Navukoŭcy vyraścili vymierłaje biblejskaje dreva ź siemieni, jakoje pralažała tysiaču hadoŭ
Nasieńnie staražytnaha dreva adšukali ŭ piačory ŭ Iŭdziejskaj pustyni jašče ŭ 1980-ja hady.
Navukoŭcy vykazali zdahadku, što hetaja raślina rodu Kamifora (Commiphora) zhadvajecca ŭ biblejskich tekstach. Historyja nasieńnia, jakoje pralažała ŭ ziamli amal tysiaču hadoŭ, nie tolki ŭražvaje, ale i adkryvaje novyja mahčymaści dla vyvučeńnia staražytnaj fłory zasušlivaha rehijonu. Pra heta paviedamlaje partał Naked Science.
U daśledavańni, apublikavanym u časopisie Communications Biology, mižnarodnaja daśledčaja hrupa apisała ŭvieś šlach znachodki — ad archieałahičnych raskopak i pieršych parastkaŭ da raźvićcia raśliny.
Radyjevuhlarodny analiz nasieńnia, znojdzienaha ŭ piačory ŭ paŭnočnaj častcy Iŭdziejskaj pustyni, pakazaŭ, što jano datujecca 993—1202 hadami našaj ery. Znachodku pieradali ŭ Centr ustojlivaj sielskaj haspadarki (Izrail), dzie daśledčyki zdoleli jaho praraścić.
Spačatku nasieńnie padrychtavali da pasadki, apracavaŭšy śpiecyjalnymi rastvorami dla stymulacyi rostu, paśla čaho pasadzili ŭ sterylnuju hlebu. Praź piać tydniaŭ źjaviŭsia pieršy parastak, što samo pa sabie stała značnaj padziejaj.
Prynaležnaść raśliny da rodu Kamifora — siamiejstva Burzeravych, viadomych svaimi smalistymi vydzialeńniami, — vyznačyli z dapamohaj siekvienavańnia DNK i fiłahienietyčnaha analizu. Choć raślina nie supadaje ni z adnym ź viadomych navucy vidam, jaje najbližejšymi svajakami akazalisia try vidy taho ž rodu z dalokaj Paŭdniovaj Afryki.
Hetaja suviaź ździŭlaje, pakolki Kamifora zvyčajna asacyjujecca z rehijonami Afryki, Madahaskara i Aravijskaha paŭvostrava.
Aŭtary navukovaj pracy vykazali zdahadku, što raślina źviazana z «cory» — smałoj, zhadanaj u Biblii i viadomaj svaimi hajučymi ŭłaścivaściami. U adroźnieńnie ad inšych vidaŭ rodu Kamifora, jakija ceniacca za ich aramatyčnyja smoły, novaja raślina maje mała aramatyčnych złučeńniaŭ. Adnak najaŭnaść u joj raniej nieviadomaj sieryi hlikalipidaŭ, jakija mohuć vałodać farmakałahičnaj aktyŭnaściu, dazvalaje mierkavać, što raślinu vykarystoŭvali ŭ lačebnych metach.
Dreva, jakoje kamanda nazvała Šyba, dasiahaje troch mietraŭ u vyšyniu i daje navukoŭcam unikalnuju mahčymaść vyvučyć vymierłuju raślinu.
Daśledčyki vysunuli niekalki hipotez pra toje, jak nasieńnie apynułasia ŭ piačory. Jaho mahli prynieści ptuški abo žyvioły, ale nie vyklučany i ŭdzieł ludziej, jakija zachoŭvali nasieńnie dla nastupnaha vykarystańnia. Kamanda płanuje praciahnuć daśledavańni, kab dakładna vyznačyć vid raśliny i vyvučyć jaho ŭłaścivaści.
Dziaržaŭnyja sacyjołahi: Biełarusy najpierš źviazvajuć svaju dziaržaŭnaść ź Vialikim Kniastvam Litoŭskim24
Kamientary