Kalinoŭski, Šrek, Nokia 3310. Cichanoŭskaja zapoŭniła ankietu, jak u dziacinstvie

Śviatłana Cichanoŭskaja naradziłasia 11 vieraśnia 1982 hoda — siońnia ŭ jaje dzień narodzinaŭ, joj spaŭniajecca 42 hady.

Bolš jak čatyry hady tamu jana pajšła kandydatkaj u prezidenty zamiest źniavolenaha muža Siarhieja Cichanoŭskaha. Pavodle dadzienych hramadskaj kampanii «Hołas», jana pieramahła ŭ pieršym tury prezidenckich vybaraŭ (što paćviardžaje analiz sfatahrafavanych biuleteniaŭ i pratakołaŭ), ale zamiest pryznańnia parazy režym Alaksandra Łukašenki vydvaryŭ Cichanoŭskuju z krainy i raspačaŭ masavyja represii.

Z taho času Cichanoŭskaja dała bieźlič intervju (naprykład, intervju «Biełsatu» praz 12 dzion pa vybarach), šmat raskazvała pra svaju dziejnaść. Vakoł jaje skłałasia šyrokaja kaalicyja demakratyčnych siłaŭ, ab jakoj taksama viadoma niamała.

Dy Cichanoŭskaja — nie tolki centr demakratyčnaj kaalicyi, ale i žyvy čałaviek. Kab daviedacca, jaki mienavita čałaviek, «Biełsat» skłaŭ ankietu, padobnuju da tych, što ci nie ŭsie my rabili dla siabroŭ u škołach i dziciačych sadkach. Pytańni i adkazy takija:

Pavialičyć

1. Imia: Śviatłana Cichanoŭskaja.
2. Dzień narodzinaŭ: 11.09.1982.
3. Rost: 168.
4. Koler vačej: Karyja.
5. Koler vałasoŭ: Ciomnyja.
6. Ulubiony koler: Bieły.
7. Najlepšy siabar: Siarhiej Cichanoŭski.
8. Samaja važnaja rysa charaktaru ŭ ludziach: Sumleńnie.
9. Ulubiony horad: Vioska Sinkievičy (miesca dziacinstva).
10. Ulubionaja ježa: Katlety )), babulin sup rezanki.
11. Ulubiony napoj: Jabłyčny sidr.
12. Ulubionaje nadvorje: Kali hladzieć kino, to pad doždž, a kali kudyści iści, to ciopłaje, kamfortnaje letniaje nadvorje.
13. Ź jakoj kvietkaj asacyjuješ siabie: Siabie z kvietkaj nie asacyjuju, a ŭlubionyja kvietki — biełyja praleski.
14. Ulubiony pradmiet u škole: Usie. Kali vyłučać adzin — matematyka.
15. Ulubiony fantastyčny piersanaž: Šrek.
16. Ulubiony histaryčny piersanaž: Kastuś Kalinoŭski.
17. Knihi, jakija ŭsim varta pračytać: «Zekamieron» Maksima Znaka.
18. Ulubiony paet i / abo vierš: Uładzimir Vysocki «Jon nie viarnuŭsia z boju».
19. Ulubiony film / sieryjał: Šmat. «1+1».
20. Ulubiony aktor / ulubionaja aktorka: Kievin Spejsi.
21. Ulubionaja muzyka — pieśni / hurt, śpiavak ci śpiavačka: «Naviband», usia biełaruskaja muzyka.
22. Ulubionaja krynica navinaŭ: SDŽ, «Zierkało».
23. Ulubiony sposab adpačynku ciapier: Supolny prahlad multfilmaŭ ź dziećmi.
24. Jakim byŭ by idealny adpačynak: Lažačy + aktyŭny — 50 na 50.
25. Jakija chobi ciapier: Samastojna vučusia hrać na fartepijana.
26. Jakija chobi byli raniej: U dziacinstvie źbirała fanciki.
27. Ulubiony sport: Niama.
28. Za jakuju kamandu / spartoŭca zaŭzieješ: Za Biełaruś.
29. Ulubionaja madel aŭta: Hummer.
30. Ulubiony brend adzieńnia: Ja hetym nie vielmi cikaŭlusia.
31. Ulubionaja madel telefona: Nokia 3310.
32. Zhuščonka — hłybockaja ci rahačoŭskaja: Nie budu vyłučać, a to pabjaciesia.

Niekatoryja adkazy varta rastłumačyć.

«Katlety» — śmiech z taho, što praciŭniki Cichanoŭskaj vykarystoŭvajuć suprać jaje. Na pieradvybarčym mitynhu ŭ Homieli 26 červienia 2020 hoda Cichanoŭskaja kazała, što jana nie palityk, što nie choča ŭłady i što chacieła b tolki «muža, dziaciej i dalej smažyć svaje katlety». Praciŭniki jak z boku režymu Łukašenki, tak i z «apazicyi da apazicyi» paśla jašče šmat razoŭ zhadvali tyja katlety z namiokam na toje, što «miesca Cichanoŭskaj na kuchni».

«1+1» — tak u biełaruskim, rasiejskim i ŭkrainskim prakacie zvałasia francuzskaja kamiedyja 2011 hoda Intouchables (dasłoŭna — «Niedatykalnyja»). Paźniej vyjšła niekalki remejkaŭ filmu, samy viadomy ź jakich — amierykanski The Upside (dasłoŭna — «Pieravaha») 2017 hoda, jaki ŭ biełaruskim, rasiejskim i ŭkrainskim prakacie zvaŭsia «1+1: Halivudskaja historyja».

Lubimy akcior Cichanoŭskaj Kievin Spejsi ŭ 2017 hodzie trapiŭ u šerah skandałaŭ: jaho vinavacili ŭ sieksualnym hvałcie. Abvinavačvańni vyhladali nastolki realistyčna, što ad Spejsi adviarnuŭsia amal uvieś Halivud. Navat u sieryjale «Kartačny domik» (House of Cards), dzie Spejsi ciaham piaci siezonaŭ vykonvaŭ hałoŭnuju rolu prezidenta Złučanych Štataŭ, jaho zamianili, vypraviŭšy piersanaža «ŭ adstaŭku». Ale Spejsi apraŭdali ŭ sudach: u 2022 hodzie ŭ Ńju-Jorku i ŭ 2023-m u Łondanie.

SDŽ — «Strana dla žiźni», miedyjaprajekt Siarhieja Cichanoŭskaha. Najbolš papularny ŭ hetaj sietcy — Youtube-kanał «Strana dla žiźni», ale prajekt pradstaŭleny taksama ŭ Telegram, Instagram i inšych sacsietkach. Paralelna ź miedyjaprajektam dziejničaje fond «Kraina dla žyćcia», jaki zajmajecca dapamohaj palitviaźniam i ichnym siemjam, padtrymkaj vałanciorskaha ruchu i hramadzianskaj supolnaści.

Hummer — amierykanski brend aŭtamabilaŭ-pazadarožnikaŭ na bazie vajskovaj mašyny HMMWV. Heta moža być adsyłkaj da daŭniaha miemu: nie raz žartavali, što pieramožca tryumfalna ŭjazdžaje kudyści ŭžo nie na biełym kani, a na biełym «Chamiery» ci na biełym tanku Abrams. Tym bolš, u 2021 hodzie łukašenkaŭskaja prapahanda raspaviadała, što praciŭniki Łukašenki rychtavali napad ź Litvy na «150 džypach z bujnakalibiernymi kulamiotami». 

Nokia 3310 — dźvie roznyja madeli telefonaŭ. Kłasičnaja madel finskaj kampanii Nokia vyjšła ŭ prodaž u 2000 hodzie i stała adnoj z samych papularnych u historyi: tych kłasičnych Nokia 3310 pradali 126 młn aparataŭ (rekord u inšaj madeli — paźniejšuju Nokia 1100 pradali až 250 młn). Madel «3310» słaviłasia nadziejnaściu i stała miemam: žartavali, što takim telefonam možna kałoć arechi. Dy telefonny biznes Nokia akazaŭsia nie takim nadziejnym: nie pieražyŭ kankurencyi sa smartfonami na iOS i Android, u 2014 hodzie telefonnuju častku biznesu pradali Microsoft (sama kampanija Nokia zastałasia ź inšymi napramkami dziejnaści ŭ telekamunikacyjach). U 2016 hodzie pad brendam Nokia stali vypuskać telefony, raspracavanyja finskaj HMD Global. U 2017 hodzie na rynak vyjšaŭ novy telefon pad nazvaj Nokia 3310, jaki mieŭ sučasny dyzajn z adsyłkami da kłasičnaj madeli «3310» i byŭ nie smartfonam, a mienš funkcyjanalnaj «zvaniłkaj». Kłasičnyja Nokia 3310 ciapier možna kupić chiba ŭ kalekcyjanieraŭ, a viersija 2017 hoda dahetul sustrakajecca ŭ prodažy ŭ zvyčajnych kramach.

• 8
• 0
• 1
• 0
• 0
• 0
• 1
• 7