Kamandzir «Achmata» Ałaŭdzinaŭ admoviŭsia vyzvalać z pałonu čačencaŭ
«Ukraincy, pakińcie ich sabie. Jany nam nie patrebnyja sto hadoŭ. I naohuł nie treba mnie telefanavać», — kamandzir «Achmata» Apci Ałaŭdzinaŭ prakamientavaŭ videa z pałonnymi čačenskimi vajskoŭcami.
Pa słovach Ałaŭdzinava, zdača ŭ pałon źjaŭlajecca dla čačenca hańbaj, jakaja zmyvajecca tolki kryvioju.
«Čamu vy ličycie, što vas chtości pavinien naohuł vyciahvać z pałonu? — zajaviŭ jon. — Ja mahu vyciahnuć z pałonu kaho zaŭhodna, ale nie čačencaŭ, jakija dobraachvotna zdalisia ŭ pałon. Dla mianie jany nie isnujuć. Pakińcie ich sabie, i mnie absalutna biez roźnicy, što vy ź imi zrobicie. Ja nie liču siabie adkaznym za ich, tamu što jany syšli sa śviatoha šlachu», — źviarnuŭsia Ałaŭdzinaŭ da USU.
«Ja vas nie pavažaju, ja nie liču, Vy zasłuhoŭvajecie žyćcia», — zajaviŭ Ałaŭdzinaŭ byłym bajcam «Achmata» ŭ adkaz na prośbu vyciahnuć ich z pałonu.
«Vaźmicie ručku, ćvik, nakińciesia na kaho-niebudź i zrabicie ŭsio, kab vas zabili. Kab skončyć svoj šlach», — dadaŭ jon.
U žniŭni kamandzir «Achmata» Apci Ałaŭdzinaŭ apublikavaŭ videazvarot, dzie nazvaŭ «ukidam» infarmacyju pra bajcoŭ «Achmata», jakija zdalisia ŭ pałon. Jon zajaviŭ, što nivodny bajec jaho padraździaleńnia nie zdavaŭsia ŭ pałon.
11 žniŭnia prajekt «Choču žiť» apublikavaŭ videa ź dziasiatkami pałonnych rasijan z Kurskaj vobłaści. U ludziej na videa zakrytyja tvary. Try čałavieki zajavili, što jany z Hroznaha, a adzin ź ich — što jon z «Achmata».
Raniej kamandzir atrada kadyraŭcaŭ raskazaŭ, čamu jany nie spynili USU ŭ Kurskaj vobłaści: padraździaleńni čačenskaha śpiecnaza «Achmat», jakija achoŭvali dziaržaŭnuju miažu Rasii z Ukrainaj, nie spynili ŭvarvańnie USU, bo tyja prosta prajšli mima ich pazicyj, zajaviŭ kamandzir «Achmata» Apci Ałaŭdzinaŭ.
Pamiatajecie pravakatara i danosčyka Jaŭhiena Kakojta? Jon ciapier taksama palitviazień3
Kamientary