200 еўра за паслугу «воіна-інтэрнацыяналіста». Чарга на мяжы з аўто расце, а з ёй і цэннік на хуткі праезд

Пра такія паслугі піша av.by.

З 1 кастрычніка ў пунктах пропуску ў эксперыментальным рэжыме пачалі дзейнічаць новыя правілы чакання. Па іх пасля рэгістрацыі транспарту ў сістэме электроннай чаргі больш не трэба стаяць у каляіне на мяжы, можна з'ехаць і вярнуцца ў зону чакання, калі падыдзе ваша чарга.

Новыя правілы чакання звялі на нішто бізнэс гандляроў месцамі ў чарзе. Але іншыя паслугі для хуткага праходжання мяжы не зніклі.

200 еўра за паездку

Згодна з п.6, п.6.1 пастановы Савета Міністраў Рэспублікі Беларусь ад 22 студзеня 2009 года №70 правам пазачарговага ўезду ў аўтадарожныя пункты пропуску валодаюць, напрыклад, асобы, якія едуць па пасведчаннях удзельніка вайны, а таксама людзі з дзецьмі ва ўзросце да 3 гадоў або дзецьмі-інвалідамі ва ўзросце да 18 гадоў.

У адмысловых чатах перыядычна шукаюць такіх спадарожнікаў, каб з імі абмінуць зону чакання і наўпрост накіравацца да пункта пропуску без чаргі.

Журналісты дзеля эксперыменту пусцілі па тэматычных групах у месенджарах кліч аб дапамозе ў паскораным праходжанні мяжы. Аб'явы былі апублікаваныя ўвечары. Да раніцы ў «Вайбере» віселі тры запыты на перапіску ад незнаёмых карыстальнікаў з прапановамі па аб'яве.

Адзін з памагатых за сваю паслугу папрасіў $200. Гэта стандартная такса: іншыя папрасілі столькі ж.

На такую «падпрацоўку» людзі, якія маюць права пазачарговага ўезду ў пункт пропуску, гатовыя і з іншага горада прыехаць. Так, адзін з суразмоўцаў удакладніў, што калі трэба перасекчы мяжу найбліжэйшым часам, то ён, на жаль, не паспее даехаць, бо жыве не ў Брэсце.

Удзельнікі тэматычных чатаў адзначаюць, што такога заробку часта не цураюцца, карыстаючыся сваімі законнымі правамі, воіны-інтэрнацыяналісты.

«Трэба было тэрмінова пераехаць мяжу, вісела «аб'ява» ад воіна-інтэрнацыяналіста. Зарадзіў мне 200 еўра да моста! Я толькі спытаў: гэта ў месяц? Перапіска была выдаленая ваяром з хуткасцю палёту кулі АК-47», — піша адзін з карыстальнікаў сеткі.

Варыянт за 50 еўра і 50 рублёў

Ёсць і таннейшыя варыянты хутка перасекчы мяжу.

Такі спосаб падыдзе тым, хто падарожнічае не на асабістым аўто.

Можна падсесці ў машыну да людзей, якія маюць права пазачарговага ўезду ў пункт пропуску. Апошнія, як правіла, загадзя размяшчаюць у чатах інфармацыю пра тое, калі і ў колькі яны плануюць ехаць у ЕС. Цана — 50 еўра за паездку з Брэста да Варшавы.

Не супраць узяць спадарожнікаў за плату і аўтамабілісты, якія не маюць ільгот на мяжы, але ўжо адстаялі чаргу і знаходзяцца ў зоне чакання. Журналістам агучылі цану ў 50 беларускіх рублёў.

• 1
• 0
• 0
• 0
• 0
• 0
• 1
• 0