Prakuror paprasiła 24 hady dla abvinavačanaha ŭ žorstkim zabojstvie dziaŭčyny-kasira
Abvinavačany śćviardžaje, što nie chacieŭ zabivać, a tolki płanavaŭ abrabavać.
Dziaržaŭny abvinavaŭca paprasiła 24 hady pazbaŭleńnia voli ŭ kałonii ŭzmocnienaha režymu dla abvinavačanaha ŭ zabojstvie 20-hadovaj Taćciany Piatrovaj — kasirki abmiennaha punkta ŭ Zavodskim rajonie Minska, piša «Sputnik».
Dziaržaŭny abvinavaŭca taksama paprasiła sud aštrafavać 49-hadovaha Alaksandra Dudarčyka na 60 bazavych (2400 rubloŭ).
«Vina Dudarčyka ŭ zabojstvie z asablivaj žorstkaściu i razboi całkam dakazanaja», — zajaviła dziaržaŭny abvinavaŭca.
U sudzie vystupiła i maci zabitaj dziaŭčyny, jakaja paprasiła sud pry pryznačeńni pakarańnia Dudarčyku ŭličyć, što jon pa-źviersku pazbaviŭ žyćcia jaje dačku.
U svaju čarhu advakat Dudarčyka, vystupajučy ŭ sprečkach, pierakonvaŭ sud u tym, što ŭ abvinavačanaha nie było namieru zabivać dziaŭčynu.
Pa słovach abaroncy, Dudarčyk nie schilny da hvałtoŭnych dziejańniaŭ i jaho ŭ peŭnaj stupieni spravakavała toje, što achviara prajaviła śmiełaść i akazała supraciŭ.
«Jon uśviedamlaje žach ździejśnienaha», — skazała advakat.
Pry hetym jana adznačyła, što niama padstaŭ asprečvać abvinavačvańnie ŭ zabojstvie z asablivaj žorstkaściu.
Pry pryznačeńni pakarańnia advakat paprasiła sud uličyć čystasardečnaje raskajańnie abvinavačanaha.
U apošnim słovie ŭ sudzie abvinavačany Dudarčyk paprasiŭ prabačeńnia ŭ maci zabitaj, zajaviŭ, što raskajvajecca.
Prysud Dudarčyku budzie abvieščany 12 žniŭnia a 17:00.
Zabojstva było ździejśniena z asablivaj žorstkaściu — dziaŭčynie było naniesiena 19 nažavych kołata-rezanych ran, u hałavu, šyju, ruki, taksama byli pranikalnyja nažavyja ranieńni ŭ vobłaść brušnoj połaści. Dziaŭčyna pamierła na miescy ad atrymanych ranieńniaŭ.
Paciarpiełaj pa spravie prachodzić maci zabitaj dziaŭčyny. Jana i jaje muž zajavili hramadzianskija pazovy ŭ dačynieńni da Dudarčyka kampiensacyi maralnaj škody — na dvaich 100 tysiač rubloŭ. Jon zajaviŭ, što pryznaje patrabavańni.
Dudarčyk byŭ zatrymany ŭ studzieni 2024 hoda, u dačynieńni da jaho była ŭzbudžanaja kryminalnaja sprava.
Jak vynikaje z materyjałaŭ spravy, vyjści na Dudarčka atrymałasia dziakujučy hienomnaj ekśpiertyzie — na miescy złačynstva byŭ znojdzieny ramieńčyk, jaki adarvaŭsia ad jaho palčatki. Dadzieny remień źjaŭlajecca rečavym dokazam pa spravie.
Mužčynu zatrymali, kali jon išoŭ na pracu, amal praz 15 hadoŭ, piša Onliner.by.
Dastavili ŭ RUUS, stali praviarać na palihrafie — i padčas hetaj pravierki jon zrazumieŭ, za što zatrymany. Tady vyrašyŭ raskazać pra złačynstva.
— Vyrašyli pryznacca, kali stała viadoma, što vy datyčnyja?
— Zrazumieŭ, što šukajuć pa hetym złačynstvie.
— Čamu sami z 2009 pa 2024 hod nie pryznalisia?
— Skažu ščyra, było strašna.
U abvinavačanaha spytalisia, ci byŭ jon u abmieńniku da 10 śniežnia 2009 hoda, — praviarajuć, ci moh raniej pakinuć ślady na miescy złačynstva.
Skazaŭ, što nie.
Mužčyna nie zhodny z abvinavačvańniem u pytańni pra pahrozy zabojstvam:
— Ja nie płanavaŭ zabivać, navat nie płanavaŭ prynosić niejkuju cialesnuju škodu.
Ciapier čytajuć
Šalona papularnaja minskaja błohierka patraciła na śviatkavańnie dnia naradžeńnia amal $16 tysiač34
Kamientary