Ci praciahnie Łukašenka partyjami vypuskać palitviaźniaŭ? Razvažaje Karbalevič
Dniami Łukašenka vydaŭ ukaz ab pamiłavańni 30 palitviaźniaŭ. Heta ŭžo druhaja chvala vyzvaleńnia pamiłavanych. «Naša Niva» spytała ŭ analityka, ci varta spadziavacca, što Łukašenka praciahnie vypuskać palitviaźniaŭ partyjami.
Palityčny ahladalnik «Radyjo Svaboda» Valer Karbalevič ličyć, što ŭ vieraśni na volu vyjdzie jašče adna porcyja palitviaźniaŭ.
«Pra heta śviedčać sami ŭłady. U kałonii pryjechała šmat čynoŭnikaŭ, jakija patrabujuć pisać prašeńni ab pamiłavańni. Vaskrasienski kazaŭ, što nibyta napisana 900 prašeńniaŭ.
Tamu chutčej za ŭsio da 17 vieraśnia vyjdzie čarhovaja partyja palitviaźniaŭ. A voś što budzie dalej, pradkazać ciažka», — kaža analityk.
Čamu ŭvohule Łukašenka pajšoŭ na takija kroki?
Palitołah ahučvaje dva mahčymyja matyvy, čamu Łukašenka pačaŭ krychu vypuskać palitviaźniaŭ. Na jaho dumku, jon takim čynam hulaje adrazu na dźvie aŭdytoryi, pieršaja ź jakich — unutranaja.
«Heta sproba palepšyć svoj imidž napiaredadni prezidenckaj kampanii 2025 hoda, zrabić jaho bolš humannym i čałaviečnym. Situacyi, kali źniavolenyja pamirajuć u turmach, vyhladajuć niadobrymi navat z punktu hledžańnia jaho prychilnikaŭ», — ličyć Karbalevič.
Pry hetym ułada adnačasova pasyłaje sihnały, što nijakaj libieralizacyi nie budzie.
«Praciahvajucca novyja zatrymańni, idzie praces pa pieravodzie značnaj kolkaści ludziej z chatniaj chimii ŭ kałonii. Dla Łukašenki heta vielmi pryncypovy momant, kab ludzi nie rassłablalisia i nie padumali, što adbyvajecca niejkaja libieralizacyja».
Druhim adrasatam, na kaho nakiravanyja hety dziejańni, Valer Karbalevič nazyvaje Zachad.
Analityk miarkuje, što Łukašenka choča dabicca ad Zachadu pryznańnia vynikaŭ nastupnych vybaraŭ.
«U razumieńni Łukašenki Zachad pavinien źmirycca z tym, što adbyłosia ŭ 2020 hodzie, i pieraharnuć hetuju staronku, zrazumieć, što ŭ Biełarusi jość voś takaja novaja sistema i nikudy ad hetaha nie padziecca».
Hetaje pryznańnie, miarkuje analityk, patrebna Łukašenku tamu, što žyć va ŭmovach, kali značnaja častka śvietu nie pryznaje ciabie lehitymnym kiraŭnikom, nie kamfortna. Tamu pryznańnie na Zachadzie moža być važnym dla Łukašenki.
Faktar pieramoŭ
Druhi matyŭ — mahčymyja pieramovy pamiž Rasijaj i Ukrainaj.
«Kali jany raptam zdaracca, to zrazumieła, što Łukašenka chacieŭ by ŭziać u ich udzieł. I kali takaja situacyja ŭźniknie, to ŭ zachodnich krain i tych ža ŭkraincaŭ moža ŭźniknuć pytańnie: «A ty chto taki?»
Tamu, dziela taho, kab takija pytańni nie ŭźnikali, jamu i patrebnaje heta pryznańnie. Jamu treba, kab jaho ličyli chaj nie vielmi demakratyčnym, ale lehalnym kiraŭnikom biełaruskaj dziaržavy. Pa hetaj pryčynie Łukašenka i padaje takija maleńkija sihnały, sprabuje zandziravać», — miarkuje Karbalevič.
Analityk ličyć, što takim čynam Łukašenka pakazvaje, što jon i dalej moža iści pa hetym šlachu, kali buduć zroblenyja peŭnyja kroki nasustrač.
Pry hetym, na dumku Karbaleviča, u Łukašenki niama nijakaha dakładnaha płanu, jak krok za krokam dziejničać dalej.
«Ciapier adbyvajucca sproby pravieryć mahčymaści i reakcyi, i ŭžo ŭ zaležnaści ad vynikaŭ buduć rabicca nastupnyja kroki».
Łukašenka raźličvaje na adlihu adnosin z Zachadam?
Karbalevič ličyć, što Łukašenka sprabuje paŭtaryć historyju 2010-ch hadoŭ, kali paśla prezidenckich vybaraŭ i razhromu apazicyi ŭsio było zamarožana i ekśpierty kazali, što nijakaj adlihi ŭ adnosinach z Zachadam nie budzie.
«Ale potym zdaryŭsia Krym i pačaŭsia praces razmarozki, choć režym radykalna nie źmianiŭsia. Chutčej, źmianiłasia staŭleńnie Zachadu da režymu. Prykładna na takuju schiemu i raźličvaje Łukašenka. I niahledziačy na toje, što situacyja ŭ paraŭnańni z tym pieryjadam radykalna źmianiłasia, Łukašenka praciahvaje dziejničać pa anałohii. Maŭlaŭ, kali takoje było raniej, to čamu nie moža być ciapier».
-
Navošta Łukašenku «prezidencki bal» — takaja demanstratyŭnaja i krychu archaičnaja, seksisckaja pa formie tradycyja?
-
Radzina rezka adkazała Chalezinu: Nieŭźlin — moj siabar, jaki šmat zrabiŭ dla raźvićcia demakratyi ŭ mnohich krainach
-
Šrajbman adkazvaje, ci mohuć pieramovy pa Ukrainie prajści ŭ Biełarusi
«A što ŭ vas za prablemy? Daloka da Minska ci niama kamu padvieźci?» Publičnaja pikiroŭka Łukašenki i Pašyniana10
Kamientary
Rańšie on sožał lidierov protiesta i eto imieło na nich vlijanija,a siejčas mietut vsiech vpodriad. Vot eto nado široko ośvieŝať. Čto novych političieskich riepriesij nie budiet poka sidiat staryje i možno śmieło vychodiť na ulici v 2025h.