Zołatavalutnyja reziervy Polščy pieravysili rekordnyja $200 miljardaŭ

Zołatavalutnyja reziervy (ZVR) Polščy ŭ červieni hetaha hoda dasiahnuli $209,5 miljarda. Heta histaryčny rekord.

Pryčym rastuć jak zapasy valuty, tak i zołata. Pa infarmacyi Nacbanka hetaj krainy, zapasy zołata skłali 377,4 tony. Za minuły hod było kuplena prykładna 130 ton.

Pa słovach prezidenta Nacbanka Polščy, pa zapasach zołata Polšča znachodzicca na 15-m miescy ŭ śviecie. Tolki centralny bank Kitaja za minuły hod nabyŭ bolš zołata. U płanach Polščy pavialičyć dolu zołata ŭ svaich reziervach da 20%. Čakajecca, što heta adbudziecca da 2025 hoda.

Metanakiravanuju palityku pa pavieličeńni zapasaŭ zołata Nacbank Polščy pravodzić, pačynajučy z 2019 hoda. Jaho prezident Adam Hłapiński zaŭvažaje, što z toj pary było kuplena bolš za 260 ton.

U jakich krain śvietu majuć najbolšyja zołatavalutnyja reziervy?

Najbolšyja zołatavalutnyja reziervy na kaniec 1 kvartała 2024 hoda mieŭ Kitaj. Jany składali $3,25 tryljona.

Na druhim miescy znachodzicca Japonija ($1,29 tryljona). Dalej išła maleńkaja Šviejcaryja ($864 miljardy), ZŠA ($811 miljardy) i Indyja ($652 miljardy).

Na piatym miescy byŭ Tajvań, ZVR jakoha składali $598 miljardaŭ, i heta, darečy, na dušu nasielnictva našmat bolš, čym u KNR.

U jakich krain najbolš zołata ŭ reziervach?

Pa infarmacyi Suśvietnaj rady pa zołacie na kaniec pieršaha kvartała na pieršym miescy pa zapasach zołata ŭ reziervach (8133 tony) byli ZŠA.

Za imi išła Hiermanija z zapasam 3352 tony i Italija, jakaja mieła 2 452 tony zołata. Ad ich mała adstaje Francyja z 2437 tonami zołata.

Na piatym miescy znachodziłasia Rasija, jakaja nazapasiła ŭ reziervach 2333 tony zołata. 

Za joj išoŭ Kitaj z 2262 tonami. U dziasiatcy byli taksama Šviejcaryja (1040), Japonija (846), Indyja (822) i Niderłandy (612).

Jak paŭpłyvała vajna na ZVR Rasii?

Rasija pa abjomie svaich ZVR ($593 miljardy) na lipień 2024 hoda zajmaje vośmaje miesca ŭ śviecie. Praŭda, prykładna $300 miljardaŭ ź ich zabłakavanyja zachodnimi bankami.

Jaje reziervy byli na piku pierad vajnoj ($643 miljardy na 18 lutaha 2022 hoda).

Za pieršy hod vajny Rasija straciła $65,7 miljarda, ci 10% svaich ZVR.

Jakija ZVR Biełarusi?

Biełaruś u červieni 2024 hoda mieła ZVR na $8,4 miljarda. Ź ich na manietarnaje zołata prypadała amal pałova. Usiaho ŭ Biełarusi 54 tony zołata.

Svajho piku biełaruskija reziervy dasiahali 1 studzienia 2020 hoda — pierad kavidam i falsifikacyjaj vybaraŭ, kali jany składali $9,4 miljarda. Kali ŭličyć, što za hetyja 4 hady inflacyja dalara skłała 23%, to realnaje padzieńnie biełaruskich reziervaŭ jašče bolšaje.

Jakija zołatavalutnyja reziervy maje Ukraina

Pa infarmacyi sajta Minfin.com.ua, na kaniec červienia ZVR Ukrainy składali $38 miljardaŭ. Pry hetym manietarnaje zołata ŭ ich zajmała tolki 5,3%. 

Za pieršy hod vajny ZVR Ukrainy skaracilisia amal na 8%. Adnak ŭžo ŭ nastupnym 2023 hodzie vyraśli na 42% i pieravysili $40 miljardaŭ.

• 4
• 0
• 2
• 0
• 0
• 1
• 0
• 0