200 jeŭra za pasłuhu «voina-internacyjanalista». Čarha na miažy z aŭto raście, a ź joj i ceńnik na chutki prajezd

Pra takija pasłuhi piša av.by.

Z 1 kastryčnika ŭ punktach propusku ŭ ekśpierymientalnym režymie pačali dziejničać novyja praviły čakańnia. Pa ich paśla rehistracyi transpartu ŭ sistemie elektronnaj čarhi bolš nie treba stajać u kalainie na miažy, možna źjechać i viarnucca ŭ zonu čakańnia, kali padydzie vaša čarha.

Novyja praviły čakańnia źviali na ništo biznes handlaroŭ miescami ŭ čarzie. Ale inšyja pasłuhi dla chutkaha prachodžańnia miažy nie źnikli.

200 jeŭra za pajezdku

Zhodna z p.6, p.6.1 pastanovy Savieta Ministraŭ Respubliki Biełaruś ad 22 studzienia 2009 hoda №70 pravam pazačarhovaha ŭjezdu ŭ aŭtadarožnyja punkty propusku vałodajuć, naprykład, asoby, jakija jeduć pa paśviedčańniach udzielnika vajny, a taksama ludzi ź dziećmi va ŭzroście da 3 hadoŭ abo dziećmi-invalidami va ŭzroście da 18 hadoŭ.

U admysłovych čatach pieryjadyčna šukajuć takich spadarožnikaŭ, kab ź imi abminuć zonu čakańnia i naŭprost nakiravacca da punkta propusku biez čarhi.

Žurnalisty dziela ekśpierymientu puścili pa tematyčnych hrupach u miesiendžarach klič ab dapamozie ŭ paskoranym prachodžańni miažy. Abjavy byli apublikavanyja ŭviečary. Da ranicy ŭ «Vajbiery» visieli try zapyty na pierapisku ad nieznajomych karystalnikaŭ z prapanovami pa abjavie.

Adzin z pamahatych za svaju pasłuhu paprasiŭ $200. Heta standartnaja taksa: inšyja paprasili stolki ž.

Na takuju «padpracoŭku» ludzi, jakija majuć prava pazačarhovaha ŭjezdu ŭ punkt propusku, hatovyja i ź inšaha horada pryjechać. Tak, adzin z surazmoŭcaŭ udakładniŭ, što kali treba pierasiekčy miažu najbližejšym časam, to jon, na žal, nie paśpieje dajechać, bo žyvie nie ŭ Breście.

Udzielniki tematyčnych čataŭ adznačajuć, što takoha zarobku časta nie curajucca, karystajučysia svaimi zakonnymi pravami, voiny-internacyjanalisty.

«Treba było terminova pierajechać miažu, visieła «abjava» ad voina-internacyjanalista. Zaradziŭ mnie 200 jeŭra da mosta! Ja tolki spytaŭ: heta ŭ miesiac? Pierapiska była vydalenaja vajarom z chutkaściu palotu kuli AK-47», — piša adzin z karystalnikaŭ sietki.

Varyjant za 50 jeŭra i 50 rubloŭ

Jość i tańniejšyja varyjanty chutka pierasiekčy miažu.

Taki sposab padydzie tym, chto padarožničaje nie na asabistym aŭto.

Možna padsieści ŭ mašynu da ludziej, jakija majuć prava pazačarhovaha ŭjezdu ŭ punkt propusku. Apošnija, jak praviła, zahadzia raźmiaščajuć u čatach infarmacyju pra toje, kali i ŭ kolki jany płanujuć jechać u ES. Cana — 50 jeŭra za pajezdku z Bresta da Varšavy.

Nie suprać uziać spadarožnikaŭ za płatu i aŭtamabilisty, jakija nie majuć ilhot na miažy, ale ŭžo adstajali čarhu i znachodziacca ŭ zonie čakańnia. Žurnalistam ahučyli canu ŭ 50 biełaruskich rubloŭ.

• 2
• 0
• 1
• 2
• 0
• 0
• 1
• 0