Stała viadoma, dzie ciapier pracuje były vysokapastaŭleny hubazikaviec Cichinia, jakoha abvinavačvali ŭ karupcyi
Uładzimir Cichinia šmat hadoŭ uznačalvaŭ 2-je ŭpraŭleńnie HUBAZiK MUS. U kancy 2019 hoda jon pajšoŭ u adstaŭku, a ŭ studzieni 2020-ha staŭ fihurantam hučnaj «cukrovaj spravy». Tady KDB nazvaŭ Cichiniu «faktyčnym apiekunom» złačynnaj schiemy — adnak u sudzie jon tak i nie źjaviŭsia. Ciapier vydańnie «Lusterka» vyśvietliła, dzie hety były siłavik prystroiŭsia paśla taho.
Pryvatny miedcentr ź viadomymi imionami
Pry dapamozie «Kibierpartyzan» «Lusterka» atrymała danyja rejestraŭ, u jakich paznačanyja aficyjnyja pracoŭnyja miescy byłoha siłavika. Samy aktualny zapis ab pracy ciapier 61-hadovaha Uładzimira Cichini — biełaruskaje TAA «Miedvajz». Heta centr mikrachirurhii voka, jaki prapanuje pasłuhi pa łaziernaj karekcyi zroku pad brendam Voka. Były siłavik pačaŭ svaju pracu tam ź lipienia 2022 hoda.
Žurnalistka «Lusterka» źviarnułasia ŭ pryjomnuju miedcentra jak hramadzianka. Tam paćvierdzili, što taki supracoŭnik pracuje va ŭstanovie i ciapier. Adnak pasadu jaho nie nazvali i źviazać ź im nie zmahli, bo ŭ jaho «raźjazny vid pracy».
Miedcentram Voka vałodaje Aleh Paźniak. Cikava, što siarod supracoŭnikaŭ miedcentra značycca aftalmołah Dźmitryj Abielski. Heta starejšy syn Iryny Abielskaj — kiraŭnicy Respublikanskaha kliničnaha miedcentra i maci małodšaha syna Alaksandra Łukašenki Mikałaja.
«Zorka kryminalnaha vyšuku»
Da «cukrovaj spravy» Uładzimir Cichinia doŭhija hady ruchaŭsia ŭvierch pa karjernaj leśvicy MUS. Jon pačaŭ pracavać u minskaj milicyi z pasady staršaha opierupaŭnavažanaha jak minimum z 1996 hoda. Imia siłavika hučała ŭ suviazi z takimi hučnymi rasśledavańniami, jak «sprava marozaŭcaŭ», «sprava pasiałkovych», a taksama pa spravach usich viadomych u Biełarusi «kryminalnych aŭtarytetaŭ».
Milicejskaja presa nazyvała Cichiniu «lehiendarnym baraćbitom i pahrozaj złodziejaŭ u zakonie», «zorkaj kryminalnaha vyšuku». Da 2007 hoda jon dasłužyŭsia da pasady namieśnika načalnika Hałoŭnaha ŭpraŭleńnia pa baraćbie z arhanizavanaj złačynnaściu i karupcyjaj.
«Napeŭna, jon byŭ samym upłyvovym čałaviekam u HUBAZiK, — uspaminaŭ pradstaŭnik arhanizacyi «Bajpoł» i eks-načalnik 3-ha ŭpraŭleńnia HUBAZiK Alaksandr Azaraŭ. — Jon prasłužyŭ bolš za ŭsich kiraŭnikoŭ i, napeŭna, bolš za ŭsich supracoŭnikaŭ. Jaho viedaŭ, jak toj kazaŭ, kožny sabaka. Luby raniej sudzimy čałaviek viedaŭ proźvišča Cichinia».
U śniežni 2019 hoda — nieŭzabavie paśla 56-hodździa siłavika — aficyjna abviaścili pra jahonuju adstaŭku. A na jahonaje miesca pryjšoŭ Dzianis Čamadanaŭ, muž na toj momant pres-sakratarki MUS Volhi Čamadanavaj, a ciapier kiraŭnicy Hałoŭnaha ŭpraŭleńnia ideałahičnaj raboty i pa spravach moładzi Minharvykankama.
«Faktyčny apiakun» chabarnikaŭ
Z danych rejestraŭ vynikaje, što paśla zvalnieńnia z HUBAZiKa Uładzimir Cichinia pierajšoŭ u Departamient finansaŭ i tyłu MUS. Adnak ličyŭsia tam jon niadoŭha. Užo praź miesiac, u studzieni 2020 hoda, źjaviłasia infarmacyja pra zatrymańnie siłavika.
Nieŭzabavie KDB vypuściŭ na dziaržaŭnym TB film «Cukrovaja mafija». U im jon abvinavaciŭ dyrektaraŭ usich cukrovych zavodaŭ i niekalkich biznesmienaŭ u nielehalnych schiemach i chabarnictvie. Cichiniu ŭ siužetach dziaržaŭnaha telebačańnia nazyvali samym daśviedčanym udzielnikam hrupy i jaje faktyčnym apiekunom. Pavodle danych KDB, jon paviedamlaŭ dyrektaram zavodaŭ pra vyšukovyja mierapryjemstvy, jakija pravodzilisia adnosna ich, davaŭ parady pa kanśpiracyi, vučyŭ vyčyščać ślady, harantavaŭ im spynieńnie pravierak i za heta atrymlivaŭ niezakonnaje hrašovaje ŭznaharodžańnie.
Apošniaje daručeńnie dla Cichini — nie dapuścić na pasadu dyrektara «Biełdziaržcharčprama» niepažadanaha čałavieka, pry jakim schiema nie mahła b isnavać.
«Na žal, ale lehiendarny baraćbit z bandytyzmam i karupcyjaj u 90-ch i nulavych zhadžajecca za ŭznaharodžańnie strachavać cukrovuju mafiju i jaje schiemu», — kazaŭ u lutym 2020-ha hoda zakadravy hołas u adnym z telesiužetaŭ.
Dalej išła apieratyŭnaja zdymka: Cichinia i maskoŭski biznesmien Siarhiej Kananienka ŭ handlovym centry, siłavik niešta kładzie ŭ svaju kišeniu. KDB tłumačyć: chabar jon užo čakaŭ.
I znoŭ opierupaŭnavažany
Niahledziačy na surjoznyja abvinavačvańni, u žniŭni 2020 hoda stała viadoma, što były namieśnik načalnika HUBAZiK vyjšaŭ na volu pad padpisku ab niavyjeździe. Cikava, što padčas mierkavanaha znachodžańnia pad vartaj Cichinia aficyjna byŭ aformleny ŭ MUS jak «hałoŭny śpiecyjalist; dziaržaŭny słužačy, jaki nie źjaŭlajecca pradstaŭnikom ułady».
U kastryčniku 2020 hoda (užo paśla vyzvaleńnia) jaho znoŭ zapisali «staršym opierupaŭnavažanym MUS» — pa ŭsioj bačnaści, heta była pasada ŭ struktury HUUS Minharvykankama. U 56 hadoŭ Uładzimir Cichinia znoŭ apynuŭsia na toj ža pasadzie, ź jakoj pačynaŭ karjeru ŭ siłavych viedamstvach.
Eks-supracoŭnik HUBAZiK Stanisłaŭ Łupanosaŭ, jaki dałučyŭsia da «Bajpoła» i ciapier zavočna asudžany ŭ Biełarusi da 18 hadoŭ kałonii, uspaminaŭ pra vyzvaleńnie Cichini ŭ intervju «Našaj Nivie».
«Ź Cichiniem ja amal nie pierasiakaŭsia, jaho vypuścili ź SIZA, kab pravodzić jezuickuju rabotu z kryminalnymi elemientami, jakich jon viedaŭ pa svajoj raniejšaj dziejnaści. Im vydali aryjenciroŭki na biznesmienaŭ, ź jakich jany pavinny byli vytrasać hrošy nibyta na «finansavańnie pratestaŭ».
Raźlik byŭ na toje, što kamiersanty pajšli b z zajavami ŭ milicyju, i asabovamu składu inšych padraździaleńniaŭ było b prademanstravana, jakimi mietadami dziejničajuć prychilniki pieramien — praz kryminalnych aŭtarytetaŭ. Ale «błatnyja» abo sabatavali zadańnie, abo papiaredzili biznesmienaŭ, adkul rastuć nohi. Jon tak i prasiadzieŭ usie padziei na svajoj dačy».
Sud pa «cukrovaj spravie» išoŭ ź lipienia da śniežnia 2021-ha. Na łavie padsudnych było dziesiać čałaviek, jany atrymali terminy ad 3 da 13 hadoŭ pazbaŭleńnia voli.
A što Cichinia? Dakładna nieviadoma.
Rasijskaje ahienctva Sputnik sa spasyłkaj na infarmavanyja krynicy paviedamlała, što sprava vysokapastaŭlenaha siłavika, chutčej za ŭsio, vyłučanaja ŭ asobnuju vytvorčaść. Adnak paśla hetaha ŭ publičnym poli nie źjaŭlałasia nijakaj infarmacyi pra jaje razhlad.
Pavodle infarmacyi arhanizacyi «Biełpoł», u traŭni 2021 hoda vytvorčaść u dačynieńni da Cichini była prypynienaja pavodle p. 5 č. 1 art. 246 Kryminalna-pracesualnaha kodeksa — praz «niemahčymaść praviadzieńnia śledčych dziejańniaŭ, bieź jakich nie moža być pryniataja pastanova ab zakančeńni papiaredniaha śledstva».
Pradstaŭnik «Biełpoł» vykazaŭ zdahadku, što były siłavik paźbieh pakarańnia.
«Mabyć, vielmi ciesna supracoŭničaŭ sa śledstvam. Dy i pytańnie tam pa spravie tyčyłasia 2000 dalaraŭ, jakija jon nibyta pavinien byŭ kamuści pieradać u AUS», — adznačyŭ jon.
Aficer HUBAZiKa, jaki pieradavaŭ infarmacyju ruchu za svabodnyja vybary, daŭ pieršaje intervju: Chaj dumajuć, što ja adzin taki, chaj supakojvajuć siabie
KDB adpuściŭ hałoŭnaha zmahara sa złodziejami ŭ zakonie Uładzimira Cichiniu pad padpisku ab niavyjeździe
Hałoŭny zmahar sa zładziejami ŭ zakonie Cichinia akazaŭsia ŭciahnuty ŭ «cukrovuju spravu»
KDB zatrymaŭ hałoŭnaha zmahara sa złodziejami ŭ zakonie Uładzimira Cichiniu. Syn: Nie za chabar
Stała viadoma, kudy pastavili dyrektaram pamiłavanaha Kryštapoviča. Papiaredniuju načalnicu niadaŭna pasadzili
Asudžany na 13 hadoŭ Michaił Kryštapovič paprasiŭ pamiłavańnia ŭ Łukašenki i vyjšaŭ na volu, atrymaŭšy ŭ votčynu kałhas
Kamientary