Załužny: Adzinym vychadam u vajnie moža stać pavieličeńnie kolkaści čałaviečych resursaŭ
Były hałoŭnakamandujučy Uzbrojenych sił Ukrainy, a ciapier pasoł u Vialikabrytanii Valeryj Załužny vystupiŭ na kanfierencyi Karaleŭskaha abjadnanaha instytuta abaronnych daśledavańniaŭ RUSI Land Warfare Conference 2024 u Łondanie.
Heta pieršy publičny vystup Załužnaha paśla pačatku pracy na novaj pasadzie, tekst pramovy jon apublikavaŭ u svaim telehram-kanale.
Załužny ŭ pramovie zajaviŭ, što demakratyčnyja krainy pavinny pračnucca i vyrašyć, jak abaranić svaich hramadzian, a hramadstva ŭ vypadku vajny musić admovicca ad častki svabod.
«Vajna — heta navuka. Navuka sa svaimi zakonami, jakija nieabchodna viedać i vyvučać. Historyja vajskovaj spravy i jaje novyja praviły ciapier pišucca na terytoryi Ukrainy», — skazaŭ jon.
Załužny miarkuje, što vajna za svabodu ŭ adnoj krainie pavinna stać palitykaj vyžyvańnia demakratyi ŭ inšych svabodnych krainach: «Zaŭsiody ciažka zmahacca z armijaj fieadała».
Vajskoviec adznačyŭ, što 24 lutaha 2022 hoda ŭkraincy ŭstupili ŭ žorstkuju bitvu z adviečnym voraham i dziakujučy žyćciam prostych ukraincaŭ zavajavali šaniec pieramahčy.
«Ja absalutna zhodny, što rasijska-ŭkrainskaja vajna — heta jašče nie vajna budučyni. Heta ŭsiaho tolki vajna pierachodnaha pieryjadu. Ale mienavita naša vajna farmuje novyja praviły», — skazaŭ jon.
Załužny zajaviŭ, što kali razhladać technałohii jak resursy, to na siońniašni dzień, u siłu roznych pryčyn, ni Ukraina, ni Rasija nie zmohuć samastojna avałodać imi ŭ bližejšy čas, tamu «adzinym vychadam moža stać pavieličeńnie kolkaści čałaviečych resursaŭ, zadziejničanych u vajennych dziejańniach».
Va Ukrainy nie chapaje technałohij, a ŭ jaje partnioraŭ na Zachadzie niama prykładnoha i praktyčnaha pola dla ich pravierki. Tamu «tolki razam my zmožam efiektyŭna vykarystoŭvać resurs, bo čas bolš nie pracuje na nas», — reziumavaŭ jon.
***
Valeryj Załužny byŭ hałoŭnakamandujučym USU ź lipienia 2021 hoda. Mienavita na jaho loh asnoŭny ciažar abarony ŭ lutym — sakaviku 2022 hoda, a potym i pieršyja dva kontrnastupy.
U lutym 2024 hoda Uładzimir Zialenski adpraviŭ jaho ŭ adstaŭku, zamianiŭšy Alaksandram Syrskim. Pierad adstaŭkaj Załužnaha ŭkrainskija i zachodnija ŚMI niekalki miesiacaŭ paviedamlali pra kanflikt Zialenskaha z hałoŭnakamandujučym USU.
9 maja Zialenski pryznačyŭ Załužnaha pasłom u Vialikabrytanii.
Ciapier čytajuć
«U takuju ž haleču, dy jašče i chałodnuju, pakistancy nie pajeduć». Biełarus piać tydniaŭ pravioŭ u Pakistanie — voś što jaho ŭraziła27
Kamientary