Čamu ŭ haračyja dni časta balić hałava i jak ad taho ŭbierahčysia

Ekśpierty śćviardžajuć, što haračynia moža być adnym z asnoŭnych faktaraŭ, jakija vyklikajuć hałaŭny bol. Skački tempieratury pavietra zvyčajna supravadžajucca źmienaj atmaśfiernaha cisku, vilhotnaści, nieba ŭ takija dni jasnaje, sonca piače, što ŭ vyniku pravakuje mihreni.

Zhodna z apošnim daśledavańniem amierykanskich vučonych, pry pavyšeńni tempieratury pavietra na piać hradusaŭ častata prystupaŭ mihreni pavialičvajecca na 6%.

Adnoj z asnoŭnych pryčyn hałaŭnych bolaŭ źjaŭlajecca abiazvodžvańnie arhanizmu. Deficyt vadkaści pryvodzić da paharšeńnia zabieśpiačeńnia kryvioju mozhu. Jak vynik, adbyvajecca spazm sasudaŭ, što vyklikaje prystupy fizičnaha bolu.

Śpiecyjalisty, ź jakimi razmaŭlali žurnalisty The Washington Post, zaŭvažajuć, što treba adroźnivać hałaŭny bol u vyniku pavyšanaha cisku i mihreń, pry jakoj hałoŭnaj pryčynaj bolu źjaŭlajecca nieŭrałahičnaje rasstrojstva. Mihreń časta supravadžajuć takija simptomy, jak młosnaść, źniasileńnie, hałavakružeńnie i hipieradčuvalnaść da śviatła abo huku.

U ludziej, jakija pakutujuć na mihreń, hałaŭnyja boli ŭźnikajuć z-za šerahu faktaraŭ. Siarod ich stres, abiazvodžvańnie, niedachop snu i, biezumoŭna, haračynia.

A voś u ludziej, jakija zvyčajna nie majuć hałaŭnych bolaŭ, haračynia ich nie vyklikaje. Kali ž u takoha čałavieka jon uźnik, to heta moža być prykmietaj bolš surjoznaha razładu arhanizma. Naprykład, ciepłavoha źniasileńnia ci ciepłavoha ŭdaru.

Śpiecyjalisty źviartajuć uvahu, što nie abaviazkova abiazvodžvańnie moža stać pryčynaj hałaŭnoha bolu. Ekstremalnaja haračynia moža pryvieści da elektralitnaha dysbałansu. Intensiŭnaje potavydzialeńnie vyklikaje značnuju stratu razam z potam minieralnych solaŭ, u pieršuju čarhu natryju i kaliju. U vyniku arhanizm mienš zdolny ŭtrymlivać vadu.

Takim čynam, ciepłavyja hałaŭnyja boli mohuć uźnikać i ŭ tych, chto pastajanna papaŭniaje svoj vodny bałans.

Što možna zrabić, kab ablehčyć hałaŭny bol u śpioku?

Hałaŭny bol, vyklikany śpiakotaj, asabliva kali ŭ vas byvajuć mihreni, — prykmieta taho, što stan moža pahoršać.

Pierajdzicie ŭ chałodnaje miesca i aśviažyciesia z dapamohaj chałodnaha napoju ŭ šklanoj butelcy ci blašancy abo pakietam ź lodam. Prykładzicie ich da łoba, da ruk. Pierajdzicie ŭ pamiaškańnie z kandycyjanieram albo ŭ chałodnuju kamoru, loch.

Kali jość mahčymaść, to prymicie prachałodny duš ci apuścicie nohi ŭ taz z prachałodnaj vadoj. Na łob prykładzicie prachałodny kampres. Kali hałaŭny bol mocny, prylažcie na vysokuju padušku. Zabiaśpiečcie sabie cišyniu i spakoj. U pakoi lepš prybrać jarkaje śviatło.

Picie chałodnuju vadu, kisłaje małako, minierałku, kvas, morsy. Śpiecyjalisty rekamiendujuć ciaham paŭhadziny vypivać ad adnoj da troch šklanak prachałodnaj vady drobnymi hłytkami. Dadavańnie ŭ vadu limonnaha soku ci soli taksama papoŭnić jaje elektralitami. Abiazvodžvańnie dapamoža praduchilić i napoj z karkade.

Ludziam, schilnym da mihreniaŭ, u śpiakotu varta paźbiahać viadomych charčovych tryhieraŭ.

Pažadana, kab u racyjonie byli pieravažna raślinnaja i małočnaja ježa, zielanina, harodnina i sadavina. Taksama varta skaracić užyvańnie ałkaholu i sałodkich napojaŭ, jakija mohuć sadziejničać abiazvodžvańniu.

Śpiecyjalisty rekamiendujuć admovicca ad trenirovak na volnym pavietry, kali skvar.

Kali jość mahčymaść, to lepš zastavacca doma. U pamiaškańni vykarystoŭvać vientylatary, trymać vokny na haračy bok začynienymi, dla pamianšeńnia dadatkovaha soniečnaha śviatła i nahravańnia pamiaškańnia varta zakryvacca štorami.

Kali ž hałaŭny bol nie ŭdajecca pieraadoleć, to nie varta ciarpieć. Lepš źviarnucca da doktara.

• 0
• 6
• 0
• 0
• 1
• 0
• 0