Ministr Ivan Kubrakoŭ i daradca ministra abarony Ukrainy Alaksandr Kubrakoŭ — svajaki? Nie, fejk
U miedyja i sacyjalnych sietkach raspaŭsiudžvajecca infarmacyja pra toje, što ministr unutranych spraŭ Biełarusi Ivan Kubrakoŭ nibyta davodzicca rodnym dziadźkam ukrainskamu palityku Alaksandru Kubrakovu. Hetaja historyja šyroka razyšłasia ŭ biełaruskich vydańniach, adnak vyhladaje, što jana biespadstaŭnaja. Radyjo Svaboda razabrałasia, adkul uziałasia hetaja navina, a taksama sabrała fakty i dakumienty, jakija jaje abviarhajuć.
Chto taki Alaksandr Kubrakoŭ?
Alaksandr Kubrakoŭ naradziŭsia 20 žniŭnia 1982 hoda ŭ Pieršatraviensku (ciapier Šachtarskaje) Dnieprapiatroŭskaj vobłaści Ukrainy. Da 2019 hoda pracavaŭ u śfiery markietynhu i IT, paśla byŭ abrany deputatam Viarchoŭnaj Rady ad partyi «Słuha naroda». Paźniej jon zaniaŭ pasadu kiraŭnika «Ukravtodora», a ŭ 2021 hodzie staŭ ministram infrastruktury Ukrainy. U 2022 hodzie jon uvajšoŭ u skład staŭki Viarchoŭnaha hałoŭnakamandujučaha Ukrainy, a paśla byŭ pryznačany vice-premjer-ministram u pytańniach adnaŭleńnia krainy. Z 7 studzienia 2025 hoda zajmaje pasadu daradcy ministra abarony Ukrainy.
Chto taki Ivan Kubrakoŭ?
Ivan Kubrakoŭ naradziŭsia 5 traŭnia 1975 hoda ŭ vioscy Malinaŭka Kaściukovickaha rajona Mahiloŭskaj vobłaści. Z 1995 hoda pracavaŭ u milicyi, zajmaŭ roznyja pasady ŭ Zasłaŭi, Viciebsku i Minsku. U 2018 hodzie atrymaŭ zvańnie hienierał-majora i ŭznačaliŭ staličnuju milicyju. Z 29 kastryčnika 2020 hoda zajmaje pasadu ministra ŭnutranych spraŭ Biełarusi.
Kiravaŭ razhonam pratestaŭ 2020 hoda, paśla čaho trapiŭ pad sankcyi ES, ZŠA, Vialikaj Brytanii i Kanady.
Fejk, jaki vyjšaŭ za miežy Ukrainy
Pieršaje paviedamleńnie pra svajactva Ivana i Alaksandra Kubrakovych źjaviłasia 1 śniežnia 2020 hodu va ŭkrainskich vydańniach, viadomych publikacyjami niepravieranaj infarmacyi, — «Politrada» i «Znaj.UA». «Politrada» spasłałasia na «ŭłasnyja krynicy», jakich nie kankretyzavała, a «Znaj.UA» padało jak dokaz materyjały «Našaj Nivy» i «Zierkała», u jakich była zhadanaja tolki bijahrafija Ivana Kubrakova.
Hetaje svajactva ŭkrainskija vydańni abhruntavali supadzieńniem imionaŭ rodzičaŭ — Kubrakova Mikałaja Uładzimiraviča. Tak zavuć i baćku ŭkrainskaha palityka, i brata biełaruskaha ministra. Jany poŭnyja ciozki. Za miežy ŭkrainskich miedyja hetaja infarmacyja ŭ 2020-m nie vyjšła, ale jaje padchapili biełaruskija vydańni i publikujuć čas ad času dahetul.
Sapraŭdy, brata biełaruskaha ministra Ivana Kubrakova zavuć Kubrakoŭ Mikałaj Uładzimiravič. Tak ža zavuć i baćku daradcy ŭkrainskaha ministra abarony Alaksandra Kubrakova. Ale, jak pakazali sabranyja Svabodaj dakumienty, heta dva roznyja čałavieki.
Biełaruś: Mikałaj Kubrakoŭ, brat biełaruskaha ministra ŭnutranych spravaŭ
U 2015 hodzie ŭ rajonnaj dziaržaŭnaj haziecie «Hołas Kaściukoŭščyny» było apublikavanaje intervju z maci ciapierašniaha biełaruskaha ministra Ivana Kubrakova — Hannaj Kubrakovaj. Jana 1937 hoda naradžeńnia, ź vioski Malinoŭka Kaściukovickaha rajona. U artykule nazyvajucca imiony ŭsich jaje 5 synoŭ, a taksama daty ich naradžeńnia.
«U 1960 hodzie naradziŭsia Mikałaj, 1961 — Michaił, 1964 — Viktar, 1969 — Siarhiej, 1975 — Ivan. […] Usie jany majuć svaje siemji, žyvuć u Minsku, pracujuć», — pisała hazieta «Hołas Kaściukoŭščyny» z słovaŭ maci Ivana Kubrakova.
Toje ž samaje raskazvała i ciotka Ivana Kubrakova pa baćku Valancina Kubrakova ŭ 2020 hodzie, kali da jaje pryjazdžali žurnalisty TUT.BY. Ź jaje słovaŭ, usie piaciora bratoŭ praviali dziacinstva na vioscy. Pastupova, adzin za adnym, jany pierajechali ŭ Minsk.
«Ivan Kubrakoŭ — najmałodšy ź piaci bratoŭ. Jon apošnim ź ich źjechaŭ u Minsk, ale pabudavaŭ samuju paśpiachovuju karjeru. Starejšy brat Mikałaj vyjechaŭ u Minsk pieršym i taksama pracavaŭ u milicyi, pajšoŭ na piensiju pa vysłuzie hadoŭ, ale praciahvaje pracavać u cyvilnym siektary. Michaił — kiroŭca «ŭ niejkaha načalnika», Viktar taksama kiroŭca ŭ niejkaj arhanizacyi, kaža Valancina Maćviejeŭna. Maci novaha ministra ŭnutranych spravaŭ pamierła ŭ sakaviku 2020 hoda, kaža Valancina Kubrakova. Joj było bolš za 80 hadoŭ. Baćka pamior daŭno i davoli rana — u 58 hadoŭ: sardečny prystup».
Pra toje, što niechta ź dziaciej nibyta pierajechaŭ va Ukrainu, žančyny nie ŭzhadvali.
Ale mienavita starejšaha brata ministra Ivana Kubrakova — Mikałaja Kubrakova — niekatoryja miedyja źviazali ź jaho ŭkrainskim ciozkam.
Jak paviedamili Svabodzie «Kibierpartyzany», va ŭzłamanaj imi bazie źviestak MUS Biełarusi jość daśje na maci Ivana Kubrakova Hannu. Ale niama nijakich źviestak pra jaje dziaciej, akramia adnaho — Ivana. Mužam paznačany Kubrakoŭ Uładzimir Cimafiejevič, 1934 hoda naradžeńnia, biez anijakich padrabiaznaściaŭ.
Radyjo Svaboda znajšła ŭ sacyjalnaj sietcy «Odnokłaśśniki» čałavieka ź imiem Mikałaj Kubrakoŭ. Hodam naradžeńnia ŭ jaho paznačany 1960-y, što supadaje z hodam, nazvanym u artykule «Hołasu Kaściukoŭščyny». Fatazdymku na staroncy niama. U siabrach u jaho ŭ asnoŭnym ludzi za Dziaržynska i Stańkava, heta pobač ź Minskam. Častka ź ich byłyja vajskoŭcy, siłaviki, ludzi prarasijskich pohladaŭ. Taksama tut ža adzin siabar z Kaściukovičaŭ — Viktar Hłušakoŭ. U apošniaha na staroncy jość fatazdymki z bratami Kubrakovymi, zroblenyja ŭ Kaściukovičach.
U tym ža artykule haziety «Hołas Kaściukoŭščyny» ŭ 2015 hodzie jość i kamientar samoha Mikałaja Kubrakova. Dla hetaha, jak śćviardžajecca, žurnalisty pazvanili jamu «ŭ Minsk»:
«Naša mama — rukadzielnica. Kožnaj niaviestcy ŭ padarunak da viasiella jana vyšyła paścielnuju bializnu i ručniki. My vielmi bieražliva zachoŭvajem jaje pracy. Ciapier ja na piensii, žyvu na dačy, i pakoi chaty ŭpryhožvajuć vyšytyja naŭlečki. […] Pahodu ŭ baćkoŭskaj chacie zaŭsiody stvaraje mama, dziakujučy joj atmaśfiera da hetaha času zachavałasia soniečnaj, ciopłaj, žyćcieśćviardžalnaj, siudy chočacca zaŭsiody pryjazdžać».
Ukraina: Mikałaj Kubrakoŭ, baćka daradcy ministra abarony
Mikałaj (Mikoła) Kubrakoŭ, baćka daradcy ŭkrainskaha ministra abarony Alaksandra Kubrakova, vonkava nie padobny ni na koha z bratoŭ biełaruskaha ministra. Bolš za toje, hod naradžeńnia jahony taksama inšy. Jon starejšy na 5 hadoŭ za biełaruskaha Mikałaja Kubrakova.
Staronki Mikoły Kubrakova my znajšli ŭ sacyjalnych sietkach «Odnokłaśśniki» i fejsbuk.
Fota i data naradžeńnia Mikoły Kubrakova supadajuć z dakumientami, jakija atrymała Svaboda z ukrainskich pašpartnych bazaŭ. Ź ich ža vynikaje, što ŭkrainski Mikoła Uładzimiravič Kubrakoŭ naradziŭsia na ŭschodzie Ukrainy, u Łuhanskaj vobłaści, taksama kala miažy z Rasijaj, ale za 700 kiłamietraŭ ad Kaściukovičaŭ. Žyŭ u Kryvym Rozie i Pieršatraviensku (ciapier Šachciorskaje) Dnieprapiatroŭskaj vobłaści, a ciapier žyvie ŭ Kijevie.
Jaho syn Alaksandr Kubrakoŭ, jaki 7 studzienia 2025 hoda staŭ daradcam ukrainskaha ministra abarony, naradziŭsia ŭ Pieršatraviensku (ciapier Šachtarskaje) i ŭžo doŭhi čas taksama žyvie ŭ Kijevie.
U sacyjalnych sietkach Mikoły Kubrakova nie znajšli nijakich uzhadak pra Biełaruś. Tam ža možna pabačyć, što niama ludziej ź Biełarusi siarod jahonych sietkavych siabroŭ. Bolšaść ich ź Pieršatravienska. Taksama ŭ jaho na staroncy paznačana, što ŭ hetym horadzie jon vučyŭsia ŭ škole № 2 z 1962 pa 1972 hady.
Radyjo Svaboda źviarnułasia pa kamientar jak da Alaksandra Kubrakova, tak i da Mikoły Kubrakova. Abodva adkazali, što nie prychodziacca rodzičami ministru ŭnutranych spravaŭ Biełarusi Ivanu Kubrakovu.
«Nie, nijakaha dačynieńnia da jaho nie maju, u Biełarusi nikoli nie byŭ», — adkazaŭ Mikoła Kubrakoŭ.
Takim čynam, nivodnaha realnaha dokazu rodnaści i svajactva ŭkrainskaha Alaksandra Kubrakova i biełaruskaha ministra Ivana Kubrakova niama.
Chto toj čaćviorty vajskoviec ZŠA, jakoha dahetul šukajuć? I jaki amal supadaje pa ŭzroście z amierykancam, zatrymanym pad Maładziečnam5
Chto toj čaćviorty vajskoviec ZŠA, jakoha dahetul šukajuć? I jaki amal supadaje pa ŭzroście z amierykancam, zatrymanym pad Maładziečnam
«Ludzi chočuć pieramovaŭ z tymi, chto maryć ich źniščyć fizična». Hutarka z Alaksandram Kabanavym pra žyćcio, «Biełpoł» i razychodžańnie ź Piatruchinym77
Kamientary
byu druhi artykuł.tam dakazvali ,što vielmi blizkaja radnia.
I sumiesny biźnies!