Jeŭrasajuza finansavuju dapamohu ŭ pamiery 290 młn dalaraŭ. Pra heta havorycca ŭ dakładzie Mižnarodnaha valutnaha fondu, jaki apublikavany pa vynikach treciaha ahladu vykanańnia biełaruskim uradam prahramy stand‑by.

Pieršapačatkova čakałasia, što Biełaruś atrymaje hetyja srodki jašče ŭ čaćviortym kvartale 2009 hoda.

U dakładzie MVF adznačajecca, što zatrymka z vydzialeńniem srodkaŭ vyklikana sudovym rašeńniem u ES, zhodna ź jakim usie prośby ab makrafinansavańni pavinny razhladacca novaj, a nie adychodziačaj Jeŭrakamisijaj (čakajecca, što jaje skład budzie zaćvierdžany 9 lutaha). Heta, u svaju čarhu, zatrymaje razhlad kamisijaj pytańnia ab vydzialeńni makrafinansavaj dapamohi. Zatym kredyt pavinien być abmierkavany i zaćvierdžany Jeŭraparłamientam.

«Isnuje peŭnaja ryzyka taho, što vydzialeńnie hetaj sumy nie adbudziecca ŭ pieryjad dziejańnia prahramy (supracoŭnictva Biełarusi i MVF pa prahramie stand‑by raźličana da kanca sakavika 2010 hoda), a ŭ takim vypadku jano budzie zaležać ad najaŭnaści novaha miechanizmu MVF abo dastatkovych harantyj zaklučeńnia damoŭlenaści ab takim miechaniźmie», — havorycca ŭ dakładzie.

U dakumiencie taksama adznačajecca, što ŭ śviatle hetaj zatrymki ź finansavańniem ułady Biełarusi zajavili pra svaju hatoŭnaść «pryniać miery, jakija źniziać patrebu ŭ źniešnim finansavańni pryblizna na 300 młn dalaraŭ za 2010 hod u cełym». Hetyja miery mohuć uklučać, u pryvatnaści, niekatoraje źnižeńnie biudžetnych raschodaŭ.

«Nadzvyčajnyja miery, u vypadku nieabchodnaści, buduć abmiarkoŭvacca i ŭzhadniacca ź piersanałam MVF padčas čaćviortaha ahladu (jon prachodzić z 3 pa 16 lutaha).

Pryniaćcie hetych mier zabiaśpiečyć dalejšaje vykanańnie zadač prahramy, chacia kolkasnyja metavyja pakazčyki na kaniec sakavika 2010 hoda, mahčyma, pryjdziecca pierahledzieć, pakolki hetyja miery padziejničajuć praź niekatory čas», — havorycca ŭ dakładzie.

Akramia taho, adznačajuć ekśpierty MVF, biełaruskija ŭłady praciahvajuć šukać alternatyŭnyja krynicy finansavańnia dla kampiensacyi luboha niedastatkovaha pastupleńnia finansavańnia ad ES i abmiežavańnia nieabchodnaści ŭ nadzvyčajnych mierach.

Nahadajem, 27 studzienia kiraŭnik Nacyjanalnaha banka Piatro Prakapovič zajaviŭ, što novyja ŭmovy pastavak rasijskaj nafty ŭ Biełaruś paciahnuć dadatkovyja valutnyja raschody, što stavić zadaču dadatkovaha pryciahnieńnia źniešnich resursaŭ, u tym liku MVF.

• 0
• 0
• 0
• 0
• 0
• 0
• 0
• 0