Viadučaja BT, paetka, uciakač. Jak skłałasia žyćcio samych jarkich udzielnikaŭ dziciačaha «Jeŭrabačańnia»?
Jak ciapier žyvuć tyja, chto niekali pradstaŭlaŭ Biełaruś na dziciačym «Jeŭrabačańni»? U darosłym žyćci jany abrali vielmi roznyja šlachi.
Volha Saciuk
Volha stała pieršaj, kamu davieryli vystupić na dziciačym «Jeŭrabačańni» ad Biełarusi — adbyłosia heta ŭ 2003 hodzie. Dzieviacihadovaja dziaŭčynka z Kobryna śpieła pieśniu «Tančy» i zaniała 4-je miesca.
U 2004-2008 hadach Volha viała na biełaruskim telebačańni pieradačy «Suzorje nadziej», «Vas vyklikaje spartłandyja!». Paśla škoły jana zrabiła davoli pradkazalny vybar i pastupiła ŭ Biełaruski dziaržaŭny ŭniviersitet kultury i mastactva.
U 2021 hodzie dziaŭčyna stała viadučaj treciaha siezona treveł-šou «Siełapalacieła». U instahramie dziaŭčyna taksama adznačaje, što stała «kreatyŭnaj mamaj» damašniaj kaviarni «Mama śpiakła» ŭ rodnym Kobrynie.
Jahor Vaŭčok
Vystup Jahora ŭ Lilechamiery ŭ 2004 hodzie byŭ samym horšym za ŭsiu historyju ŭdziełu Biełarusi ŭ dziciačym «Jeŭrabačańni». Ź pieśniaj «Śpiavajcie sa mnoju» chłopčyk zaniaŭ 14-je miesiaca, najvyšejšy bał, jaki jon atrymaŭ, — 4 ad Rumynii.
Skončyŭšy škołu, chłopiec pastupiŭ u BDU na ekanamista, ale zajmacca tvorčaściu nie kinuŭ. Jahor hulaŭ u KVZ u składzie kamandy svajoj VNU i navat jeździŭ vystupać u Maskvu ŭ vyšejšuju lihu.
U 2013 hodzie jon udzielničaŭ u teleprajekcie ANT «Akademija talentaŭ» i jakraz padčas zdymkaŭ staŭ hierojem kryminalnaj chroniki. Tady chłopca mocna źbili ŭ navahodniuju noč u rodnym Mazyry — jamu paškodzili zuby, vusny, pravaje voka i złamali nos. Tamu hrymioram pryjšłosia vielmi pastaracca, kab schavać usiu hetuju «pryhažość».
Jahor śpiavaŭ u kavier-bendzie YellowStone, sprabavaŭ svaje siły na rasijskim šou «Chaču da Mieładze». Udzielničaŭ i ŭ kastynhach na «Jeŭrabačańnie», ale biez asablivaha pośpiechu.
Ciapier viadzie viasielli ŭ Minsku i Mazyry. Vychoŭvaje z žonkaj maleńkaha syna.
Ksienija Sitnik
Dla Ksienii Sitnik 2005-y staŭ hodam pieramoh. Spačatku dziesiacihadovaja śpiavačka atrymała Hran-pry na dziciačym konkursie «Słavianskaha bazara», a potym pryniesła Biełarusi pieršuju pieramohu na dziciačym «Jeŭrabačańni».
Atrymlivać vyšejšuju adukacyju dziaŭčyna vyrašyła za miažoj — pastupiła na śpiecyjalnaść «žurnalistyka i kamunikacyja» ŭ Anhła-Amierykanski ŭniviersitet u Prazie. Vosiem hadoŭ Ksienija žyła ŭ Čechii. Jana pisała ŭ instahramie, što adnačasova lubiła i nienavidzieła Prahu. Tam u Ksienii byŭ prajekt, jaki arhanizoŭvaŭ stylnyja viasielli ŭ stalicy Čechii.
Ksienija — fieministka. U instahramie jana davoli časta vykazvaje svaje pohlady na roznyja temy, taksama piša vieršy.
Paśla Prahi dziaŭčyna kala dvuch hadoŭ žyła ŭ Dubai. Na pytańnie padpisčykaŭ u instahramie, dzie b chaciełasia žyć na stałaj asnovie, jana adkazała:
— Nivodnaja kraina dla pažyćciovaj emihracyi mnie nie zmoža spadabacca. Być zaŭsiody čužym nie tak prosta, jak padajecca na pieršy pohlad. Bo ščaśliva žyć doma — darahoha varta. Ale dla padarožžaŭ uvieś śviet cudoŭny i nieabchodny.
Sioleta svoj 29-ty dzień naradžeńnia Ksienija sustrakała ŭ Minsku i źbirała siabrovak u restaranie Martinique Bar. A ciapier znoŭ źjechała ź Biełarusi.
Andrej Kuniec
Vystup kučaravaha i charyzmatyčnaha chłopčyka z Mazyra staŭ dla Biełarusi adnym z paśpiachovych na dziciačym «Jeŭrabačańni». U 2006 hodzie Andrej Kuniec zaniaŭ druhoje miesca.
U 2010 hodzie jon vypuściŭ debiutny albom «Novy dzień». Andrej skončyŭ Biełaruski dziaržaŭny ŭniviersitet kultury i mastactvaŭ. Ciapier jon artyst Maładziožnaha teatra estrady. Naprykład, u vieraśni Andreja možna budzie ŭbačyć na scenie teatra ŭ muzyčnaj kamiedyi «Viasielle Rabinoviča», dzie jon hraje Iziu.
Alaksiej Žyhałkovič
U 2007 hodzie Alaksiej Žyhałkovič prynios Biełarusi druhuju ŭ historyi pieramohu na dziciačym «Jeŭrabačańni». Vystupaŭ chłopčyk ź pieśniaj «Ź siabrami», jakuju sam i napisaŭ.
Zrazumieła, što paśla hetaha školnika nakryła cunami ŭvahi — jaho pačali aktyŭna zaprašać i na aficyjnyja kancerty, i na karparatyvy.
Praz hady Alaksiej pryznavaŭsia ŭ intervju, što toje žyćcio jamu zusim nie padabałasia. Davodziłasia śpiavać pieśni, jakija nie čaplali jaho, — tahačasnyja aŭtary pisali niešta vielmi dalokaje ad hustaŭ padletka. Papularnaść Alaksiej ciarpieŭ, a nie atrymlivaŭ ad jaje asałodu…
U 13-14 hadoŭ jon pačaŭ cikavicca videazdymkami. U 15 pačaŭ zajmacca ŭ kinaškole, a ŭ 16 užo zarablaŭ tym, što rabiŭ videakantent.
Skončyŭšy škołu, Alaksiej pastupiŭ na śpiecyjalnaść «režysura kino i telebačańnia» ŭ Akademiju mastactvaŭ. Ciapier, miarkujučy pa sacyjalnych sietkach Žyhałkoviča, jon žyvie ŭ Varšavie i maje ŭłasny prajekt Zalex Films.
Juryj Dziemidovič
Videa z konkursnaj pieśniaj chłopca ź niezvyčajnaj źniešnaściu amal adrazu zavirusiłasia.
Ale samomu Juryju takaja słava nie padabałasia — jon ros u davoli relihijnaj siamji, z troch hadoŭ pieŭ u carkoŭnym chory. A hledačy biaskonca žartavali, što pieśniaj «Čaroŭny trusik» možna lohka vyklikać djabła. Tamu ŭ niejki momant chłopiec zajaviŭ, što bolš nikoli nie budzie vykonvać svoj hałoŭny chit — i strymaŭ abiacańnie. Navat admoviŭsia vystupać na razahrevie ŭ hurta The Prodigy, kali toj pryjazdžaŭ u Minsk.
Žyćcio paśla dziciačaha «Jeŭrabačańnia» i niečakanaja papularnaść stali surjoznym vyprabavańniem dla 13-hadovaha chłopca.
Dva hady tamu Juryj raspaviadaŭ u intervju, što, niahledziačy na toje, što jon zaniaŭ na hałoŭnym piesiennym konkursie Jeŭropy tolki 9-je miesca, jaho zavalili prapanovami ab pracy. Junuju zorku klikali vystupać na kancerty ŭ roznych miescach krainy i navat śvietu.
I voś u niejki momant školnik banalna stamiŭsia praz toje, što jaho žyćcio pieranasyčana padziejami. Jamu chaciełasia hulać u futboł i haniać na rovary, a treba było žyć pa strohim raskładzie, u jakim znachodziłasia miesca dla repietycyj i biaskoncych vystupaŭ, ale amal nie praduhledžvałasia času dla adpačynku. Siabry klikali pahulać u dvary, a Juru było nielha, bo treba było vučyć novy repiertuar.
Ale jon daŭ rady takoj niedziciačaj nahruzcy i vyrašyŭ prafiesijna zajmacca muzykaj i ŭ darosłym žyćci. U 17 hadoŭ u Juryja złamaŭsia hołas, i jon vyrašyŭ vyvučycca na dyryžora, tamu pastupiŭ u Maskoŭskuju kansiervatoryju imia Čajkoŭskaha.
U 2021 hodzie Juryj vystupiŭ dyryžoram-pastanoŭščykam opiery «Aleka» Rachmaninava, tady ž staŭ vykładčykam i dyryžoram Maskoŭskaj kansiervatoryi. Ciapier Juryj pracuje ŭ Maryinskim teatry.
Jamu daviarajuć dyryžyravać viadučymi kalektyvami Rasii. Rasijskija ŚMI nazyvajuć Dziemidoviča «adnym z samych jarkich muzykaŭ novaha pakaleńnia». Sam ža chłopiec pisaŭ u instahramie, što «biełarusy robiać Maskvu krychu dabrejšaj i jarčejšaj». U lipieni ŭ jaho adbyŭsia tvorčy viečar u Paŭnočnaj Asiecii.
Nakont vajny Juryj publična nie vykazvaŭsia. U 2017 hodzie adpačyvaŭ na mory ŭ akupavanym Krymie i pościŭ foty z hary Aj-Pietry.
Svajoj druhoj luboŭju paśla muzyki Juryj nazyvaje futboł. Jon taksama lubić hulać u šachmaty (maje razrad) i katacca na łyžach.
Lidzija Zabłockaja
U 2011 hodzie pieśnia «Anioły dabra» pryniesła Lidzii Zabłockaj 3-je miesca na dziciačym «Jeŭrabačańni». Jak i inšyja «jeŭravizijnyja» dzieci, Lidzija stała aktyŭnaj udzielnicaj roznych aficyjnych kancertaŭ i mierapryjemstvaŭ.
Ale svaju budučyniu dziaŭčyna bačyła nie stolki na scenie, kolki ŭ kadry na telebačańni — jana maryła pra pracu na BT. U sacsietkach Lidzija pisała, što pryncypova nie chacieła adčyniać dźviery «Biełteleradyjokampanii» z nahi i patrabavać asablivych adnosin praz «Jeŭrabačańnie».
Jana skončyła fakultet žurnalistyki BDU i raźmierkavałasia na telekanał «Biełaruś 1». U asnoŭnym robić siužety pra kulturu. Svaich prałukašenkaŭskich pohladaŭ Zabłockaja nie chavaje. Lidzija zachaplałasia tym, što Kupałaŭski teatr praciahnuŭ pracu paśla taho, jak adtul pajšli artysty, jakija byli suprać hvałtu i falsifikacyi vybaraŭ. Pryznavałasia ŭ rasčaravańni ŭ niekatorych artystach. Asabliva jaje aburyŭ učynak hrupy NaviBand.
Niadaŭna Lidzija pabrałasia šlubam z Antonam Malutam, jaki pracuje ekanamičnym ahladalnikam na BT. Hałoŭnaje «Tak!» maładyja ludzi kazali rehistratarcy šlubu na tematyčnaj fotazonie siarod starych televizaraŭ, jakija jarka pafarbavali i ŭpryhožyli kvietkami. Na śviacie śpiavaŭ rasijski śpiavak Ivan Dziatłaŭ, pieramožca druhoha siezona muzyčnaha prajekta «Faktar.by». A siarod hanarovych haściej byŭ Fiodar Drabienia — były namieśnik dekana pa vychavaŭčaj rabocie žurfaka BDU, jaki paśla vybaraŭ 2020 hoda vyznačyŭsia represijami ŭ dačynieńni da studentaŭ i vystupaŭ u sudzie ŭ jakaści śviedki pa «spravie studentaŭ».
Alaksandr Minionak
Na dziciačym «Jeŭrabačańni-2016» Alaksandr nie tolki śpiavaŭ, ale i sprytna kataŭsia pa scenie na hiraskutary. Zaniaŭ u vyniku 7-je miesca. Dalej tvorčaje žyćcio padletka składvałasia davoli paśpiachova. Jon byŭ zapatrabavany i jak śpiavak, i jak viadučy, a taksama zdymaŭsia ŭ rekłamie.
U 2017 hodzie Saša Minionak staŭ udzielnikam čaćviortaha siezona ŭkrainskaha teleprajekta «Hołas. Dzieci». U tym ža hodzie jon ź siamjoj pierajechaŭ u Kijeŭ, bo tam bačyŭ bolš mahčymaściaŭ dla artystyčnaj karjery.
Paźniej chłopiec napisaŭ u sacsietkach: «Kali my jechali va Ukrainu, nam raskazvali takija žachi, što tam nacysty, što, kali ty razmaŭlaješ na ruskaj, ciabie zabjuć, pasadziać i šmat čaho…» Jon pryznaŭsia, što pieršy čas krychu bajaŭsia razmaŭlać — a potym sam ździŭlaŭsia tamu, jak možna było pavieryć historyjam prapahandystaŭ na telebačańni.
23 lutaha 2022 hoda śpiavak atrymaŭ dazvoł na stałaje miesca žycharstva va Ukrainie. A ŭžo nazaŭtra pačałasia vajna. Paśla pieršaj nočy ŭ bambaschoviščy, siamja vyrašyła evakuiravacca ŭ Kijeŭskuju vobłaść, a potym źjechała z krainy.
— Maje siabry, znajomyja, blizkija nie vieryli, kazali, što my sami siabie bambim, što nas pryjšli ratavać, — pisaŭ u instahramie artyst. — Mnohija tak i nie pavieryli nam, i našy znosiny spynilisia. Maja mama nie chacieła nikudy źjazdžać, jana chacieła zastacca ŭ svaim lubimym Kijevie. Vielmi doŭha na suviaź nie vychodzili našy znajomyja i siabry, ceły miesiac my pražyli ŭ zdahadkach i nadziejach. Dziakuj Bohu, ź imi ciapier usio dobra.
Emacyjanalny post Alaksandr skončyŭ frazami: «Słava Ukrainie! Žyvie Biełaruś!».
Ciapier Alaksandr razam z žonkaj-ukrainkaj žyvie ŭ Kanadzie.
Barabanščyku, jaki viarnuŭsia z Hruzii, pahražaje da 12 hadoŭ kałonii1
Kamientary